పదకొండు పదాల ఈ మెయిల్ తో 92యేల్ల వయసులో రుపర్ట్ ముర్డోచ్ తన నాలుగో భార్యకు విడాకులు ఇచ్చాడు. ఆ తరువాత కొద్ది రోజులకే ఐదో పెళ్లికి సిద్ధమయ్యాడు.
వాషింగ్టన్ : ఓ వ్యక్తి 92 ఏళ్ల వయసులో తన నాలుగో భార్యకు విడాకులు ఇచ్చాడు. అదేంటి ఈ వయసులో విడాకులు ఇవ్వడమేమిటి అని ఆశ్చర్యపోతున్నారా? ఆ విడాకులు ఇచ్చింది సాదాసీదా మనిషి కాదు మరి.. అమెరికా బిలినియర్, మీడియా మొగల్ గా ప్రసిద్ధిగాంచిన రుపర్ట్ ముర్డోచ్. ప్రస్తుతం ఆయనకు 92 ఏళ్ల వయసు. ఈ వయసులో తన నాలుగో భార్య అయిన 65 ఏళ్ల జెర్రీ హాల్ కు విడాకులు ఇచ్చాడు. 11 పదాలతో ఓ చిన్న ఈ మెయిల్ సందేశం చేసి ఆమెతో తెగతెంపులు చేసుకున్నాడు. ఈ మెయిల్ వచ్చే సమయంలో ఆమె ముర్దోచ్ కోసం ఇంట్లో ఎదురుచూస్తుంది.
ఇంతకీ ఆ 11 పదాల సందేశం ఏంటంటే.. ‘కచ్చితంగా మనం ఇద్దరం మంచి సమయం గడిపాం. అయితే, నేను ఇంకా చాలా చేయాల్సి ఉంది. నా న్యూయార్క్ లాయర్ తక్షణమే నిన్ను వచ్చి కలుస్తారు’ అని ఈ మెయిల్ చేశాడు. అలా ముర్డోచ్ కోసం ఎదురుచూస్తున్న జెర్రీకి విడాకుల సందేశం వచ్చింది. వీరిద్దరూ ఆరేళ్ల క్రితమే వివాహం చేసుకున్నారు. ముర్డోచ్ కు జెర్రీతో జరిగింది నాలుగో వివాహం. అయితే జెర్రీకి మాత్రం అంతకుముందు వివాహం కాలేదు. ఇదే మొదటిది. కాకపోతే రాక్ స్టార్ మిగ్ జాగర్ తో కొంతకాలం రిలేషన్షిప్ లో ఉంది.
అయితే, జెర్రీ, ముర్డోచ్ విడాకులు గతేడాది జూన్లో జరిగాయి. ఆ సమయంలో ఏం జరిగిందనేది తాజాగా జెర్రీ స్నేహితులు చెప్పుకొచ్చారు. ముర్డోచ్ పంపిన విడాకుల సందేశం చూసి జెర్రీ కోలుకోలేకపోయిందని.. ఆమె మైండ్ బ్లాంక్ అయిందని తెలిపారు. ఆ మెసేజ్ చూసిన తర్వాత ఆమెకు ఏం చేయాలో తెలియలేదు. కాలిఫోర్నియాలోని తన మాన్షన్ హౌస్ లో ఉన్న జెర్రీని 30 రోజుల్లో అక్కడి నుంచి వెళ్లిపోవాలని విడాకుల విషయం చెప్పిన తర్వాత ముర్డోచ్ గడువు ఇచ్చాడు. దీంతో జెర్రీ పరిస్థితి దారుణంగా తయారయిందని ఆమె స్నేహితులు వాపోయారు.
ముర్డోచ్ కు ఆరుగురు సంతానం. ఆయన ఆస్తి 14.5 బిలియన్ డాలర్లు. అయితే ఆరుగురు సంతానంలో ఒక్కరు కూడా జెర్రీకి పుట్టిన వారు కాదు. దీనివల్ల ముర్డోచ్ ఆస్తిలో ఆమెకు వాటా వచ్చే అవకాశమే లేదు. ముర్డోచ్, జెర్రీల వివాహం సెంట్రల్ లండన్ లో 2016లో ఘనంగా జరిగింది. ఈ విషయాన్ని ఆ సమయంలో ముర్డోచ్ ట్విట్టర్ వేదికగా వెల్లడించాడు. ఈ ప్రపంచంలోనే తాను అత్యంత అదృష్టవంతుడినని.. సంతోషకరమైన వ్యక్తిని అని ఆ సమయంలో ఆయన రాసుకొచ్చారు. ఇక ఆ తరువాత ట్విట్టర్లో తాను పోస్టులు పెట్టబోవడం లేదని కూడా ప్రకటించారు.
92 ఏళ్ల వయసులో నాలుగో భార్యకు విడాకులు ఇచ్చి సంచలనం సృష్టించిన ముర్డోచ్.. గత నెలలో మరో పెళ్లి చేసుకోబోతున్నట్లు ప్రకటించాడు. జెర్రీకి విడాకులు ఇచ్చి ఏడాది కూడా గడపక ముందే ఐదో పెళ్లికి సిద్ధపడ్డాడు. అన లెస్లే స్మిత్ నుపెళ్లి చేసుకోబోతున్నట్లుగా చెప్పాడు. ఏడు నెలల క్రితమే ఈమె పరిచయమైనట్లుగా తెలుస్తోంది. అయితే ఈ ప్రకటనలో మరో ట్విస్ట్ చోటు చేసుకుంది. ముర్డోచ్ ఐదో పెళ్లి అనుకోకుండా రద్దయింది. వీరి పెళ్లి ఆలోచన విరమించుకున్నట్లుగా తెలుస్తోంది. ముర్డోచ్ ది సన్, ది టైమ్స్ వంటి న్యూస్ పేపర్లు.. ఫాక్స్ న్యూస్, ది వాల్ స్ట్రీట్ జర్నల్ లాంటి మీడియా సంస్థలకు యజమాని. అమెరికాలో స్థిరపడ్డ ముర్డోచ్ ఆస్ట్రేలియాలో జన్మించారు. ప్రపంచవ్యాప్తంగా మీడియా మొగల్ గా గుర్తింపు పొందారు.