మన ఆహారపు అలవాట్లు, జీవన శైలిలో మార్పులు క్యాన్సర్ ను ప్రభావితం చేస్తాయి. అయితే ఏ ఒక్క ఆహారం కూడా క్యాన్సర్ ను నిరోధించనప్పటికీ.. కొన్ని ఆహారాలు క్యాన్సర్ ప్రమాదాన్ని తగ్గిస్తాయి.
ప్రస్తుత కాలంలో మన దేశంలో క్యాన్సర్ అత్యంత సాధారణ వ్యాధుల్లో ఒకటిగా మారిపోయింది. క్యాన్సర్ ప్రాణాంతక వ్యాధి. దీన్ని ఫస్ట్ స్టేజ్ లో గుర్తించడం వల్ల ప్రాణాలకు ఎలాంటి ముప్పు ఉండదు. కానీ దీని లక్షణాలు అంత సులువుగా బయటపడవు. రోగం ముదిరినంకనే దీని లక్షణాలు కనిపిస్తాయి. అందుకే చాలా మంది క్యాన్సర్ తో చనిపోతున్నారు. ఆహారపు అలవాట్లు, జీవనశైలిలో మార్పులు క్యాన్సర్ ముప్పు నుంచి తప్పించుకోవచ్చు. అయితే ఏ ఒక్క ఆహారం కూడా నేరుగా క్యాన్సర్ ను నిరోధించనప్పటికీ.. ఆహారంలోని కొన్ని భాగాలు క్యాన్సర్ ప్రమాదాన్ని పెంచుతాయి, తగ్గిస్తాయి. కొన్ని ఆహారాలు క్యాన్సర్ ప్రమాదాన్ని తగ్గిస్తాయని పలు అధ్యయనాలు వెల్లడిస్తున్నాయి. ముఖ్యంగా యాంటీ ఆక్సిడెంట్లు ఎక్కువగా ఉండే ఆహారాలు క్యాన్సర్ ప్రమాదాన్ని తగ్గించడంలో సహాయపడతాయని అధ్యయనాలు చెబుతున్నాయి. కాబట్టి మీరు పండ్లు, కూరగాయలు, ఫైబర్ పుష్కలంగా ఉండే ఆహారాలను రోజూ తినండి. అయితే మాంసాహారం, స్వీట్లు, ఉప్పు, ఆయిలీ, ఫ్యాటీ ఫుడ్స్ ను మితంగా తీసుకోవడం మంచిది. వీటివల్ల క్యాన్సర్ రిస్క్ పెరుగుతుంది. అలాగే క్రమం తప్పకుండా వ్యాయామం చేయడం చాలా అవసరం. చలికాలంలో మీరు కొన్ని ఆహారాలను తింటే క్యాన్సర్ వచ్చే ప్రమాదం తగ్గుతుంది.
టమాటాలు
టమాటాలు కూడా క్యాన్సర్ ప్రమాదాన్ని తగ్గిస్తాయి. టమోటాలు క్యాన్సర్ కణాల పెరుగుదలను నివారించడానికి సహాయపడతాయని పలు అధ్యయనాలు వెల్లడిస్తున్నాయి. టమాటాల్లో ఉండే లైకోపీన్ క్యాన్సర్ ప్రమాదాన్ని తగ్గించడంతో పాటుగా ఎన్నో అనారోగ్య సమస్యలను తగ్గిస్తుంది.
పసుపు
పసుపు కూడా క్యాన్సర్ రిస్క్ ను తగ్గించగలదు. పసుపులో ఉండే కర్కుమిన్ అనే సమ్మేళనం క్యాన్సర్ కణాలను నాశనం చేస్తుంది. పసుపులో ఉండే యాంటీ బాక్టీరియల్, యాంటీ వైరల్, యాంటీ ఫంగల్ లక్షణాలు శరీర రోగనిరోధక శక్తిని పెంచడానికి సహాయపడతాయి.
బీన్స్
బీన్స్ లో ఎన్నో రకాల పోషకాలుంటాయి. వీటిలో పీచుపదార్థాలు పుష్కలంగా ఉంటాయి. ఇవి క్యాన్సర్ వచ్చే ప్రమాదాన్ని నివారిస్తాయని నిపుణులు చెబుతున్నారు. వీటిని మీ రోజు వారి ఆహారంలో చేర్చుకుంటే ఎన్నో అనారోగ్య సమస్యల ప్రమాదం తగ్గుతుంది.
వాల్ నట్స్
వాల్ నట్స్ లో ఒమేగా -3 కొవ్వు ఆమ్లాలు, ఫైటోస్టెరాల్, యాంటీ ఆక్సిడెంట్లు వంటి పోషకాలు పుష్కలంగా ఉంటాయి. ఈ బయోయాక్టివ్ కారకాలు క్యాన్సర్ ప్రమాదాన్ని తగ్గిస్తాయని నిపుణులు చెబుతున్నారు.
బ్రోకలి
ఆరోగ్య నిపుణుల అభిప్రాయం ప్రకారం.. బ్రోకలీని ఆహారంలో చేర్చుకోవడం వల్ల ఊపిరితిత్తుల క్యాన్సర్ ప్రమాదం తగ్గుతుందని నిపుణులు చెబుతున్నారు. బ్రోకలీలో ఉండే కొన్ని యాంటీఆక్సిడెంట్లు క్యాన్సర్ రిస్క్ ను తగ్గించడానికి సహాయపడతాయి.
వెల్లుల్లి
వెల్లుల్లిలో అల్లిసిన్ అనే సమ్మేళం ఉంటుంది. ఇది శరీరంలో ఇన్ఫెక్షన్లను తగ్గిస్తుంది. కణాలకు హాని కలిగించే ఫ్రీ రాడికల్స్ ను నివారిస్తుంది. మొత్తంగా వెల్లుల్లి క్యాన్సర్ ప్రమాదాన్ని తగ్గించడంలో సహాయపడుతుంది.