నెలరోజుల్లోనే ఓటీటీలోకి వచ్చేసిన కమల్ హాసన్, మణిరత్నం డిజాస్టర్ మూవీ థగ్ లైఫ్.. స్ట్రీమింగ్ ఎందులో అంటే

లోక నాయకుడు స్టార్ కమల్ హాసన్, లెజెండరీ డైరెక్టర్ మణిరత్నం కాంబినేషన్ లో దాదాపు 38 ఏళ్ళ తర్వాత వచ్చిన చిత్రం ‘థగ్ లైఫ్’. గత నెల జూన్ 5న థియేటర్స్ లో ఈ చిత్రం రిలీజ్ అయింది. భారీ అంచనాల నడుమ రిలీజ్ అయిన ఈ చిత్రం దారుణంగా డిజాస్టర్ అయింది. కమల్ హాసన్ కెరీర్ లో బిగ్గెస్ట్ ఫ్లాప్ చిత్రాల్లో ఒకటిగా నిలిచింది. మణిరత్నం అయితే దర్శకుడిగా ట్రోలింగ్ ఎదుర్కొన్నారు.

థియేటర్స్ లో డిజాస్టర్ కావడంతో నెలరోజుల్లోనే ఈ చిత్రాన్ని ఓటీటీలో తీసుకువచ్చారు. ప్రస్తుతం ఈ చిత్రం నెట్ ఫ్లిక్స్ లో స్ట్రీమింగ్ మొదలయింది. నెట్‌ఫ్లిక్స్‌లో తెలుగు, తమిళం, మలయాళం, కన్నడ, హిందీ భాషల్లో స్ట్రీమింగ్ అవుతోంది.

ఈ చిత్రానికి విడుదల ముందు భారీ అంచనాలు ఏర్పడ్డాయి. కమల్ హాసన్ – మణిరత్నం కాంబినేషన్, ఏఆర్ రెహమాన్ సంగీతం, స్టార్ కాస్ట్ వంటి అంశాలు సినిమాపై ఆసక్తిని పెంచాయి. కమల్ హాసన్ తో పాటు ఈ చిత్రంలో స్టార్ హీరో శింబు కూడా నటించారు. అయితే విడుదలైన తర్వాత నెగటివ్ రివ్యూలు, మిశ్రమ స్పందన కారణంగా సినిమా బాక్సాఫీస్ వద్ద నిరాశపరిచింది.

థియేటర్లలో ఆకట్టుకోలేకపోయిన ఈ చిత్రానికి ఓటీటీలో ఎలాంటి రెస్పాన్స్ వస్తుంది అనే ఆసక్తి నెలకొంది. రాజ్ కమల్ ఫిలింస్ ఇంటర్నేషనల్, మద్రాస్ టాకీస్, రెడ్ జెయింట్ మూవీస్ సంస్థలు కలిసి ఈ చిత్రాన్ని నిర్మించాయి.

ఇక ఓటీటీలో విడుదల విషయంలో ఒక ఆసక్తికర అంశం వెలుగులోకి వచ్చింది. కథనాల ప్రకారం, థియేటర్ నుండి ఓటీటీకి సినిమాని ప్రదర్శించాలి అంటే ట్రాన్సిషన్‌ నిబంధనలు ఉంటాయి. ఈ నిబంధనల ప్రకారం థియేటర్ రిలీజ్, ఓటిటి రిలీజ్ కి 8 వారాల గ్యాప్ మైంటైన్ చేయాలి. కానీ ఈ చిత్రం నాలుగు వారాలకే ఓటిటిలో రిలీజ్ కావడంతో నిర్మాతలు థియేటర్స్ కి 25 లక్షల పెనాల్టీ చెల్లించాల్సి ఉన్నట్లు తెలుస్తోంది. నెట్ ఫ్లిక్స్ కూడా ఈ చిత్ర డిజిటల్ హక్కుల కోసం రూ. 135 కోట్లకు ఒప్పందం కుదుర్చుకోగా, చివరికి ఈ డీల్ విలువ రూ. 110 కోట్ల వరకు తగ్గించబడినట్టు సమాచారం.

ఈ చిత్రంలో కమల్ హాసన్‌తో పాటు త్రిష,  అభిరామి, జోజు జార్జ్, అశోక్ సెల్వన్ తదితరులు ముఖ్య పాత్రల్లో నటించారు. మణిరత్నం దర్శకత్వం వహించిన ఈ సినిమాకు ఏఆర్ రెహమాన్ సంగీతాన్ని అందించారు.ఈ చిత్రాన్ని దాదాపు 250 కోట్లకి పైగా బడ్జెట్ లో నిర్మించారు. కానీ బాక్సాఫీస్ వద్ద ఈ మూవీ 90 కోట్లు మాత్రమే రాబట్టింది. ఈ మూవీ ఎంత పెద్ద డిజాస్టర్ అనేది దీనిని బట్టే అర్థం చేసుకోవచ్చు.