పాలేరు అసెంబ్లీ నియోజకవర్గం చుట్టే మాజీ మంత్రి తుమ్మల నాగేశ్వరరావు రాజకీయం కొనసాగుతుంది. తాజాగా కేసీఆర్ ప్రకటించిన బీఆర్ఎస్ జాబితాలో పాలేరు టిక్కెట్టు తుమ్మల నాగేశ్వరరావుకు దక్కలేదు.
మాజీ మంత్రి తుమ్మల నాగేశ్వరరావు పాలేరు అసెంబ్లీ కేంద్రంగా రాజకీయాలు కొనసాగిస్తున్నారు. 2009 ఎన్నికల తర్వాత తుమ్మల నాగేశ్వరరావు పాలేరు అసెంబ్లీపై కన్నేశారు. 2016లో ఈ స్థానం నుండి తుమ్మల నాగేశ్వరరావు విజయం సాధించారు. 2018 అసెంబ్లీ ఎన్నికల్లో పాలేరు అసెంబ్లీ స్థానం నుండి బీఆర్ఎస్ అభ్యర్ధిగా పోటీ చేసి ఓటమి పాలయ్యారు.
2023 ఎన్నికల్లో పాలేరు అసెంబ్లీ స్థానం నుండి బీఆర్ఎస్ అభ్యర్ధిగా పోటీ చేయాలని తుమ్మల నాగేశ్వరరావు ప్లాన్ చేసుకున్నారు. కానీ, కేసీఆర్ మాత్రం తుమ్మల నాగేశ్వరరావుకు షాకిచ్చారు. పాలేరు నుండి సిట్టింగ్ ఎమ్మెల్యే కందాల ఉపేందర్ రెడ్డికే కేసీఆర్ బీఆర్ఎస్ టిక్కెట్టును కేటాయించారు. దీంతో ఈ నెల 22న మాజీ మంత్రి తుమ్మల నాగేశ్వరరావు వర్గీయులు సమావేశమయ్యారు.
ఉమ్మడి ఆంధ్రప్రదేశ్ రాష్ట్రంలో 2009 అసెంబ్లీ ఎన్నికల్లో ఖమ్మం అసెంబ్లీ స్థానం నుండి తుమ్మల నాగేశ్వరరావు టీడీపీ అభ్యర్ధిగా పోటీ చేసి విజయం సాధించారు. అయితే 2009 అసెంబ్లీ ఎన్నికల తర్వాత పాలేరు అసెంబ్లీ నియోజకవర్గంపై తుమ్మల నాగేశ్వరరావు ఫోకస్ పెట్టారు. 2014 ఎన్నికల్లో పాలేరు అసెంబ్లీ స్థానం నుండి పోటీ చేయాలని తుమ్మల నాగేశ్వరరావు ప్లాన్ చేసుకున్నారు
2014 ఎన్నికల్లో పాలేరు సీటు కోసం తుమ్మల నాగేశ్వరరావు ప్రయత్నించారు. అయితే పాలేరులో తుమ్మల నాగేశ్వరరావు పోటీ చేయడాన్ని అప్పటి ఖమ్మం ఎంపీ నామా నాగేశ్వరరావు వ్యతిరేకించారు. పాలేరు నుండి తన వర్గానికి చెందిన ఎంబీ స్వర్ణకుమారికి నామా నాగేశ్వరరావు టిక్కెట్టు ఇప్పించారు. అయితే దీంతో తుమ్మల నాగేశ్వరరావు అనివార్యంగా ఖమ్మం అసెంబ్లీ స్థానం నుండి టీడీపీ అభ్యర్థిగా పోటీ చేశారు. అయితే ఈ ఎన్నికల్లో ఖమ్మం నుండి కాంగ్రెస్ అభ్యర్థిగా బరిలోకి దిగిన పువ్వాడ అజయ్ కుమార్ చేతిలో తుమ్మల నాగేశ్వరరావు ఓటమి పాలయ్యాడు.
2014 లో ఎన్నికలు పూర్తైన తర్వాత రాష్ట్ర విభజన జరిగింది. ఈ సమయంలో తెలంగాణలో కేసీఆర్ నాయకత్వంలో బీఆర్ఎస్ అధికారం కైవసం చేసుకుంది. టీడీపీలో ఉన్న సమయంలో తుమ్మల నాగేశ్వరరావు, కేసీఆర్, బొజ్జల గోపాలకృష్ణారెడ్డి మధ్య మంచి స్నేహం ఉండేది. దీంతో కేసీఆర్ తుమ్మల నాగేశ్వరరావును బీఆర్ఎస్ లోకి ఆహ్వానించారు.
తుమ్మల నాగేశ్వరరావు కూడ కేసీఆర్ ఆఫర్ ను మన్నించి బీఆర్ఎస్ లో చేరారు. కేసీఆర్ తన మంత్రివర్గంలోకి తుమ్మల నాగేశ్వరరావును తీసుకున్నారు. అయితే ఆయన అప్పటికి ఎమ్మెల్యే కాదు. దీంతో ఆయనకు ఎమ్మెల్సీని కట్టబెట్టారు కేసీఆర్.
2014 అసెంబ్లీ ఎన్నికలు జరిగిన కొంత కాలానికే పాలేరు నుండి ప్రాతినిథ్యం వహిస్తున్న మాజీ మంత్రి రాంరెడ్డి వెంకట్ రెడ్డి అనారోగ్యంతో మృతి చెందాడు. దీంతో పాలేరు అసెంబ్లీ స్థానానికి ఉప ఎన్నిక జరిగింది.ఈ ఉప ఎన్నికల్లో పాలేరు నుండి తుమ్మల నాగేశ్వరరావు బీఆర్ఎస్ అభ్యర్ధిగా పోటీ చేసి కాంగ్రెస్ అభ్యర్థి రాంరెడ్డి వెంకట్ రెడ్డి సతీమణిపై విజయం సాధించారు.
2018 అసెంబ్లీ ఎన్నికల్లో బీఆర్ఎస్ అభ్యర్ధిగా తుమ్మల నాగేశ్వరరావు పోటీ చేసి కాంగ్రెస్ అభ్యర్ధి కందాల ఉపేందర్ రెడ్డి చేతిలో ఓటమి పాలయ్యారు. పాలేరులో తుమ్మల నాగేశ్వరరావు ఓటమి చెందడం రాజకీయంగా ఆయనకు ఇబ్బందికర పరిస్థితులు తెచ్చి పెట్టింది. పాలేరు నుండి కాంగ్రెస్ నుండి విజయం సాధించిన కందాల ఉపేందర్ రెడ్డి బీఆర్ఎస్ లో చేరారు. దీంతో పాలేరులో తుమ్మల నాగేశ్వరరావు, కందాల ఉపేందర్ రెడ్డి వర్గాలుగా బీఆర్ఎస్ చీలిపోయిన పరిస్థితి నెలకొంది.
ఈ ఏడాది చివర్లో జరిగే అసెంబ్లీ ఎన్నికల్లో పాలేరు నుండి పోటీకి తుమ్మల నాగేశ్వరరావు రంగం సిద్దం చేసుకుంటున్నారు. అయితే ఈ నెల 21న ప్రకటించిన జాబితాలో తుమ్మల నాగేశ్వరరావుకు చోటు దక్కలేదు. సిట్టింగ్ ఎమ్మెల్యే కందాల ఉపేందర్ రెడ్డికి సీటు దక్కడంతో తుమ్మల నాగేశ్వరరావు ఏ రకమైన నిర్ణయం తీసుకుంటారనేది సర్వత్రా ఆసక్తి నెలకొంది.
మాజీ మంత్రి తుమ్మల నాగేశ్వరరావుకు బీజేపీ, కాంగ్రెస్ పార్టీల నుండి ఆహ్వానాలు అందినట్టుగా ప్రచారం సాగుతుంది. అయితే తుమ్మల నాగేశ్వరరావు ఏ పార్టీ వైపు మొగ్గుచూపుతారనేది ప్రస్తుతం చర్చ సాగుతుంది. అయితే ఏ పార్టీలో చేరినా పాలేరు అసెంబ్లీ స్థానం నుండి పోటీ విషయమై ప్రధానంగా తుమ్మల నాగేశ్వరరావు దృష్టి కేంద్రీకరించినట్టుగా సమాచారం.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి