ఫోన్ చూసి కళ్లు మసక బారుతున్నాయా? అయితే ఇలా చేయండి

ప్రస్తుతం డిజిటల్ పరికరాల వాడకం విపరీతంగా పెరిగిపోయింది. కంప్యూటర్లు, మొబైల్ ఫోన్లు, ట్యాబ్ ల వాడకం సర్వసాధారణం అయిపోయింది. అయితే, వాటి వల్ల ఎంత మేలు జరుగుతుందో.. హాని కూడా అదే స్థాయిలో ఉంటోంది. ప్రధానంగా కళ్ల సమస్య. చాలా వరకు డిజిటల్ స్క్రీన్లు చూసి చూసి కళ్లు అలిసిపోతున్నాయి. కొన్ని అలవాట్లు మార్చుకోవడం ద్వారా కళ్ల అలసటను ఈజీగా తగ్గించుకోవచ్చు. అవేంటో ఇప్పుడు చూద్దాం.

ప్రస్తుతం వయసుతో సంబంధం లేకుండా అందరు మొబైల్ ఫోన్లు, కంప్యూటర్లు, ట్యాబ్ లు వాడుతున్నారు. అయితే ఎక్కువసేపు వాటి స్క్రీన్ చూడటం కళ్లకు అంతమంచిది కాదు అంటున్నారు నిపుణులు. బ్లూ లైట్ ఎక్కువగా కంటిపై పడటం వల్ల కంటి సమస్యలు వస్తాయి. కళ్లు మసకబారడం, పొడిబారడం, కళ్ల కింద నల్లగా మారడం, తలనొప్పి లాంటి సమస్యలు తలెత్తుతాయి.

రాత్రి నిద్ర ముఖ్యం

కళ్ల అలసటను తగ్గించుకోవడానికి చాలా మార్గాలు ఉన్నాయి. వాటిలో ఒకటి బాగా నిద్రపోవడం. కళ్లు రిఫ్రెష్ అవ్వడానికి నిద్ర బాగా సాయపడుతుంది. రాత్రి బాగా నిద్రపోతే కళ్లు బాగా రిలాక్స్ అవుతాయి. రాత్రిపూట మొబైల్ వాడటం వల్ల కళ్లు అలసిపోతాయి. కాబట్టి ఆ టైంలో మొబైల్ వాడకం తగ్గిస్తే మంచిది.

గంటల కొద్దీ స్క్రీన్ టైం

ఉద్యోగరిత్యా చాలా మంది గంటల తరబడి కంప్యూటర్ ముందు కూర్చొని పనిచేస్తూ ఉంటారు. అలాంటి వారు కొంతసేపు లేచి నిలబడి స్ట్రెచ్ చేయడం మంచిది. వీలైతే కాసేపు ఎండలో గడపడం మంచిది. స్క్రీన్ టైం తగ్గించడం వల్ల కూడా కళ్లు కాస్త రిలాక్స్ అయ్యే అవకాశం ఉంటుంది.

కళ్లు బ్లింక్ చేయడం

కళ్లార్పకుండా ఎక్కువసేపు కంప్యూటర్ ముందు కూర్చున్నప్పుడు కళ్లు పొడిబారే ప్రమాదం ఉంటుంది. కాబట్టి తరచు కళ్లు బ్లింక్ చేయడం మంచిది. కళ్లు పొడిబారకుండా ఉండటానికి ఐ డ్రాప్స్ వాడొచ్చు. డాక్టర్ ని సంప్రదించి సరైన ఐ డ్రాప్స్ వాడాలి.

లైటింగ్ ఇలా ఉంటే మేలు

మన చుట్టూ ఉన్న లైటింగ్ కూడా కళ్ళ ఆరోగ్యంపై ప్రభావం చూపుతుంది. చదువుతున్నప్పుడు, రాస్తున్నప్పుడు లైట్ సరిగ్గా ఉండాలి. టేబుల్ దగ్గర కూర్చున్నప్పుడు షేడ్ లైట్ వాడటం మంచిది. టీవీ చూసేటప్పుడు రూమ్ లో లైట్ తక్కువగా ఉండాలి.