Milk: ఆ దేశంలో లీటర్ పాలు రూ. 400.. ఎందుకంత ఖరీదు? ఆ పాలల్లో స్పెషాలిటీ ఏంటి?
Milk: మన దేశంలో లీటరు పాలు రూ.50 నుంచి రూ.80 మధ్య లభిస్తుంటే, ఒక దేశంలో మాత్రం పాల ధర 400 రూపాయలు ఉంది. మన పాలకు వారి పాలకు తేడా ఏంటి? అక్కడ మాత్రమే ఆరేటు ఎందుకు? ఇంతకీ ఆ దేశం ఏదో తెలుసా? అక్కడ పాడి రైతులు చేస్తున్న అద్భుతాలేంటి?
లీటర్ పాలు 400కు దొరికే దేశం మరేదో కాదు తైవాన్. ఆ దేశంలోని చాంగ్హువా (Changhua) సిటీ దాని చుట్టుపక్కల ఉన్న గ్రామీణ ప్రాంతాలు, వ్యవసాయంలో రైతులు అద్భుతాలు చేస్తుంటారు.
తైవాన్ తూర్పు ఆసియాలో ఉన్న ఒక ద్వీప దేశం. వ్యవసాయం, ఆధునిక సాంకేతికత, పరిశ్రమలకు ఈ ప్రాంతం ప్రసిద్ధి. ముఖ్యంగా పాడి పరిశ్రమలో నాణ్యతకు ఎక్కువ ఇంపార్టెన్స్ ఇస్తారు. అక్కడ పాలను ఉత్పత్తి చేయడం దగ్గర నుంచి వినియోగదారులకు చేరవేసే వరకు అనేక నాణ్యత పరీక్షలు నిర్వహిస్తారు.
తైవాన్‌లో పచ్చిపాలను నాణ్యత ఆధారంగా ఏ, బీ, సీ, డీ అనే నాలుగు గ్రేడ్లుగా విభజిస్తారు. ముఖ్యంగా ఏ గ్రేడ్ పాలను మాత్రమే స్థానిక పాల ఉత్పత్తిదారులు తాజా పాల ఉత్పత్తులకు వినియోగిస్తారు. పాలలో బ్యాక్టీరియా స్థాయులు, సోమాటిక్ సెల్ కౌంట్ వంటి అంశాలను పరిశీలిస్తారు. తైవాన్‌లోని పల్లెటూర్లు మన దేశంలా కాకుండా అత్యంత అభివృద్ధి చెంది కనిపిస్తాయి. ఇక్కడ రైతులు తమ పొలాల్లో అత్యాధునిక టెక్నాలజీని, మెకానిజమ్స్ ఉపయోగిస్తారు.
భూమి దున్నడానికి, గడ్డి కట్ చేయడానికి ఆధునిక ట్రాక్టర్లు అందుబాటులో ఉంటాయి. పొలాల్లో నీటి సరఫరా కోసం ప్రభుత్వమే ప్రత్యేకంగా కాలువలు ఏర్పాటు చేసింది. ఎవరి పొలం హద్దులు వారికి స్పష్టంగా ఉండేలా కాంక్రీట్ లైనింగ్స్ వేసుకుంటారు, దీనివల్ల గొడవలకు తావు ఉండదు. ఇక్కడ రైతులు ఉల్లిపాయలు, బ్రోకలీ, బఠానీలు, క్యాబేజీ, మొక్కజొన్న , జామకాయలు వంటి పంటలను విరివిగా పండిస్తున్నారు.