Kitchen Hacks: మిక్సీ జార్ ఎక్కువ కాలం వాడాక వాటి బ్లేడ్లు మొద్దుబారిపోవడం జరుగుతుంది. అలాంటప్పుడు ఇంట్లో ఉండే పదార్థంతోనే ఆ బ్లేడ్లకు పదును పెట్టవచ్చు. దీనికి ఏమీ ఖర్చు కాదు కూడా.
వంటగదిలో ఉండే ఎలక్ట్రానిక్ వస్తువుల్లో మిక్సీ ఒకటి. రోజూ చట్నీలు, మసాలాలు రుబ్బడానికి దీన్ని వాడుతూనే ఉంటాం. ఇలా ఎక్కువ కాలం పాటూ వాడటం వల్ల మిక్సీ బ్లేడ్లు మొద్దుబారిపోతాయి. అప్పుడు ఏం చేయాలో తెలియక కంగారు పడతారు. రుబ్బుతున్నా పదార్థాలు మెత్తగా అవ్వవు. దీనివల్ల మోటార్పై భారం పడుతుంది. బ్లేడ్లు మొద్దుబారగానే మెకానిక్ దగ్గరకు తీసుకెళ్లాల్సిన అవసరం లేకుండా ఇంట్లోని ఒకే ఒక్క వస్తువుతో బ్లేడ్లకు మళ్లీ పదును పెట్టొచ్చు.
24
ఇలా చేయండి
మిక్సీ జార్ బ్లేడ్లను పదును పెట్టేందుకు రాతి ఉప్పు లేదా కల్లుప్పు వాడాలి. ఇది మార్కెట్లో చాలా తక్కువ ధరకు లభిస్తుంది. కల్లుప్పుతో మీరు జార్ బ్లేడ్ను చాలా తేలికగా పదును పెట్టవచ్చు. ఇది ఒక అద్భుతమైన స్క్రబ్బర్లా పనిచేస్తుంది. మిక్సీ జార్ బ్లేడ్కు పదును పెట్టాలంటే ఆ జార్లో కల్లుప్పు వేయండి. బ్లేడ్లు మునిగిపోయే వరకు ఉప్పు నింపాలి. తర్వాత మూత గట్టిగా పెట్టి మిక్సీ స్విచ్ ఆన్ చేయండి. మిక్సీని ఒకేసారి కాకుండా, ఆపుతూ ఆన్ చేస్తూ తిప్పాలి. చివరిగా, రెండు నిమిషాల పాటు మిక్సీని హై స్పీడ్లో తిప్పండి. దీంతో ఉప్పు పూర్తిగా పొడి అవుతుంది. ఇలా ఉప్పును మిక్సీ పట్టడం వల్ల, ఉప్పు రాపిడికి బ్లేడ్లు కత్తిలా పదునెక్కుతాయి.
34
అల్యూమినియం ఫాయిల్ తో
కల్లుప్పు వాడడం ఇష్ట లేకపోతే, అల్యూమినియం ఫాయిల్ కూడా వాడొచ్చు. అల్యూమినియం ఫాయిల్ను చిన్న చిన్న ఉండలుగా చేసి మిక్సీ జార్లో వేయండి. ఒక నిమిషం పాటు మిక్సీని వేగంగా తిప్పండి. ఫాయిల్ ముక్కలకు, బ్లేడ్లకు మధ్య జరిగే ఘర్షణ వల్ల మొద్దుబారిన బ్లేడ్ల అంచులు పదునెక్కుతాయి.
జార్లో ఉప్పు లేదా అల్యూమినియం ఫాయిల్ వేసి బాగా తిప్పిన తర్వాత జార్ను శుభ్రం చేయడం మర్చిపోవద్దు. అయితే పొడి చేసిన ఉప్పును వంటకు తిరిగి వాడుకోవచ్చు. జార్ నుండి ఉప్పు తీసేశాక, నీళ్లు, కొద్దిగా డిష్వాష్ జెల్ వేసి ఒకసారి మిక్సీని తిప్పండి. ఆ తర్వాత శుభ్రమైన నీటితో జార్ను కడగండి. జార్ను బోర్లించి ఆరబెట్టండి. బ్లేడ్లపై నీరు ఉంటే, అవి తుప్పు పట్టే ప్రమాదం ఎక్కువగా ఉంటుంది.
