వింటేజ్ లవ్ స్టోరీస్ మనల్ని మళ్లీ పాతకాలంలోకి తీసుకెళ్తాయి. అప్పటి తీపి గుర్తులను గుర్తు చేసుకుంటాయి. ఒక అద్భుతమైన ఫీలింగ్ని అందిస్తాయి. నవ్విస్తాయి, కవ్విస్తాయి. భావోద్వేగానికి గురి చేస్తాయి. అయితే వాటిని అంతే సహజంగా, అంతే బాగా తెరకెక్కిస్తేనే. లేదంటే చిరాకు తెప్పించడం ఖాయం. ఇటీవల వస్తోన్న చాలా సినిమాలు ఇలానే ఉంటాయి. ఆకట్టుకునే చిత్రాలు ఒకటి అర మాత్రమే ఉంటాయి. ఆ కోవలో `దూరదర్శని` మూవీ కొంత పాజిటివ్ సైడ్ ఉంటుందని చెప్పొచ్చు. ఇది కూడా అప్పటి రోజులను గుర్తు చేస్తుంది. మనకు టీవీ లేని రోజుల్లో దూరదర్శని ఒక్కటే టీవీ ఉన్న రోజుల్లో ఊర్లో అందరు దాని వద్దకు వెళ్లి చూస్తారు, అక్కడే చాలా ప్రేమ కథలు పుడతాయి. ఈ సినిమాలో అదే మెయిన్గా చూపించారు. దీంతో అప్పటి రోజుల్లోకి వెళ్లొచ్చిన ఫీలింగ్ కలుగుతుంది. టీవీకి యాంటినా ఉండటం, సిగ్నల్ సరిగా రాక దాన్ని కదిలించడం వంటి సన్నివేశాలు ఆకట్టుకుంటాయి. ఇక హరి వన్ సైడ్ లవ్ కూడా మనకు అప్పటి రోజులను గుర్తు చేస్తుంది. వాణికి హరిపై ఇష్టం ఉన్నా, ఆమె చెప్పలేకపోవడం, ఆయనకోసం ఆమె కూడా టీవీ వద్దకు రావడం, ఇద్దరూ చూపులతోనే ప్రేమించుకోవడం వంటి సన్నివేశాలు ఆకట్టుకుంటాయి. హీరో పాత్ర తీరుతెన్నులు ఉదయ్ కిరణ్ సినిమాలను గుర్తు చేస్తుంది. ఫస్టాఫ్ అంతా వీరి లవ్ స్టోరీ, హీరో ఫ్రెండ్స్ చేసే అల్లరితో సాగుతుంది. అలాగే హీరో ఫ్యామిలీ పరిస్థితిని ఎస్టాబ్లిష్ చేశారు. ఇంటర్వెల్ ఉత్కంఠ భరితంగా సాగుతుంది. సీరియస్ వైపు టర్న్ తీసుకుంటుంది.
ఇక సెకండాఫ్ అంతా సీరియస్గా సాగుతుంది. ప్రేమ కోసం వీరిద్దరు తప్పించడం, ప్రేమ విషయం తెలిసి పెద్ద వాళ్లు దూరం పెట్టడం, ముఖ్యంగా హీరోయిన్ అన్న వార్నింగ్ ఇవ్వడం, కులం పేరుతో ఊర్లో గొడవలు జరగడం వంటి సన్నివేశాలతో ఉత్కంఠభరితంగా సాగుతుంది. క్లైమాక్స్ ఎమోషనల్గా ఉంటుంది. లావణ్య రెడ్డి, జెమినీ సురేష్ జంటకి సంబంధించిన సీన్లు భావోద్వేగానికి గురి చేస్తాయి. ఆ తర్వాత పరువు హత్యలను తలపిస్తుంది. కథ విషాదాంతంగా ముగింపు పలికి, ఆ తర్వాత ఇచ్చిన ట్విస్ట్ మాత్రం అదిరిపోయింది. సినిమా మొత్తానికి అది హైలైట్గా నిలుస్తుంది. హృదయాన్ని కదిలిస్తుంది. అయితే మూవీలో స్వచ్ఛమైన ప్రేమ కథని చూపించిన తీరు బాగుంది. ఇప్పుడు లవ్ స్టోరీలు అంటే లిప్ లాక్లు, పబ్లు, రొమాన్స్ ప్రధానంగా నడుస్తోన్న నేపథ్యంలో అప్పట్లో స్వచ్ఛమైన ప్రేమకి, త్యాగానికి, పోరాటానికి ప్రతీకగా ఇది నిలుస్తుంది. కొంత కామెడీ నవ్విస్తుంది, లవ్ స్టోరీని ఆకట్టుకుంది. ఎమోషన్స్ హృదయాన్ని హత్తుకుంటాయి. అయితే మూవీ చాలా స్లోగా సాగుతుంది. కథ మాత్రమే కాదు, డైలాగ్లు, నటీనటుల ప్రదర్శన కూడా అప్పటి మాదిరిగానే ఉండటం కొంత మైనస్గా చెప్పొచ్చు. కథనం చాలా స్లోగా సాగుతుంది. అక్కడక్కడే తిరుగుతుంది. చాలా డైలాగ్లు రొటీన్గా ఉంటాయి. మరోవైపు భారీ డైలాగులు ఉన్నా, ఆ స్థాయిలో సన్నివేశాలు లేకపోవడం కొంత మైనస్గా చెప్పొచ్చు. కులానికి సంబంధించిన అంశాలు ఆకట్టుకున్నాయి. వాటి వల్ల ఎంత నష్టం ఉంటుందో కళ్లకి కట్టినట్టు చూపించిన చిత్రమిది.
