చలికాలంలో పెరుగును తినొచ్చా?

చలికాలం మొదలైంది. చల్లని గాలులు మనల్ని ఎన్నో రోగాల బారిన పడేస్తాయి. అందుకే ఈ సీజన్ లో మనల్ని మనం రక్షించుకోవడం చాలా ముఖ్యం. సీజన్ మారినప్పుడల్లా మనం తినే ఆహారం కూడా మార్చాలని ఆరోగ్య నిపుణులు చెబుతున్నారు.   

చలికాలం వచ్చేసింది. ఈ సీజన్ లో మనం తినే ఆహారం, చర్మం, జుట్టు మొదలైన వాటిపై తగిన ఎంతో శ్రద్ధ తీసుకోవాలి. లేదంటే మన చర్మం, వెంట్రుకలు నిర్జీవంగా మారుతాయి. అలాగే చలినుంచి మనల్ని మనం రక్షించుకోవాలి. ఈ సీజన్ లో వేడివేడి పదార్థాలు తినడం చాలా మంచిదని నిపుణులు చెబుతున్నారు. సీజన్ మారినప్పుడల్లా మనం తినే ఆహారం విషయంలో చాలా జాగ్రత్తగా ఉండాలి. అయితే ఈ సీజన్ లో పెరుగును తినకూడదని చాలా మంది అంటుంటారు. ఎందుకంటే పెరుగుకు చలువ చేసే గుణం ఉంటుంది. ఈ సీజన్ లో పెరుగు తిన్నా, మజ్జిగను తాగినా  జలుబు, జ్వరం, గొంతునొప్పి వంటి సమస్యలు వస్తాయని నమ్ముతారు. మరి దీనిపై నిపుణులు ఏమంటున్నారో ఇప్పుడు తెలుసుకుందాం.. 

పెరుగులో పోషకాలు

పెరుగులో మనల్ని ఆరోగ్యంగా ఉంచే ఎన్నో రకాల పోషకాలు ఉంటాయి. పెరుగు చెడు బ్యాక్టీరియాను తొలగించి మంచి బ్యాక్టీరియా సంఖ్యను పెంచుతుంది. దీనిలో ఎన్నో రకాల విటమిన్లు, ప్రోటీన్లు, మెగ్నీషియం, కాల్షియం, పొటాషియం ఎక్కువ మొత్తంలో ఉంటాయి. 

ఆయుర్వేదం ప్రకారం

ఆయుర్వేదం ప్రకారం.. చలికాలంలో పెరుగును తినకూడదు. ఎందుకంటే ఇది శ్లేష్మం, ఇతర గ్రంథుల స్రావాన్ని పెంచుతుంది. అంతేకాదు సైనసైటిస్, ఆస్తమా, జలుబు, దగ్గు, గొంతునొప్పి, జ్వరం వంటి సమస్యలను కూడా పెంచుతుంది. అందుకే ఈ సమస్యలున్నవారు దీనికి దూరంగా ఉండాలి. పెరుగును రాత్రిపూట అస్సలు తినకూడదు. 

సైన్స్ ప్రకారం

పెరుగులో మన గట్ కు అవసరమైన మంచి బ్యాక్టీరియా పుష్కలంగా ఉంటుంది. ఇది పులియబెట్టబడుతుంది. కాబట్టి పెరుగుతో పాటు పులియబెట్టిన ఆహారాలను తింటే మన రోగనిరోధక శక్తి పెరుగుతుంది. పెరుగులో విటమిన్ బి12, క్యాల్షియం,  ఫాస్పరస్ లు పుష్కలంగా ఉంటాయి. పెరుగును తినడం వల్ల మన ఆరోగ్యం బేషుగ్గా ఉంటుంది. అయితే శ్వాస సమస్యలతో బాదపడేవారు సాయంత్రం 5 గంటల తర్వాత పెరుగును తినకూడదు. లేదంటే జీర్ణ సమస్యలు వస్తాయి.

పెరుగులో విటమిన్ సి ఉంటుంది. ఇది జలుబును తగ్గించడానికి సహాయపడుతుందని చాలా మంది అంటున్నారు. అయితే ఇందుకోసం పెరుగును గదిఉష్ణోగ్రత వద్ద ఉంచడం మంచిది. మరీ చల్లని పెరుగును తింటే జలుబు ఎక్కువ అవుతుంది. 

ఆరోగ్య నిపుణుల అభిప్రాయం ప్రకారం..  పెరుగును కాలాలతో సంబంధం లేకుండా తినొచ్చు. చలికాలమని దీన్ని మొత్తమే పక్కన పెట్టాల్సిన అవసరం లేదు. అయితే చలికాలంలో పెరుగును తక్కువగా తినడం మంచిది. దగ్గు, జలుబు, జ్వరంతో బాధపడేవారు రిఫ్రిజిరేటర్ లో పెట్టిన పెరుగు కాకుండా గది ఉష్ణోగ్రత వద్ద ఉంచిన పెరుగును తినాలి.