జీవితంలో ఎప్పుడో ఒకసారి ప్రేమలో పడటం చాలా కామన్. ఇక ప్రేమించిన వారితో జీవితాంతం కలిసి ఉండాలంటే వారికి మీ ప్రేమ విషయాన్ని చెప్పేయాలి. అయితే జీవితాంతం ఒకరికి తోడుగా ఉండే జంట పెళ్లికి ముందే ఒకరి గురించి ఒకరు పూర్తిగా తెలుసుకోవడం ముఖ్యం. లేదంటే జీవితంలో ఎన్నో సమస్యలను ఫేస్ చేయాల్సి వస్తుంది.
పెళ్లి అనేది చాలా పెద్ద నిర్ణయం. ఎందుకంటే లైఫ్ మొత్తం మీరు వారితోనే జీవించాలి మరి. అందుకే ఇలాంటి నిర్ణయం తీసుకోవడానికి తొందరపడకూడదు. లేకపోతే మీరు మీ నిర్ణయానికి పశ్చాత్తాపపడాల్సి ఉంటుంది. లుక్స్, మనీ, మంచి ఫ్యామిలీ, జాబ్... రిలేషన్ షిప్ లో ఇవన్నీ అవసరమే. కానీ సంతోషకరమైన వైవాహిక జీవితానికి ఇవి మాత్రమే సరిపోవు. మీరు కూడా ఎవరితోనైనా రిలేషన్ షిప్ లో ఉండి.. అతనితో భవిష్యత్తు గురించి కలలు కంటుంటే, ప్రపోజ్ చేసే ఆలోచన కూడా ఉంటే.. మీరు కొన్ని విషయాల్లో క్లారిటీ తెచుకోవాలి?
అనుకూలతను తనిఖీ చేయడం
మీ సంబంధాన్ని ముందుకు తీసుకెళ్లాలని ఆలోచిస్తుంటే మీ భాగస్వామి కూడా ఇందుకు సానుకూలంగానే ఉన్నాడా. ఈ విషయంలో ఇద్దరి కెమిస్ట్రీ కంటే అనుకూలత చాలా అవసరం. ప్రేమ బంధంలో ఇది చాలా ముఖ్యమైన విషయం కూడా. పెళ్లికి పునాకి ఇదే అని చెప్పొచ్చు. ఇది మీ బంధాన్ని బలోపేతం చేస్తుంది. అనుకూలత అంటే మీ ఇద్దరికీ ఒకే రకమైన ఆలోచనలు, ఆసక్తులు, అభిరుచులు ఉండటం. ప్రతి విషయంలో మీకంటే భిన్నమైన అభిప్రాయం ఉన్న వ్యక్తితో మీరు ఎలా లైఫ్ ను లీడ్ చేస్తారు. ఇలా మీ భాగస్వామి ఉంటే.. ఒకటికి రెండు సార్లు పెళ్లికి ప్రపోజ్ చేసే ముందు ఆలోచించండి. ఎందుకంటే దీనివల్ల మీ ఇద్దరి మధ్య తరచూ మనస్పర్థలు వస్తాయి. మీ భాగస్వామి చెప్పిందే మీరు చేయాల్సి వస్తది. కాబట్టి మీకు అనుకూలంగా.. అంటే మీ ఇద్దరి ఆలోచనలు ఒకేవిధంగా ఉన్న వ్యక్తితో జీవితాన్ని పంచుకుంటే మంచిది.
భావాలను అర్థం చేసుకోవడం
ప్రపోజ్ చేసే ముందు ప్రేమకు, ఆకర్షణకు మధ్య తేడా తెలుసుకోవడం చాలా చాలా ముఖ్యం. చాలా సార్లు ఒకరి లుక్స్, ఒకరి తెలివితేటలు, ఒకరి వ్యక్తిత్వానికి ఆకర్షితులవుతాం. కానీ దీని ఆధారంగా కలిసి జీవితాన్ని గడపాలని నిర్ణయించుకోలేం. వివాహం అనేది దీర్ఘకాలిక నిబద్ధత. అదుకే పెళ్లికి అడుగులు వేయడానికి తొందరపడకండి.
ఆర్థిక స్థిరత్వాన్ని గమనించండి
వివాహం తర్వాత బాధ్యతలు కొద్దిగా పెరుగుతాయి. దీని వల్ల చాలాసార్లు గొడవలు కూడా వస్తాయి. కాబట్టి ప్రపోజ్ చేసే ముందు ఆర్థిక స్థిరత్వాన్ని చూడటం చాలా ముఖ్యం. పెళ్లైన తర్వాత భాగస్వామి కుటుంబాన్ని కూడా ఆదుకోవాలి అనుకుంటే అది సాధ్యమవుతుందా? లేదా? అని ఒకసారి కూర్చొని ఆలోచించండి. దీని గురించి చర్చించండి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి