గాజా యుద్ధానికి తాత్కాలిక బ్రేక్‌..70 రోజుల యుద్ధ విరామానికి అంగీకరించిన Hamas!

హమాస్ అంగీకరించిన 70 రోజుల యుద్ధ విరామంపై ఇజ్రాయెల్ స్పందన ఇవ్వలేదు. గాజా హింసపై శాశ్వత పరిష్కారం ఇంకా కనిపించడం లేదు. 

గాజాలో నెలలుగా కొనసాగుతున్న హింసాకాండకు తాత్కాలిక విరామం వచ్చే సూచనలు కనిపిస్తున్నాయి. అమెరికా కార్యదర్శి  స్టీవ్ విట్కాఫ్ సమర్పించిన తాజా యుద్ధ విరామ ప్రతిపాదనను హమాస్ అంగీకరించినట్లు ఒక పాలస్తీనియన్ అధికారి తెలిపారు. మధ్యవర్తుల ద్వారా ఇచ్చిన ఈ ప్రణాళిక ప్రకారం, రెండు దశల్లో 10 మంది ఇజ్రాయెల్ బందీలను విడుదల చేస్తారు. దీని బదులుగా 70 రోజుల యుద్ధ విరామం అమల్లోకి వస్తుంది. అదనంగా, ఇజ్రాయెల్ కొన్ని ప్రాంతాల నుంచి సైనికంగా వెనక్కి తగ్గుతుంది. ప్రతిపాదనలో భాగంగా వందలాది పాలస్తీనియన్ ఖైదీలను కూడా విడుదల చేయాలని పేర్కొన్నారు, వీరిలో చాలా మంది దీర్ఘకాల శిక్ష అనుభవిస్తున్నారు.

ఈ ప్రతిపాదనపై ఇజ్రాయెల్ నుంచి ఇంకా ఎలాంటి అధికారిక స్పందన రాలేదు. అయితే, హమాస్ మాత్రం ఒకవేళ ఇజ్రాయెల్ గాజా నుంచి పూర్తిగా ఉపసంహరించుకుంటే మిగిలిన బందీలను కూడా విడుదల చేస్తామని సూచించింది.గత మార్చి 18న, ఇజ్రాయెల్ తాత్కాలిక విరామాన్ని ముగించి మళ్ళీ సైనిక దాడులను ప్రారంభించింది. అంతటితో ఆగకుండా హమాస్ అనుబంధ వర్గాలు తిరిగి రాకెట్ దాడులను చేపట్టాయి. అయితే, ఇజ్రాయెల్ ప్రధాన మంత్రి బెంజమిన్ నెతన్యాహు మాత్రం పూర్తిస్థాయి ఉపసంహరణపై ఒప్పందానికి సిద్ధంగా లేరని స్పష్టం చేశారు. హమాస్‌ను పూర్తిగా నాశనం చేసే వరకూ యుద్ధం కొనసాగుతుందని, బందీల విడుదలకు మాత్రమే తాత్కాలిక విరామాన్ని పరిగణించవచ్చని చెప్పారు.

ఈ సంఘర్షణ గత సంవత్సరం అక్టోబర్ 7న హమాస్ దక్షిణ ఇజ్రాయెల్‌పై చేపట్టిన విపరీత దాడితో మొదలైంది. ఒక్కరోజులోనే 1,200 మంది ప్రాణాలు కోల్పోయారు. వందలాది మంది బందీలుగా పట్టుబడ్డారు. ఇజ్రాయెల్ చరిత్రలో అత్యంత ప్రాణనష్టం కలిగించిన దాడిగా నిలిచింది. దీనికి ప్రతిగా ఇజ్రాయెల్ చేపట్టిన సైనిక దాడుల్లో పదుల వేల మంది పాలస్తీనియన్లు మరణించగా, లక్షలాది మంది స్థానచ్యుతులయ్యారు. గాజాలో ఆహారం, ఔషధాలు, నీరు వంటి ప్రాథమిక వనరుల కొరత తీవ్రమైంది.

ఇప్పటి వరకు అంతర్జాతీయంగా ఎన్నో యుద్ధ విరామ ప్రయత్నాలు జరిగినప్పటికీ, శాశ్వత శాంతికి మార్గం కనిపించలేదు. అమెరికా, ఈజిప్ట్ వంటి దేశాలు పరిష్కారానికి ప్రయత్నిస్తున్నా, ఇజ్రాయెల్-హమాస్ మధ్య ఉన్న ప్రాథమిక డిమాండ్లు ఇప్పటికీ పరిష్కారానికి రాలేదు.ఇలాంటి పరిస్థితుల్లో హమాస్ అంగీకరించిన తాజా ప్రతిపాదనపై ఇజ్రాయెల్ తీసుకునే నిర్ణయం ఇప్పుడు కీలకం కానుంది.