బైసన్ మూవీ తెలుగు రివ్యూ, రేటింగ్.. విక్రమ్ కొడుకు మూవీ ఎలా ఉందంటే?
హీరో విక్రమ్ ప్రయోగాత్మక చిత్రాలతో మెప్పిస్తోన్న విషయం తెలిసిందే. ఇప్పుడు ఆయన కొడుకు ధృవ్ విక్రమ్ హీరోగా అలరించేందుకు వస్తున్నాడు. తాజాగా ఆయన హీరోగా నటించిన `బైసన్` మూవీ తెలుగులో విడుదలైంది. మరి సినిమా ఎలా ఉందంటే?
`అపరిచితుడు` సినిమా మన తెలుగు ఆడియెన్స్ ని ఎంతగా ఆకట్టుకుందో తెలిసిందే. అందులో విక్రమ్ నటనకు అంతా ఫిదా అవుతారు. ఆ తర్వాత కూడా అనేక చిత్రాలతో విక్రమ్ మన తెలుగు ఆడియెన్స్ ని అలరిస్తూనే ఉన్నారు. ఇప్పుడు ఆయన కొడుకు ధృవ్ విక్రమ్ కూడా నాన్న దారిలోనే వస్తున్నాడు. అతని సినిమాలు కూడా తెలుగులో విడుదల చేస్తున్నారు. తాజాగా `బైసన్` మూవీతో ఆడియెన్స్ ముందుకు వచ్చాడు ధృవ్. ఇది తమిళంలో గత వారమే(అక్టోబర్ 17న) విడుదలై మంచి స్పందన రాబట్టుకుంది. దాదాపు నలభై కోట్లు అక్కడ వసూలు చేసింది. ఈ శుక్రవారం తెలుగులో విడుదల చేశారు. మారి సెల్వరాజ్ దర్శకత్వం వహించిన ఈ మూవీలో అనుపమా పరమేశ్వరన్ హీరోయిన్గా నటించింది. లాల్, పశుపతి, అమీర్, రాజిషా విజయన్, అళగం పెరుమాల్, అరువి మధన్, అనురాగ్ అరోరా వంటి వారు ముఖ్య పాత్రలు పోషించారు. అప్లాజ్ ఎంటర్టైన్మెంట్స్, నీలం స్టూడియోస్ సంయుక్తంగా నిర్మించాయి. సమీర్ నాయర్, దీపక్ సెగల్, పా రంజిత్, అదితి ఆనంద్ నిర్మాతలు. శుక్రవారం విడుదలైన ఈ సినిమా తెలుగు ఆడియెన్స్ కి కనెక్ట్ అయ్యిందా? విక్రమ్ కొడుకు అదరగొట్టాడా? అనేది రివ్యూలో తెలుసుకుందాం.