మీరు గ్రీన్ టీ ని రోజూ తాగుతరా? అయితే మీరు ఈ ముచ్చట తెలుసుకోవాల్సిందే..!

పాలు, పంచదార కలిపిన టీ కంటే గ్రీన్ టీనే మన ఆరోగ్యానికి చాలా చాలా మంచిది. ఎందుకంటే గ్రీన్ లో కేలరీలు, షుగర్ కంటెంట్ ఎక్కువగా ఉండదు. కెఫిన్ కూడా చాలా తక్కువగా ఉంటుంది. దీనివల్లే ప్రస్తుతం చాలా మంది పాల టీ కంటే గ్రీన్ టీనే ఎక్కువగా తాగుతున్నారు. 

ప్రస్తుతం చాలా మంది మిల్క్ టీ కంటే గ్రీన్ టీ నే ఎక్కువగా తాగుతున్నారు. కొంతమంది దీన్ని రెగ్యులర్ గా తాగుతుంటారు. క్రమం తప్పకుండా గ్రీన్ టీ తాగడం వల్ల ఎన్నో ఆరోగ్య ప్రయోజనాలు కలుగుతాయంటున్నారు ఆరోగ్య నిపుణులు. అధిక బరువును తగ్గించుకోవడానికి చాలా మంది గ్రీన్ టీ తాగుతుంటారు.గ్రీన్ టీలో పాలీఫెనాల్స్ అనే సమ్మేళనం పుష్కలంగా ఉంటుంది. ఇది శరీరాన్ని ఎన్నో వ్యాధుల నుంచి కాపాడుతుంది. ఈ యాంటీఆక్సిడెంట్ సమ్మేళనం అనేక రకాల పండ్లు, కూరగాయలు, ఇతర ప్రాసెస్ చేయని ఆహారాలలో ఉంటుంది. 

గ్రీన్ టీలో బయోయాక్టివ్ సమ్మేళనాలు అనే  ఫ్లేవనాయిడ్లు పుష్కలంగా ఉంటాయి. వీటిలో బలమైనవి కాటెచిన్స్, ఎపిగలోకాటెచిన్ గాలేట్. గ్రీన్ టీలో కెఫిన్ తో సహా అనేక సహజ ఉద్దీపనలు ఉంటాయి. అంతేకాదు గ్రీన్ టీ అమైనో ఆమ్లం ఎల్-థియానిన్ కూడా ఉంటుంది. గ్రీన్ టీలోని ప్రయోజనకరమైన పాలీఫెనాల్స్ మెదడుపై వృద్ధాప్యం ప్రభావాలను మందగించడానికి సహాయపడతాయి.

గ్రీన్ టీ జీవక్రియ రేటును పెంచుతుందని, శరీరంలో పేరుకుపోయిన కొవ్వును తగ్గించడానికి సహాయపడుతుందని కొన్ని పరిశోధనలు సూచిస్తున్నాయి. ఇది కెఫిన్, కాటెచిన్ వంటి మొక్కల సమ్మేళనాల ద్వారా అందించే సహజ థర్మోజెనిక్ లక్షణాలను కూడా కలిగి ఉంటుంది. గ్రీన్ టీ ఇన్సులిన్ సున్నితత్వాన్ని మెరుగుపరుస్తుంది. ఫలితంగా రక్తంలో చక్కెర స్థాయిలు నియంత్రణలో ఉంటాయని అధ్యయనాలు సూచిస్తున్నాయి.

గుండె జబ్బులు, స్ట్రోక్ వంటి గుండె జబ్బుల ప్రమాదాన్ని తగ్గించడానికి కూడా గ్రీన్ టీ ఉపయోగకరంగా ఉంటుందని పలు పరిశోధనలు సూచిస్తున్నాయి. ప్రతిరోజూ గ్రీన్ టీ తాగడం వల్ల శరీరంలో పేరుకుపోయిన చెడు కొలెస్ట్రాల్ కూడా తగ్గుతుంది.

గ్రీన్ టీలోని టానిన్లు శరీరంలోని ఎల్డిఎల్ కొలెస్ట్రాల్ ను తగ్గించడానికి సహాయపడతాయి. క్రమం తప్పకుండా గ్రీన్ టీ తాగడం వల్ల గుండె ఆరోగ్యంగా ఉంటుంది. గ్రీన్ టీ చర్మ సంరక్షణకు కూడా గ్రేట్ గా సహాయపడుతుంది. ఇందులో ఉండే యాంటీ ఆక్సిడెంట్లు చర్మాన్ని కాపాడతాయి.