వయస్సు, జెనెటిక్స్, ఆండ్రోజెన్ హార్మోన్ మార్పుల వల్లే బట్టతల వస్తుంది. ఆడవారికి తల మధ్యభాగంలో వెంట్రుకలు ఊడిపోయి బట్టతల వస్తే.. చాలా మంది ఆడవారికి నుదిటి దగ్గర ఎంట్రుకలు బాగా ఊడిపోతుంటాయి. అయితే దీన్ని కొన్ని సింపుల్ టిప్స్ తో తగ్గించుకోవచ్చు.
జుట్టు రాలడం చాలా సహజం. మగవాళ్లు, ఆడవాళ్లంటూ తేడా లేకుండా ప్రతి ఒక్కరికీ జుట్టు ఊడిపోతుంటుంది. రోజూ 50 వెంట్రుకలు ఊడిపోవడం సహజమే. వీటి స్థానంలో కొత్త వెంట్రుకలు వస్తాయి. అయితే ఇంతకు మించి జుట్టు ఊడిపోతుంటే మాత్రం జాగ్రత్త పడాల్సిందే. ఎందుకంటే ఇది హెయిర్ ఫాల్ సమస్య కాబట్టి. జుట్టు ఒత్తుగా ఉండేనే ముఖం అందంగా కనిపిస్తుంది. ఆడవారికి పొడవాటి జుట్టు, మగవాళ్లకు ఒత్తైన జుట్టు ఉంటే మరింత అందంగా కనిపిస్తారు. కానీ నేడు చాలా మంది చిన్న వయసులోనే బట్టతల సమస్య బారిన పడుతున్నారు. కేవలం మగవారే కాదు ఆడవారు కూడా నుదుటి బట్టతలతో బాధపడుతున్నారు. దీనివల్ల ఆడవారు బయటకు వెళ్లేందుకు కూడా ఇష్టపడరు.
వయసు పెరగడం, వంశపారంపర్యం, ఆండ్రోజెన్ హార్మోన్ మార్పులే బట్టతలకి ప్రధాన కారణాలని నిపుణులు అంటున్నారు. ఈ సమస్య బారిన పడకూడదంటే చిన్న వయసు నుంచే జుట్టును సంరక్షించుకునే ప్రయత్నం చేయాలి. ముఖ్యంగా పౌష్టికాహారం తినడం, వారానికి ఒకసారి తలస్నానం చేయడం, నెత్తిని శుభ్రం చేయడం చేస్తే బట్టతల బారిన పడే ప్రమాదం ఉండదు. మరి బట్టతల రాకుండా ఉండేందుకు ఏం చేయాలో ఇప్పుడు తెలుసుకుందాం పదండి.
ఆడవారు నుదుటిపై బట్టతల సమస్య నుంచి బయటపడాలంటే వారానికి ఒక్కసారైనా కలబంద జెల్ ను నెత్తికి పెట్టి.. తలస్నానం చేయాలి. కలబందలో ఉండే పోషకాలు జుట్టు, నెత్తిమీద పీహెచ్ స్థాయిలను సమతుల్యం చేసి జుట్టు రాలడాన్ని తగ్గిస్తాయి.
జుట్టు సంరక్షణకు మెంతులు కూడా ఒక బెస్ట్ నేచురల్ రెమెడీ. అవెును మీ జుట్టు పెరగడానికి లేదా జుట్టు రాలకుండా నియంత్రించడానికి కూడా మెంతులు సహాయపడతాయి. ఇందుకోసం మెంతులను బాగా నానబెట్టాలి. తర్వాత దీన్ని మెత్తగా గ్రైండ్ చేసి తలకు అప్లై చేయాలి. గంట తర్వాత తలస్నానం చేయాలి. ఇది తలను చల్లగా ఉంచుతుంది. అలాగే జుట్టు రాలడాన్ని తగ్గించడానికి సహాయపడుతుంది. అలాగే మెంతులను రాత్రంతా నీళ్లలో నానబెట్టి వడకట్టి నీటిని తాగడం వల్ల శరీరం, జుట్టు రెండూ ఆరోగ్యంగా ఉంటాయి.
మీ జుట్టు బాగా పెరగడానికి లేదా బట్టతలలో వెంట్రుకలు మొలవాలంటే మాత్రం విటమిన్ సి ఎక్కువగా ఉండే ఉసిరిని ఉపయోగించండి. ఉసిరికాయ. కొబ్బరి నూనె, చిన్న ఉల్లిపాయలు, కరివేపాకు వేసి బాగా మరిగించాలి. ఈ నూనెను ఆడవారు రోజూ ఉపయోగిస్తే జుట్టు ఒత్తుగా పెరుగుతుంది.
జుట్టు ఒత్తుగా పెరగడానికి గుడ్డులోని తెల్లసొన బాగా ఉపయోగపడుతుంది. ఈ తెల్లసొనను తీసుకుని దీన్ని జుట్టు మూలాలకు బాగా పట్టించి 30 నిమిషాల తర్వాత తలస్నానం చేయండి. దీనిలో ఉండే పోషకాలన్నీ జుట్టును నేచురల్ గా మెయింటైన్ చేయడానికి సహాయపడతాయి.
వీటితో పాటుగా ఎక్కువ కెమికల్స్ లేని షాంపూలను మాత్రమే వాడాలి. సాధ్యమైనంత వరకు షాంపూలకు బదులుగా మెంతులను ఉపయోగించండి. దీనివల్ల మీ జుట్టు ఆరోగ్యంగా పెరుగుతుంది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి