నాన్సీ పెలోసీ భర్తపై దాడి : సుత్తితో మోకాళ్లు విరగ్గొట్టి, వీల్ చైర్ లో కాంగ్రెస్ కు.. షాకింగ్ విషయాలు..

స్పీకర్ నాన్సీ పెలోసీ భర్తపై దాడి కేసులో నిందితుడు వెల్లడించిన వివరాలు దిగ్భ్రాంతికరంగా ఉన్నాయి. నాన్సీ పెలోసీని మోకాళ్లు విరగ్గొట్టి, వీల్ చైర్ లో కాంగ్రెస్ కు తీసుకువెళ్లాలనుకున్నట్టు నిందితుడు వెల్లడించాడు. 

శాన్ ఫ్రాన్సిస్కో : అమెరికా ప్రతినిధుల సభ స్పీకర్ నాన్సీ ఫెలోసీ భర్తపై దాడికి పాల్పడిన నిందితుడు పోలీసుల విచారణలో దిగ్భ్రాంతికర విషయాలు  వెల్లడించాడు. శుక్రవారం ఇంట్లో ఒంటరిగా ఉన్న పాల్ (82)పై అతను సుత్తితో దాడి చేసిన విషయం తెలిసిందే.  ఇది రాజకీయ ప్రేరేపిత, ఉద్దేశపూర్వక దాడి అని శాన్ ఫ్రాన్సిస్కో డిస్ట్రిక్ట్ అటార్నీ బ్రూక్ జెంకిన్స్ వెల్లడించారు. ‘నాన్సీ  ఎక్కడున్నారు అంటూ ఆరా తీశాడు. ఆమె కొన్ని రోజుల వరకు రాదు అని తెలుసుకుని పాల్ చేతులు కట్టేశాడు. కిందికి వెళ్లాలని ప్రయత్నించిన పాల్ ను అడ్డుకున్నాడు. చివరికి రెస్ట్ రూంకు వెళ్లేందుకు అంగీకరించాడు. 

రెస్ట్ రూం నుంచే పోలీసులకు పాల్ సమాచారం అందించాడు. తర్వాత డేవిడ్ సుత్తితో పాల్ తలపై మోదాడు. పెనుగులాట జరుగుతుండగా పోలీసులు అక్కడికి చేరుకుని అతడిని అదుపులోకి తీసుకున్నారు’  అని చెప్పారు. ‘ డెమోక్రాటిక్ పార్టీలోని అబద్ధాలు ఆడేవారికి నాయకురాలు నాన్సీ. నిజం చెబితే వదిలేయాలని,  లేదంటే సుత్తితో మోకాళ్లు విరగ్గొట్టి, వీల్ చైర్ లో కాంగ్రెస్ కు తీసుకువెళ్లాలి అనుకున్నా, అబద్ధాలు మాట్లాడితే ఫలితం ఎలా ఉంటుందో మిగతా సభ్యులకు చూపించాలనుకున్నా అని డేవిడ్ విచారణలో తెలిపాడు’ అని జెంకిన్స్ వెల్లడించారు. 

నాన్సీ తరువాత మరో కాంగ్రెస్ సభ్యుడు పైన దాడి చేయాలనుకుంటున్నట్లు చెప్పిన వివరాలు మాత్రం వెల్లడించలేదన్నారు. అంతే కాదు, పాల్, డేవిడ్ లకు మధ్య ఇంతకుముందు ఎటువంటి పరిచయం కూడా లేదని జెంకిన్స్  చెప్పారు. పెలోసీ ఇంట్లోకి దొంగతనంగా చొరబడిన డేవిడ్ డిపపే (42) సుత్తితోపాటు, చేతులను కట్టేసేందుకు జిప్ టేపు, తాడు వెంట తీసుకెళ్లాడు. కెనడా పౌరుడైన డేవిడ్ 2000 సంవత్సరం నుంచి అమెరికాలో ఉంటున్నాడు. అతడి వీసా గడువు కూడా ఎప్పుడో ముగిసిపోయిందని అధికారులు పేర్కొన్నారు. 

కాగా,  గతవారం అమెరికా ప్రతినిధుల సభ స్పీకర్ నాన్సీ పెలోసి అపహరణకు యత్నం జరిగింది. ఈమేరకు 42 ఏళ్ల వ్యక్తిపై అభియోగాలు మోపారు. అతడు గత శుక్రవారం శాన్ ఫ్రాన్సిస్కోలోని ఇంట్లోకి చొరబడి ఆమె భర్త పౌల్ పెలోసీ (82)పై సుత్తితో దాడి చేశాడు. ఇప్పటికీ అరెస్టైన డేవిడ్ డెపాపే అనే వ్యక్తి పై సోమవారం డిపార్ట్మెంట్ ఆఫ్ సిటీస్ అదనంగా రెండు అభియోగాలను నమోదు చేసింది.

వీటిల్లో అమెరికా అధికారుల విధులను ఆటంకపరిచేందుకు కుటుంబీకులపై దాడి చేయడం, నాన్సీ పెలోసిని కిడ్నాప్ చేయడానికి ప్రయత్నించడం ఉన్నాయి. అనుమానితుడి వద్ద నుంచి ఒక టేప్ రోల్, తాడు, సుత్తి వంటి వాటిని స్వాధీనం చేసుకున్నారు. ఈ నేపథ్యంలోనే  అతడు నాన్సీ పెలోసిని బందీగా పట్టుకోవడానికి ప్రయత్నించాడు అనే నిర్ధారణకు వచ్చారు. అమెరికా అధ్యక్ష స్థానానికి ఉన్న వరుస క్రమంలో హౌస్ స్పీకర్ హోదాలో పెలోసి రెండో స్థానంలో ఉన్నారు.

2006లో తొలిసారి అమెరికా చట్ట ప్రతినిధుల సభ స్పీకర్ గా పెలోసీ ఎన్నికయ్యారు. 2011 వరకు ఈ పదవిలో కొనసాగారు.  ఆ తర్వాత 2019లో మరోసారి స్పీకర్ బాధ్యతలు చేపట్టి  అప్పటి నుంచి ఈ పదవిలో కొనసాగుతున్నారు. ఇప్పటివరకు అమెరికా చట్టసభ స్పీకర్ గా పనిచేసిన ఏకైక మహిళ పెలోసీ కావడం విశేషం.