గూగుల్‌లో వాటి కోసం వెతుకుతున్నారా.? టెంప్ట్‌ అయితే అంతే సంగతులు..

మారుతోన్న టెక్నాలజీతో పాటు నేరాల తీరు కూడా మారుతోంది. ప్రజల అత్యాశ, అవసరాన్ని ఆసరగా మార్చుకొని కేటుగాళ్లు డబ్బులు కాజేస్తున్నారు. తాజాగా ఇలాంటి ఓ మోసం వెలుగులోకి వచ్చింది. గూగుల్‌ సెర్చ్‌ ఇంజన్‌ను ఉపయోగిస్తున్న వారిని టార్గెట్‌ చేసుకొని ఈ మోసాలు జరుగుతున్నాయి. ఇందుకు సంబంధించిన పూర్తి వివరాలు ఇప్పుడు తెలుసుకుందాం..   

ఏ చిన్న సమాచారం కావాలన్నా ప్రతీ ఒక్కరూ చేసే పని వెంటనే జేబులో నుంచి స్మార్ట్‌ ఫోన్‌ తీసి గూగుల్‌లో సెర్చ్‌ చేయడం. రాకెట్‌ నుంచి వంటింటి చిట్కాల వరకు సమస్త సమాచారం గూగుల్‌లో లభిస్తోంది. ఏదైనా కొత్త ప్రదేశానికి వెళ్లే ముందు అక్కడ ఏయే ప్రదేశాలు ఉన్నాయి.? హోటల్స్‌ వివరాలు ఇలా అన్ని గూగుల్‌లోనే చూసే రోజులు వచ్చేశాయ్‌. ఇదిగో దీనినే తమకు అనుకూలంగా మార్చుకొని కొందరు కేటుగాళ్లు రెచ్చి పోతున్నారు. తాజాగా ఇలాంటి ఓ ఘటన వెలుగులోకి వచ్చింది. 

రిసార్ట్‌ పేరుతో.. 

ఇటీవల సంక్రాంతి సెలవులు వచ్చిన విషయం తెలిసిందే. సెలవుల్లో టూరిజం ప్రదేశాలకు వెళ్లాలనుకునే వారిని టార్గెట్‌ చేసుకున్న కేటుగాళ్లు నకిలీ వెబ్‌సైట్స్‌ను రూపొందించారు. ఏపీలోని సూర్యలంక బీచ్‌ రీసార్ట్‌ పేరుతో గూగుల్‌లో సెర్చ్‌ చేయగా వచ్చిన వెబ్‌సైట్‌లో రూమ్స్‌ బుకింగ్‌ చేసుకున్నారు. బీచ్‌కు వెళ్లి రిసార్ట్‌లో రూమ్‌ బుకింగ్‌ గురించి అడగ్గా అదంతా ఫేక్‌ అని తెలిసిపోయింది. 

దీంతో మోసపోయామని తెలుసుకున్న సదరు వ్యక్తులు పోలీసులకు ఫిర్యాదు చేశారు. అయితే ఇలాంటి మోసాలు కామన్‌గా మారాయని చాలా మంది కనీసం ఫిర్యాదు కూడా చేయడం లేదని చెబుతున్నారు. గడిచిన మూడు రోజుల్లో పోలీసుల దృష్టికి ఇలాంటి సంఘటనలు వచ్చినట్లు తెలిపారు. గూగుల్ సెర్చ్‌ చేసే విషయంలో జాగ్రత్తగా ఉండాలని నిపుణులు చెబుతున్నారు. ముఖ్యంగా డబ్బులు చెల్లించేవి ఉంటే ఒకటికి రెండు సార్లు ఆలోచించుకోవాలని అంటున్నారు. 

ఎలా గుర్తించాలి.? 

గూగుల్‌లో ఏదైనా సమాచారం కోసం వెతికే సమయంలో కొన్ని జాగ్రత్తలు తీసుకోవాలి. ముఖ్యంగా అధికారిక వెబ్‌సైట్స్‌నే సందర్శించాలి. మీరు వెతుకుతోన్న వెబ్‌సైట్ యూఆర్‌ఎల్‌ను ఒకటికి రెండు సార్లు క్షుణ్నంగా గమనించాలి. అదే విధంగా డబ్బులు చెల్లించి బుకింగ్స్‌ చేసుకోవాల్సి ఉంటే. సదరు వెబ్‌సైట్‌లో పేర్కొన్న మొబైల్ నెంబర్స్‌కి కాల్‌ చేసి క్రాస్‌ చెక్‌ చేసుకోవాలి. ఫోన్‌ నెంబర్లు పనిచేట్లేదంటే ఆలోచించుకోవాల్సిందే. 

ఇక మొబైల్ యాప్స్‌ను డౌన్‌లోడ్‌ చేసుకునే సమయంలో కూడా జాగ్రత్తలు పాటించాలి. ఎట్టి పరిస్థితుల్లో గూగుల్‌ నుంచి ఏపీకే ఫైల్స్‌ను డౌన్‌లోడ్‌ చేసుకోకూడదు. వీలైనంత వరకు ప్లే స్టోర్‌ నుంచి డౌన్‌లోడ్‌ చేసుకోవాలి. గూగుల్‌లో ట్రెండింగ్‌లో ఉన్న అంశాలను సెలక్ట్‌ చేసుకొని అలాంటి నకిలీ వెబ్‌సైట్స్‌ను క్రియేట్‌ చేస్తున్నారు. ఇక అన్ని విషయాల్లో గూగుల్‌ను గుడ్డిగా నమ్మకూడదు. 

గూగుల్‌లో సెర్చ్‌ చేసిన వెబ్‌సైట్స్‌లో మీ వ్యక్తిగత వివరాలను అందించకూడదు. అలాగే మీ డెబిట్‌ కార్డు, లేదా క్రెడిట్‌ కార్డు వివరాలను ఎట్టి పరిస్థితుల్లో ఇవ్వకూడదు. మీరు వెతుకుతోన్న బ్యాంక్‌ లేదా సంస్థకు సంబంధించిన అధికారిక వెబ్‌సైట్‌నే సందర్శించాలి. ఒకవేళ మీ ఖాతాలో డబ్బులు పోయినా, సైబర్ నేరం బారిన పడినట్లు ఏమాత్రం అనుమానం వచ్చినా వెంటనే 1930 నంబర్‌కు ఫిర్యాదు చేయాలి. గంటల వ్యవధిలో ఫోన్‌ చేసి ఫిర్యాదు చేస్తే మీ డబ్బులను హోల్డ్‌ చేసే అవకాశాలు ఉంటాయి.