పాకిస్తాన్ విడిచి పారిపోయిన ఇమ్రాన్ ఖాన్ మూడో భార్య ఫ్రెండ్.. ఎందుకంటే ?

ఇమ్రాన్ ఖాన్ మూడో భార్యకు అత్యంత సన్నిహితురాలు, ఫ్రెండ్ అయిన ఫరా ఖాన్ పాకిస్తాన్ విడిచి పారిపోయారు. ఇమ్రాన్ ఖాన్ ప్రధాని కాకుండా వేరే వ్యక్తి అధికారం చేపడితే తమను టార్గెట్ చేస్తారనే భయంతో ఆమె దుబాయ్ వెళ్లిపోయారు. ఇంతకు ముందే ఆమె భర్త కూడా దేశం విడిచిపోయారు. 

పాక్ ప్రధాని ఇమ్రాన్ ఖాన్ త‌న అధికారాన్ని తిరిగి చేజిక్కించుకోవాలని ప్రయత్నిస్తున్నారు. దీని కోసం ఆయ‌న శ‌త‌విధాలా ప్ర‌య‌త్నాలు కొన‌సాగిస్తున్నారు. ఈ నేప‌థ్యంలో ఇమ్రాన్ ఖాన్ నేతృత్వంలో ప్ర‌భుత్వం ఏర్ప‌డ‌కుండా.. కొత్త ప్ర‌భుత్వం ఏర్పాటైతే త‌మ‌పై ప్రతీకారం తీర్చుకుంటామనే భయంతో ఆయన సన్నిహితులు విదేశాలకు పారిపోవడం ప్రారంభించారు. ఈ క్ర‌మంలో ఇమ్రాన్ ఖాన్ మూడో భార్య బుష్రా బీబీకి అత్యంత సన్నిహితురాలు అయిన ఫరా ఖాన్ అవినీతి ఆరోపణలు రావడంతో దేశం విడిచి వెళ్లిపోయారు. 

ఫరా ఖాన్ భర్త అహ్సన్ జమీల్ గుజ్జార్ ఇప్పటికే అమెరికా వెళ్లిపోయారు. అయితే ఆదివారం ఫరా ఖాన్ ఆదివారం దుబాయ్‌కు బయలుదేరినట్లు ఎక్స్‌ప్రెస్ ట్రిబ్యూన్ వార్తాపత్రిక నివేదించింది. ఇమ్రాన్ ఖాన్‌పై అవిశ్వాస తీర్మానాన్ని నేషనల్ అసెంబ్లీ డిప్యూటీ స్పీకర్ తిరస్కరించిన తర్వాత పాకిస్థాన్‌లో నెలకొన్న రాజకీయ గందరగోళం మధ్య ఈ పరిణామం చోటు చేసుకుంది. ఆ తర్వాత పాకిస్థాన్ అధ్యక్షుడు జాతీయ అసెంబ్లీని రద్దు చేశారు. ఇమ్రాన్ ఖాన్ ఎన్నికలకు పిలుపునిచ్చిచ్చారు. అయితే పాక్ క్యాబినెట్ సెక్రటేరియట్ అతనిని పాకిస్తాన్ ప్రధానమంత్రిగా డీ-నోటిఫై చేసింది.

ఫరా ఖాన్ ఎందుకు పారిపోయాడు?
ఫరా ఖాన్ అవినీతికి పాల్పడ్డారని, ప్రభుత్వ అధికారుల బదిలీలు, పోస్టింగ్‌ల‌ను సులభతరం చేశారని ఆయ‌న‌పై ఆరోప‌ణ‌లు ఉన్నాయి. తమ ఇష్టానుసారంగా అధికారులను బదిలీ చేసి, పోస్టింగులు పొందేందుకు ఫరా ఖాన్ భారీ మొత్తంలో డబ్బు అందుకున్నారని ప్రతిపక్షాలు తీవ్రంగా ఆరోపించాయి. ఈ కుంభకోణాన్ని ‘అన్ని కుంభకోణాలకు తల్లి’ అని పిలిచిన ప్రతిపక్షం.. కుంభకోణం మొత్తం విలువ 6 బిలియన్ పాకిస్తానీ రూపాయలు (USD 32 మిలియన్లు) అని ఆరోపించింది.

 ఇమ్రాన్ ఖాన్, అతని భార్య బుష్రా బీబీ ఆదేశాల మేరకు ఫరా ఈ అవినీతికి పాల్పడ్డారని పాకిస్థాన్ ముస్లిం లీగ్ (ఎన్) వైస్ ప్రెసిడెంట్, పదవీచ్యుతుడైన ప్రధాని నవాజ్ షరీఫ్ కుమార్తె మరియం నవాజ్ మ‌రియ‌మ్ ఆరోపించారు. ఇమ్రాన్ ఖాన్ అధికారానికి దూరంగా ఉన్న తర్వాత తన దొంగలు బట్టబయలు అవుతుంద‌న్నందున జాగ్ర‌త్తగా ఉన్నార‌ని అన్నారు. పంజాబ్‌లో ముఖ్యమంత్రి ఉస్మాన్ బుజ్దార్ ద్వారా బదిలీలు, పోస్టింగ్‌లలో ఫరా బిలియన్ల రూపాయలను సంపాదించారని ఇటీవలే తొలగించబడిన పంజాబ్ గవర్నర్ చౌదరి సర్వర్, ఇమ్రాన్ ఖాన్ పాత స్నేహితుడు, పార్టీ ఫైనాన్సర్ అలీమ్ ఖాన్ కూడా ఆరోపించారు. 

ఫరా ఖాన్, ఆమె భర్త దుబాయ్‌కి పారిపోవడమే కాకుండా, ఇమ్రాన్ ఖాన్ ఉన్నత పదవిని కోల్పోయిన తర్వాత అతని సన్నిహితులు దేశం విడిచి వెళ్లాలని ప్లాన్ చేసినట్లు కూడా నివేదికలు ఉన్నాయి. ఇటీవల ఓ టీవీ ఇంటర్వ్యూలో ఇమ్రాన్ ఖాన్ తన ప్రాణాలకు ముప్పు ఉందని సంచ‌ల‌న వ్యాఖ్య‌లు చేశారు. విదేశీ చేతుల్లో కీలు బొమ్మ‌గా మారిన ప్రతిపక్షం కూడా త‌నను హ‌త్య చేసేందుకు ప్ర‌య‌త్నిస్తోందంటూ ఆరోప‌ణ‌లు చేశారు. “ నా జీవితం కూడా ప్రమాదంలో ఉందని నా దేశానికి చెబుతున్నాను. వారు నాతో పాటు నా భార్య‌ను కూడా హ‌త్య చేసేందుకు ప్ర‌య‌త్నిస్తున్నారు.” అని ఇమ్రాన్ ఖాన్ ఆవేద‌న చెందుతూ చెప్పారు.