బాబోయ్... డ్రిల్ సరిగా చేయలేదని చావచితగ్గొట్టాడు.. ఎన్ సీసీ జూనియర్లపై సీనియర్ల దాష్టీకం.. వీడియో వైరల్..

ఎన్ సీసీ ట్రైనింగ్ లో జూనియర్లను ఓ సీనియర్ చావచితగ్గొట్టాడు. దీనికి సంబంధించిన వీడియో సోషల్ మీడియాలో వైరల్ గా మారింది. 

థానే: మహారాష్ట్రలోని థానేలో దారుణమైన వీడియో వెలుగు చూసింది. ఓ కాలేజీలో ఎన్ సీసీ విద్యార్థులపై సీనియర్లు దాష్టీకం ప్రదర్శించారు. వర్షం నీటిలో కాలివీళ్లు, తలసహాయంతో వంగేలా చేశారు. పట్టుతప్పినా.. వారు చెప్పిన పొజిషన్ లో వంగకపోయినా దుడ్డుకర్రతో వారిని దారుణంగా చావబాదారు. 

దీనికి సంబంధించిన వీడియో వైరల్ కావడంతో కలకలం చెలరేగింది. దీనిమీద కాలేజీ ప్రిన్సిపల్ ను వివరణ కోరగా తమకు ఈ విషయం తెలియదన్నాడు. ఈ వీడియోలో వర్షం నీటిలో ఎనిమిది మంది యువకులు పుష్-అప్ పొజిషన్‌లో వంగి కనిపించారు. బ్యాలెన్స్ కోసం చేతులు ఉపయోగించనివ్వడం లేదు. బురద మట్టిలో తలను పెట్టి.. చేతులు తలమీద వెనక్కి పెట్టారు. ఆ తరువాత బురదలోనే వారిని అలాగే ఉండేలా చూస్తున్నాడు ఓ సీనియర్. 

వారు అలా ఉండలేక కదిలితే... కర్రతో ఇష్టరీతిన పశువుల్ని బాదినట్టు చితకబాదాడు.  శిక్షణలో ఉన్న నేషనల్ క్యాడెట్ కార్ప్స్ (NCC) సభ్యులు పాల్గొన్న ఈ సంఘటనకు సంబంధించిన వీడియో సోషల్ మీడియాలో వైరల్ గా మారింది. ముంబై సమీపంలో ఉన్న థానేలోని బందోద్కర్ కాలేజీలో ఎన్‌సీసీ శిక్షణలో ఇది జరిగింది.

వీడియోలో కర్ర పట్టుకున్న వ్యక్తి సీనియర్ ఎన్‌సీసీ క్యాడెట్‌గా గుర్తించారు. డ్రిల్‌ను నిర్వహించలేకపోయినందుకు ఎన్‌సిసి క్యాడెట్‌లను ఇలా చితగ్గొట్టాడు. దీంతో కొందరు క్యాడెట్లు  ఏడుస్తూ కనిపించారు. 

కాలేజీకి చెందిన ఓ విద్యార్థి కిటికీ వెనుక నుంచి ఈ వీడియో తీశాడు. ఈ విషయాన్ని సీరియస్‌గా తీసుకున్నట్లు కళాశాల ప్రిన్సిపాల్‌ సుచిత్రానాయక్‌ తెలిపారు. అలాంటి ప్రవర్తనను సహించబోమని, సీనియర్ విద్యార్థిపై చర్యలు తీసుకుంటామని ఆమె తెలిపారు.

"అతను ఎన్‌సిసి విద్యార్థి. ఈ ఘటన మీద చర్య తప్పనిసరిగా తీసుకుంటాం. అయితే ఈ సందర్భంగా గుర్తుంచుకోవాల్సింది ఏంటంటే... ఇక్కడ ఎన్‌సిసి ద్వారా చాలా మంచి పని జరిగింది. అది కూడా చెప్పాలనుకుంటున్నాను" అని ఆమె అన్నారు. దాదాపు 40 ఏళ్లుగా ఇక్కడ ఎన్‌సీసీ శిక్షణ జరుగుతోందని.. టీచర్ లేని సమయంలో ఈ ఘటన జరిగిందని.. ఆ విద్యార్థి చేసిన పని కేవలం మానసిక రోగులు మాత్రమే చేయగలరని ఈ చర్య చూస్తే అర్థమవుతోందని ప్రిన్సిపాల్ తెలిపారు.