శృతి హాసన్ ఇప్పటికే మూడు సినిమాల్లో స్పెషల్‌ సాంగ్‌ చేసింది. కానీ ఇప్పుడు ప్రాపర్‌ ఐటెమ్ సాంగ్‌తో రాబోతుందట. బిగ్ మాస్‌ హీరోతో లెగ్‌ షేక్‌ చేస్తుందట శృతి.
శృతి హాసన్ సినిమాల ఎంపికలో చాలా సెలక్టీవ్ గా ఉంటుంది. ఆమె సినిమా చేసిందంటే అది హిట్టే అనే టాక్‌ ఉంది. వరుస విజయాలతో గోల్డెన్‌ లెగ్‌ అనే ముద్ర కూడా పడింది. ఇటీవల ఆమె నటించిన `క్రాక్‌`, `వకీల్‌ సాబ్‌`, `వాల్తేర్‌ వీరయ్య`, `వీరసింహారెడ్డి` చిత్రాలు బ్లాక్‌ బస్టర్‌ అయ్యాయి. దీంతో శృతి హాసన్ పై అందరిలోనూ ఓ నమ్మకం, అంచనాలు ఏర్పడ్డాయి.
శృతి హాసన్ ఇప్పుడు ఐటెమ్ సాంగ్‌ చేయబోతుండటం విశేషం. ఇప్పటికే ఆమె `ఆగడు` సినిమాలో `జంక్షన్‌లో` నే పాట చేసింది. అలాగే హిందీలో `తేవర్‌` మూవీలో స్పెషల్‌ సాంగ్‌ చేసింది. ఇటీవల `హాయ్‌ నాన్న` చిత్రంలోనూ ఓ స్పెషల్‌ సాంగ్‌ లో మెరిసింది. కానీ అవేవీ పెద్దగా హిట్‌ కాలేదు. సినిమాలు ఆడకపోవడంతో అవి తేలిపోయాయి. ఈ నేపథ్యంలో ఇప్పుడు తెలుగులో మరో ప్రాపర్‌ ఐటెమ్ సాంగ్‌ చేస్తుందట శృతి హాసన్.
ఓ బిగ్ స్టార్‌తో కలిసి ఆమె లెగ్‌ షేక్‌ చేస్తుందట. ఆ హీరో ఎవరో కాదు మెగాస్టార్ చిరంజీవి. అవును చిరంజీవితో ఆమె మరోసారి లెగ్‌ షేక్‌ చేయబోతుంది. ఇప్పటికే `వాల్తేర్‌ వీరయ్య` చిత్రంలో ఈ ఇద్దరు జంటగా నటించారు. అందులో ఈ ఇద్దరు చేసిన డాన్సులు ఫ్యాన్స్ ని ఆకట్టుకున్నాయి. పాటలు పెద్ద హిట్‌ అయ్యాయి. ఆ మ్యాజిక్‌ని ఇప్పుడు ఐటెమ్ సాంగ్‌ రూపంలో రెట్టింపు చేయబోతున్నారట.
ప్రస్తుతం చిరంజీవి `విశ్వంభర` చిత్రంలో నటిస్తున్నారు. సోషియో ఫాంటసీ చిత్రమిది. భారీ బడ్జెట్‌తో, విజువల్‌ గ్రాండియర్‌గా దీన్ని తెరకెక్కిస్తున్నారు. హనుమంతుడి బ్యాక్‌ డ్రాప్‌లో సినిమా సాగుతుందట. టైమ్ ట్రావెల్‌ ఎలిమెంట్లు ఉంటాయని తెలుస్తుంది. దీనికి `బింబిసార` ఫేమ్‌ వశిష్ట దర్శకత్వం వహిస్తున్నారు. యూవీ క్రియేషన్స్ నిర్మిస్తుంది. ఇందులో త్రిష హీరోయిన్‌గా నటిస్తుండగా, మీనాక్షి చౌదరి, ఆషికా రంగనాథ్‌, మృణాల్‌ ఠాకూర్, ఇషా చావ్లా, సురభీ చిరుకి సిస్టర్స్ పాత్రల్లో మెరుస్తారని తెలుస్తుంది. వీరితోపాటు కునాల్‌ కపూర్, శ్రీ విష్ణు, రావు రమేష్‌, వెన్నెల కిశోర్‌, హర్షవర్థన్‌ ముఖ్య పాత్రల్లో కనిపించబోతున్నారు.
ఈ సినిమా షూటింగ్‌ ఆల్మోస్ట్ పూర్తయ్యిందట. ప్రస్తుతం పోస్ట్ ప్రొడక్షన్‌ పనులు కూడా జరుగుతున్నాయి. వీఎఫ్‌ఎక్స్ కి స్కోప్‌ ఉన్న మూవీ. దాదాపు ఐదు నెలలు దీనిపైనే కూర్చోబోతుందట టీమ్‌. మరోవైపు లేటెస్ట్ గా మ్యూజిక్‌ సిట్టింగ్స్ కూడా ప్రారంభమయ్యాయి. అదిరిపోయే మ్యూజిక్‌ ఇవ్వబోతున్నారట ఎంఎం కీరవాణి. బీజీఎంతో అదరగొట్టబోతున్నారని సమాచారం.
ఇక ఈ సినిమాలో ఐటెమ్ సాంగ్‌ ఉందట. అది సినిమాకే హైలైట్‌గా నిలుస్తుందని, అందులో శృతి హాసన్ నర్తిస్తుందని సమాచారం. చిరంజీవితో ఆమె మరో సారి లెగ్‌ షేక్‌ చేయబోతుందట. అయితే ఈ పాట చిత్రీకరణ కూడా పూర్తయ్యిందని తెలుస్తుంది. అదిరిపోయే మాస్‌ సాంగ్‌ అని, థియేటర్లలో పూనకాలు తెప్పిస్తుందని అంటున్నారు. మరి ఇందులో నిజమెంతా అనేది తెలియాల్సి ఉంది. అదే సమయంలో శృతి హాసన్ లక్ చిరుకి కలిసి వస్తుందా అనేది చూడాలి.
ఇదిలా ఉంటే ప్రస్తుతం శృతి హాసన్.. అడవి శేష్‌ తో కలిసి `డెకాయిట్‌ః ఏ లవ్‌ స్టోరీ` సినిమాలో నటిస్తుంది. అలాగే `సలార్ 2`లోనూ ఆమెనే హీరోయిన్‌. ఇది వచ్చే ఏడాది ప్రారంభం కానుంది. దీంతోపాటు రజనీకాంత్‌తో `కూలీ` మూవీ చేస్తుంది. `చెన్నై స్టోరీ` అనే మరో తమిళ మూవీలోనూ హీరోయిన్‌గా చేస్తుంది శృతి హాసన్.