మెంతులు మన ఆరోగ్యానికి ఎన్నో విధాలుగా ఉపయోగపడతాయి. ఇవి కాస్త చేదుగా ఉంటాయని చాలా మంది వీటిని పక్కన పెడుతుంటారు. కానీ మొలకెత్తిన మెంతులను తింటే ఎన్ని లాభాలున్నాయో తెలుసా?
మెంతులు టేస్ట్ లో చేదుగా ఉంటాయి. కానీ వీటిలో ఎన్నో ఔషదగుణాలుంటాయి. ఇవి మన ఆరోగ్యానికే కాకుండా.. జుట్టు, చర్మ ఆరోగ్యానికి కూడా ఎంతో ప్రయోజనకరంగా ఉంటాయి. వీటితో చేసిన పేస్ట్ జుట్టుకు, ముఖానికి పెడుతుంటారు. ఇది అందరికీ తెలిసిన విషయమే. కానీ వీటిని మొలకలుగా కూడా తినొచన్న సంగతి మాత్రం చాలా మందికి తెలియదు. అవును మొలకెత్తిన మెంతులను తింటే ఎన్నో ఆరోగ్య ప్రయోజనాలు కలుగుతాయి. ఈ మొలకల్లో ఎన్నో రకాల పోషకాలు సమృద్ధిగా ఉంటాయి. మొలకెత్తిన మెంతుల్లో యాంటీ ఆక్సిడెంట్లు, విటమిన్ ఎ, విటమిన్ సి పుష్కలంగా ఉంటాయి.
మొలకెత్తిన మెంతుల్లో పుష్కలంగా ఉండే విటమిన్ సి మన ఇమ్యూనిటీ పవర్ ను పెంచడానికి బాగా సహాయపడుతుంది. ఈ మొలకలను ఉదయాన్నే తింటే మీ రోగనిరోధక శక్తి బలపడి మీరు ఎన్నో అంటువ్యాధులు, సీజనల్ వ్యాధులు, ఇతర రోగాలకు దూరంగా ఉంటారు.
మొలకెత్తిన మెంతుల్లో ఫైబర్ పుష్కలంగా ఉంటుంది. వీటిని మీ రోజువారి ఆహారంలో చేర్చుకోవడం వల్ల జీర్ణక్రియ మెరుగుపడుతుంది. మలబద్దకం సమస్య కూడా తగ్గిపోతుందని నిపుణులు చెబుతున్నారు. అంతేకాదు మొలకెత్తిన మెంతులను తింటే గుండెల్లో మంట, అసిడిటీ లు కూడా తగ్గిపోతాయి. భోజనానికి ముందు మొలకెత్తిన మెంతులను తింటే గుండెల్లో మంట రాదు. అందుకే జీర్ణ సమస్యలతో బాధపడే వారు మొలకెత్తిన మెంతులను తినొచ్చు.
డయాబెటీస్ పేషెంట్లు కూడా మొలకెత్తిన మెంతులను తినొచ్చు. ఎందుకంటే ఇవి రక్తంలో చక్కెర స్థాయిలను నియంత్రించడానికి బాగా సహాయపడతాయి. యాంటీ ఆక్సిడెంట్లు పుష్కలంగా ఉన్న మెంతులు చెడు కొలెస్ట్రాల్ ను తగ్గించడానికి బాగా సహాయపడతాయి. ఇవి గుండెను ఆరోగ్యంగా ఉంచడానికి సహాయడతాయి.
కాల్షియం, మెగ్నీషియం పుష్కలంగా ఉండే మొలకెత్తిన మొలకలను తినడం వల్ల ఎముకలు ఆరోగ్యంగా ఉంటాయి. మెంతుల్లో ఐరన్ పుష్కలంగా ఉంటుంది. వీటిని తింటే రక్తహీనత తగ్గుతుంది. మొలకెత్తిన మెంతుల్లో కేలరీలు చాలా తక్కువగా, ఫైబర్ ఎక్కువగా ఉంటుంది. వీటిని తింటే ఆకలి చాలా వరకు తగ్గుతుంది. దీంతో మీరు బరువు తగ్గుతారు. ఈ మొలకలు బెల్లీ ఫ్యాట్ ను తగ్గించడానికి కూడా బాగా సహాయపడతాయి. యాంటీ ఆక్సిడెంట్లు, విటమిన్లు పుష్కలంగా ఉండే మొలకెత్తిన మెంతులను తినడం వల్ల మీ చర్మం, జుట్టు ఆరోగ్యంగా ఉంటాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి