Parenting: ప్రతి కూతురి జీవితంలో తండ్రి ప్రత్యేకమైన వ్యక్తి. ఆమెకు ధైర్యాన్ని ఇచ్చేది, ఆత్మవిశ్వాసాన్ని పెంచేది, ఎలా ముందుకు సాగాలో నేర్పేది చాలా సందర్భాల్లో తండ్రే. అయితే కూతురి భవిష్యత్ కోసం ప్రతి తండ్రి వదులుకోవాల్సిన 5 అలవాట్లు ఏంటో చూద్దాం.
కూతురి జీవితంలో తండ్రి పాత్ర కీలకమైంది. ఒక అమ్మాయికి తండ్రే మొదటి హీరో, గురువు, రక్షకుడు. తండ్రి ఎలా మాట్లాడతాడు, ఎలా ప్రవర్తిస్తాడు, సమస్యలను ఎలా ఎదుర్కొంటాడు అనే విషయాలను కూతురు చిన్నప్పటి నుంచే గమనిస్తూ ఉంటుంది. అందుకే తండ్రి అలవాట్లు కూతురి వ్యక్తిత్వంపై, ఆత్మవిశ్వాసంపై, భవిష్యత్ సంబంధాలపై ప్రభావం చూపుతాయి. అందుకే ప్రతి తండ్రి తన కూతురి భవిష్యత్ కోసం కొన్ని అలవాట్లను మార్చుకోవడం అవసరం. అవేంటో చూద్దాం.
26
కోపంగా అరవకూడదు
చాలామంది తండ్రులు పిల్లలు తప్పు చేసినప్పుడు ప్రేమగా వివరించడానికి బదులు గట్టిగా అరుస్తారు. అలా తరచూ కోపంగా మాట్లాడటం వల్ల కూతురిలో భయం పెరుగుతుంది. తండ్రితో తన మనసులోని విషయాలను పంచుకోవడానికి వెనుకాడుతుంది. చిన్నతనంలో ఏర్పడిన ఈ భయం పెద్దయ్యాక కూడా కొనసాగవచ్చు. తప్పు చేసినప్పుడు శిక్షించడం కంటే, ఎందుకు తప్పు జరిగిందో అర్థమయ్యేలా చెప్పడం వల్ల పిల్లల్లో బాధ్యత పెరుగుతుంది.
36
తల్లిని తక్కువ చేసి మాట్లాడకూడదు
భార్యాభర్తల మధ్య అభిప్రాయ భేదాలు ఉండటం సహజం. అయితే వాటిని పిల్లల ముందు ప్రదర్శించడం మంచిది కాదు. ముఖ్యంగా తండ్రి తల్లిని అవమానించడం లేదా ఆమెను చిన్నచూపు చూడడం కూతురిపై తీవ్రమైన ప్రభావం చూపుతుంది. కుటుంబంలో మహిళలకు గౌరవం లేదనే భావన ఆమెలో ఏర్పడే అవకాశం ఉంటుంది. భవిష్యత్తులో ఇతరులు తనను కూడా అలాగే చూడడం సహజమేనని ఆమె అనుకోవచ్చు.
నువ్వు అమ్మాయివి, నువ్వు చేయలేవు అనే మాటను అస్సలు అనకూడదు. చిన్న మాట కూడా పిల్లల ఆత్మవిశ్వాసాన్ని దెబ్బతీయగలదు. అమ్మాయి కాబట్టి కొన్ని పనులు చేయలేవని చెప్పడం కంటే, ప్రయత్నించమని ప్రోత్సహించడం మంచిది. తండ్రి తన కూతురి సామర్థ్యాన్ని నమ్మి ప్రోత్సహిస్తే, ఆమె కూడా జీవితంలో పెద్ద లక్ష్యాలను చేరుకోవడానికి ధైర్యంగా ముందుకు సాగుతుంది.
56
కఠినత్వం వద్దు
క్రమశిక్షణ అవసరమే కానీ అది ప్రేమతో కలిసినప్పుడు మాత్రమే మంచి ఫలితాలు ఇస్తుంది. ప్రతి విషయంలో ఆంక్షలు విధించడం, ప్రశ్నలు అడగనివ్వకపోవడం లేదా ఆమె అభిప్రాయాలకు విలువ ఇవ్వకపోవడం వల్ల తండ్రి కూతురు మధ్య దూరం పెరుగుతుంది. కాలానికి అనుగుణంగా ఆలోచించడం, కూతురి భావాలను వినడం, సరైన విషయాల్లో స్వేచ్ఛ ఇవ్వడం కూడా తల్లిదండ్రుల బాధ్యతే.
66
స్వతంత్రంగా ఆలోచించే అవకాశం ఇవ్వకపోవడం
ప్రతి చిన్న సమస్యకు వెంటనే పరిష్కారం చెప్పడం లేదా అన్ని బాధ్యతలను తండ్రే తీసుకోవడం వల్ల పిల్లలు స్వతంత్రంగా ఆలోచించే అవకాశం కోల్పోతారు. బదులుగా సమస్యను అర్థం చేసుకోవడం, పరిష్కారం గురించి ఆమెనే ఆలోచించేలా ప్రోత్సహించడం, అవసరమైనప్పుడు మాత్రమే మార్గనిర్దేశం చేయడం మంచిది.
