రాత్రిపూట తొందరగా నిద్రపట్టాలంటే ఇలా చేయండి..!
సారాంశం
పొద్దంతా పనిచేసినా.. చేయకపోయినా రాత్రి నిద్ర ప్రతి ఒక్కరికీ అవసరమే. నిద్రలేకపోతే అలసట, చిరాకు, పగటిపూట నిద్రపోవడం, ఇమ్యూనిటీ పవర్ తగ్గడం, అధిక రక్తపోటు వంటి ఎన్నో సమస్యలు వస్తాయి.
మనుషులకు నిద్ర అవసరం కాదు అత్యవసరం. అవును నిద్రతోనే మన శరీరం తిరిగి శక్తివంతంగా మారుతుంది. శరీర అవయవాలను రిపేర్ చేస్తుంది. కంటినిండా నిద్రలేకపోతే శారీరక ఆరోగ్యంతో పాటుగా మానసిక ఆరోగ్యం కూడా ప్రభావితం అవుతుంది. కంటినిండా నిద్రపోతే గుండె జబ్బులు, ఊబకాయం, మధుమేహం వంటి ఎన్నో రోగాల ముప్పు తప్పుతుంది. నిద్ర ఒత్తిడిని కూడా తగ్గిస్తుందని ఎన్నో అధ్యయనాలు కనుగొన్నాయి.
రాత్రిపూట సరిగా నిద్రపోకపోతే పగటి పూట నిద్రపోతారు. పగటిపూట నిద్ర అలవాటైతే మీకు రాత్రిళ్లు ఏం చేసినా నిద్ర రాదు. పగటి పూట నిద్ర జీవక్రియను తగ్గిస్తుంది. ఎన్నో సమస్యలను తెచ్చిపెడుతుంది. మీకు తెలుసా కంటినిండా నిద్రపోకపోతే అలసట, చిరాకు, రోగనిరోధక శక్తి బలహీనపడటం, అధిక రక్తపోటు, మానసిక ఒత్తిడి వంటి ఎన్నో సమస్యలు వస్తాయి. అంతేకాదు కళ్ల చుట్టూ నల్లటి వలయాలు కూడా ఏర్పడతాయి. అయితే కొన్ని చిట్కాలను పాటిస్తే మీరు రాత్రిళ్లు హాయిగా పడుకుంటారు. అవేంటంటే..
- సరైన సమయానికి పడుకోవడం అలవాటు చేసుకోవాలి. అప్పుడే నిద్ర తొందరగా పడుతుంది. అందుకే రాత్రి నిద్రపోవడానికి ఒక నిర్దిష్ట సమయాన్ని నిర్ణయించుకోండి. ఎప్పుడు పడుకోవాలి? ఎప్పుడు లేవాలో షెడ్యూల్ ను తయారుచేసి పెట్టుకోండి.
- రాత్రి పడుకోవడానికి రెండు గంటల ముందు మొబైల్ ఫోన్, టెలివిజన్ వంటి ఎలక్ట్రానిక్ గాడ్జెట్లను ఉపయోగించడం మానుకోండి.
- లైట్ ఆఫ్ చేసి నిద్రపోవడం అలవాటు చేసుకోండి. లైట్ నిద్రకు భంగం కలిగిస్తుంది.
- రాత్రి పడుకునే ముందు అతిగా తింటే సరిగ్గా నిద్రపట్టదు. అందుకే పడుకోవడానికి 2-3 గంటల ముందు లిమిట్ లో తినండి.
- రాత్రిపూట వేయించిన, నూనె, కారంగా ఉండే ఆహారాలను తినకపోవడమే మంచిది. ఎందుకంటే ఇవి కూడా నిద్రకు భంగం కలిగిస్తాయి.
- ఒత్తిడి కూడా మనకు నిద్రపట్టకుండా చేస్తుంది. అందుకే ఒత్తిడి తగ్గేందుకు యోగా, ధ్యానం చేయండి.
- వ్యాయామం కూడా నిద్రబాగా పట్టేలా చేస్తుంది. అందుకే క్రమం తప్పకుండా వ్యాయామం చేయండి.
మంచి నిద్రకు సహాయపడే కొన్ని ఆహారాలు
రెగ్యులర్ గా పడుకునే ముందు గ్లాస్ గోరువెచ్చని పాలను తాగడం అలవాటు చేసుకోండి. ఎందుకంటే పాలు బాగా నిద్రపట్టడానికి సహాయపడతాయి. అలాగే అరటిపండ్లు, కివి, గుమ్మడికాయ విత్తనాలు, బాదం, ఓట్స్, తేనె వంటి ఆహారాలు కూడా మీరు రాత్రి హాయగా పడుకోవడానికి సహాయపడతాయి.