Adithya Ashok : రజినీ వీరాభిమాని రా.. తగ్గేదే లే ! కివీస్ టీమ్లో మనోడి రచ్చ !
Who Is Adithya Ashok : భారత్-న్యూజిలాండ్ వన్డే సిరీస్లో ఆడుతున్న ఆదిత్య అశోక్ హాట్ టాపిక్ గా మారాడు. తమిళనాడులో పుట్టి కివీస్ జట్టులో చేరిన ఈ యువ స్పిన్నర్ రజినీకాంత్ వీరాభిమాని. ఆదిత్య కెరీర్, భారత్తో ఉన్న సంబంధం వివరాలు ఇక్కడ తెలుసుకుందాం.
2026 సంవత్సరంలో టీమిండియా తన ప్రయాణాన్ని అప్పుడే ప్రారంభించింది. ప్రస్తుతం భారత్, న్యూజిలాండ్ జట్ల మధ్య వడోదరలో మూడు మ్యాచ్ల వన్డే (ODI) సిరీస్లో భాగంగా మొదటి మ్యాచ్ జరుగుతోంది. ఈ మ్యాచ్లో భారత కెప్టెన్ శుభ్మన్ గిల్ టాస్ గెలిచి ముందుగా బౌలింగ్ చేయాలని నిర్ణయించుకున్నాడు.
టీమిండియా ప్లేయింగ్ ఎలెవన్లో ఫాస్ట్ బౌలర్ అర్షదీప్ సింగ్కు చోటు దక్కలేదు. ప్రధాన కోచ్ గౌతమ్ గంభీర్, కెప్టెన్ శుభ్మన్ గిల్.. అర్షదీప్ స్థానంలో ప్రసిద్ధ్ కృష్ణపై నమ్మకం ఉంచారు. మరోవైపు, న్యూజిలాండ్ ప్లేయింగ్ ఎలెవన్లో చాలా కొత్త పేర్లు కనిపిస్తున్నాయి, వీరి గురించి క్రికెట్ అభిమానులకు పెద్దగా సమాచారం తెలియదు. వారిలో ఒకరే ఈ ఆదిత్య అశోక్.
భారత్పై తన మొదటి మ్యాచ్ ఆడుతున్న ఆదిత్య అశోక్ న్యూజిలాండ్ తరఫున ఇప్పుడిప్పుడే స్పిన్నర్గా మంచి గుర్తింపు సాధిస్తున్నాడు. ప్రస్తుతం 23 ఏళ్ల వయసున్న ఈ ఆటగాడిని, ఇప్పటికే కివీస్ తరఫున ఆడిన భారత సంతతి బౌలర్ ఈష్ సోధీతో పోల్చుతున్నారు. అంతేకాకుండా, ఈ యువ స్పిన్నర్ను సోధీకి వారసుడిగా కూడా పరిగణిస్తున్నారు. ఈష్ సోధీ లాగానే ఆదిత్య అశోక్కు కూడా భారత్తో ప్రత్యేకమైన అనుబంధం ఉంది.