Vastu Tips: ఇంట్లో తులసి మొక్క ఏ దిక్కులో ఉండాలో తెలుసా?

Tulsi Plant Vastu Tips: పవిత్రమైన తులసి మొక్క ఇంటికి ఎంతో మేలు చేస్తుందని చాలామంది నమ్ముతారు. అయితే అసలు తులసి మొక్కని ఇంట్లో ఎక్కడ పెట్టాలో మీకు తెలుసా? వాస్తు శాస్త్రం ప్రకారం ఏ దిక్కులో తులసి మొక్క పెంచితే ఎలాంటి ఫలితాలు వస్తాయో ఇప్పుడు తెలుసుకుందాం.

తులసి మొక్క హిందువులకు ఎంతో పవిత్రమైనది. దాదాపు ప్రతి ఇంట్లోనూ తులసి మొక్క ఉంటుంది. ఉదయం, సాయంత్రం అక్కడ దీపారాధన చేసి పూజిస్తారు. తులసి మొక్క పచ్చగా ఉంటే ఇంట్లో ఆనందం ఉంటుందని, లక్ష్మీదేవి కటాక్షం కలుగుతుందని నమ్ముతారు.

సరైన దిశలో, సరైన స్థలంలో తులసి మొక్కను పెంచితే ఇంట్లో సానుకూల శక్తి పెరుగుతుంది. డబ్బు కొరత ఉండదని, ఇంటిల్లిపాది ఆనందంగా, ఆరోగ్యంగా ఉంటారని వాస్తు పండితులు చెబుతున్నారు. మరి డబ్బు, అదృష్టం కోసం తులసి మొక్కని ఇంట్లో ఎక్కడ పెట్టాలో ఇప్పుడు తెలుసుకుందాం.

తులసి మొక్కన ఏ దిశలో పెట్టాలి..

వాస్తు ప్రకారం తులసి మొక్కని ఇంటి ముంగిట లేదా మధ్యలో పెట్టాలి. ఉత్తరం, ఈశాన్య దిక్కులో కూడా పెట్టి పూజించవచ్చు. ఒకవేళ మీరు బాల్కనీలో లేదా కిటికీలో పెట్టాలనుకుంటే ఉత్తరం లేదా ఈశాన్య దిశలో పెట్టాలని వాస్తు పండితులు సూచిస్తున్నారు. 

తులసి మొక్కని ఈ దిశలో పెట్టకూడదు

వాస్తు ప్రకారం తులసి మొక్కని దక్షిణ దిశలో పెట్టకూడదు. అలా చేస్తే పితృదేవతలకు కోపం వస్తుందట. దక్షిణ దిశలో యమధర్మరాజు ఉంటారు కాబట్టి లక్ష్మీదేవికి కూడా కోపం వచ్చి ఇంట్లో ధనం నిలవదట. దీనివల్ల పేదరికంతో బాధపడాల్సి వస్తుందని పండితులు చెబుతున్నారు. 

ఇది కూడా చదవండి: ఈ 5 చోట్ల దీపాలు పెట్టిన వారికి సడన్‌గా డబ్బు లభిస్తుంది

శుభ్రంగా ఉంచండి

తులసి ఉన్న ఇంట్లో డబ్బు, శ్రేయస్సు, ఆనందం, ప్రశాంతత ఉంటాయి. తులసి పవిత్రమైనది కాబట్టి ఆ ప్రదేశం శుభ్రంగా ఉండాలి. చెత్త వంటివి ఉండకూడదు.

తులసి మొక్కని నేలలో నాటకూడదు

తులసి మొక్కని నేలలో నాటడం అశుభం. మీ పనులకు మంచి ఫలితాలు రావాలంటే ఒక కుండీలో నాటాలి. తులసి దగ్గర ముళ్ళ మొక్కలు పెట్టకూడదు. వంటగది బయట తులసి ఉంటే వైవాహిక జీవితం ఆనందంగా ఉంటుంది. తులసి మొక్కకి తప్పకుండా సూర్యరశ్మి తగిలేలా చూసుకోవాలి.

జాగ్రత్తగా సంరక్షించాలి

తులసి మొక్కని జాగ్రత్తగా పెంచాలి. అనవసరంగా విరిచి పారేయకూడదు. మొక్క ఎండిపోకుండా జాగ్రత్తగా చూసుకోవాలి. వాస్తు ప్రకారం తులసిని సరిగ్గా సంరక్షించకపోతే దురదృష్టం కలుగుతుందని వాస్తు నిపుణులు చెబుతున్నారు.