కాలేయం ఆరోగ్యంగా ఉండాలంటే.. ఇవి చాలా చాలా అవసరం
సారాంశం
శరీరం ఆరోగ్యంగా ఉండాలంటే లోపలి నుంచి పోషణ చాలా అవసరం. కానీ మనలో చాలా మంది సూక్ష్మపోషకాలను తీసుకోరు. దీనివల్లే కాలెయ సమస్యలు కూడా వస్తాయని నిపుణులు చెబుతున్నారు.
కాలేయం మన శరీరంలో చాలా ముఖ్యమైన అవయవం. మనం తీసుకున్న ఆహారంలోని పోషకాలను కాలేయం శరీరంలోని ఇతర అవయవాలకు పంపుతుంది. కాలేయం శరీరంలో అతిపెద్ద జీర్ణ గ్రంథి. ఇది వివిధ పదార్ధాల జీవక్రియలో ప్రధాన పాత్ర పోషిస్తుంది. శరీరాన్ని నిర్విషీకరణ చేయడంతో పాటుగా ఎర్ర రక్త కణాల విచ్ఛిన్నం, ప్రోటీన్ , హార్మోన్ల సంశ్లేషణ, గ్లైకోజెన్, రక్తాన్ని కూడా నిల్వ చేస్తుంది. అందుకే కాలేయ ఆరోగ్యానికి మేలు చేసే ఆహారాన్నే తినాలి. కొన్ని సూక్ష్మపోషకాలు కాలేయాన్ని నిర్విషీకరణ చేయగలవు. అలాగే ఆరోగ్యంగా కూడా ఉంచుతాయి. ఇందుకోసం ఏయే సూక్ష్మపోషకాలను తీసుకోవాలంటే.
సూక్ష్మపోషకాలు శరీరం నుంచి విషాన్ని తొలగిస్తాయి. కాలెయాన్ని ఆరోగ్యంగా ఉంచడానికి, శరీరాన్ని వ్యాధుల నుంచి రక్షించడానికి సహాయపడతాయి. జింక్, మెగ్నీషియం, కాల్షియం, సెలీనియం వంటి ఖనిజాలతో పాటుగా విటమిన్ ఎ, విటమిన్ బి, విటమిన్ సి వంటి పోషకాలు కాలేయాన్ని నిర్విషీకరణ చేయడానికి, ఆరోగ్యంగా ఉంచడానికి సహాయపడతాయి.
జర్నల్ ఆఫ్ ఆల్టర్నేటివ్ మెడిసిన్ ప్రకారం.. ఐరన్ శరీరానికి చాలా అవసరమైన మూలకం. సెల్యులార్ ఎనర్జీ, యాంటీ ఆక్సిడెంట్ భద్రత, ఇనుము రవాణా, ఫైబ్రోజెనిసిస్ లో పాల్గొనే ఎంజైమ్లకు ఇది సహాయపడుతుంది. ఇనుము లోపం ఈ ప్రక్రియలకు అంతరాయం కలిగిస్తుంది. అలాగే కాలేయ వ్యాధికి కూడా కారణమవుతుంది. ఆకుకూరలు, షెల్ఫిష్, విత్తనాలు, గింజలు, తృణధాన్యాలు, డార్క్ చాక్లెట్, పుట్టగొడుగులు మొదలైన వాటిలో ఇనుము ఎక్కువగా ఉంటుంది.
అనల్స్ ఆఫ్ ట్రాన్స్లేషనల్ మెడిసిన్ లో ప్రచురించబడిన అధ్యయనం ప్రకారం.. శరీరం సహజంగా ఉత్పత్తి చేసే అత్యంత శక్తివంతమైన యాంటీఆక్సిడెంట్ ఎంజైమ్లలో ఒకటి గ్లూటాతియోన్. మెగ్నీషియం దాని ఉత్పత్తికి చాలా అవసరం. ఇది సెల్యులార్, కాలేయ నిర్విషీకరణలో కీలక పాత్ర పోషిస్తుంది. మంచి మొత్తంలో మెగ్నీషియం తీసుకోవడం వల్ల కాలేయ వ్యాధి కారణంగా మరణాల ప్రమాదాన్ని 49% తగ్గించొచ్చు. గుమ్మడికాయ గింజలు, చియా విత్తనాలు, బాదం, ఉడికించిన బచ్చలికూర, జీడిపప్పు, వేరుశెనగ, సోయా పాలలో మెగ్నీషియం పుష్కలంగా ఉంటుంది. ఇవి కాలేయాన్ని నిర్విషీకరణ చేస్తాయి.
జర్నల్ నేచర్ ప్రకారం.. కాలేయ పనితీరును నిర్వహించడంలో జింక్ ముఖ్యమైన పాత్ర పోషిస్తుంది. దీర్ఘకాలిక కాలేయ వ్యాధి ఉన్న రోగులు సాధారణంగా తక్కువ మొత్తంలో జింక్ ను కలిగి ఉంటారు. ఇది కాలేయ ఫైబ్రోసిస్ కు కారణమవుతుంది.
బీన్స్, శనగలు, కాయధాన్యాలు, టోఫు, వాల్ నట్స్, జీడిపప్పు, చియా విత్తనాలు, అవిసె గింజలు, జనపనార గింజలు, గుమ్మడికాయ గింజలు, క్వినోవా మొదలైనవి ఆహారాల్లో జింక్ ఎక్కువగా ఉంటుంది. మీ రోజువారీ ఆహారంలో 50 మి.గ్రా జింక్ ఉండేలా చూసుకోండి.
జర్నల్ ఆఫ్ న్యూట్రియంట్స్ ప్రకారం.. కాల్షియం స్థాయిలు కాలేయ జీవక్రియ నియంత్రణకు సహాయపడతాయి. ఇది కాలేయ పునరుత్పత్తికి చాలా అవసరం. అనేక ఆహారాలలో నిర్దిష్ట సమ్మేళనాలు లేదా యాంటీఆక్సిడెంట్లు ఉంటాయి. ఇవి కాలేయం సజావుగా పనిచేయడానికి సహాయపడతాయి. ద్రాక్ష, బ్లూబెర్రీస్, క్రాన్బెర్రీస్, ఫ్యాటీ ఫిష్, ఆలివ్ ఆయిల్, బ్రోకలీ, బ్రస్సెల్స్ మొలకల్లో కాల్షియం పుష్కలంగా ఉంటుంది.
యూకే నేషనల్ హెల్త్ సర్వీస్ పరిశోధన ప్రకారం.. విటమిన్ ఎ లోపం ఉన్నా.. ఎక్కువగా ఉన్నా కాలేయ ఆరోగ్యం దెబ్బతింటుంది. విటమిన్ ఎ సప్లిమెంట్లను ఎక్కువగా తీసుకోవడం వల్ల కాలేయ వ్యాధి వచ్చే ప్రమాదం పెరుగుతుంది. విటమిన్ ఎ లోపం కాలేయ సిరోసిస్ ప్రమాదాన్ని పెంచుతుంది. అంతేకాదు ఇది ఆసిటిస్ లేదా కాలేయ ఎన్సెఫలోపతి అవకాశాలను పెంచుతుంది. జున్ను, గుడ్లు, జిడ్డుగల చేపలు, బలవర్థకమైన తక్కువ కొవ్వు స్ప్రెడ్స్, పాలు, పెరుగులో విటమిన్ ఎ పుష్కలంగా ఉంటుంది. ఇది కాలేయాన్ని నిర్విషీకరణ చేస్తుంది.