పెళ్లయింది కాబట్టే ఆ సీన్స్ లో బాగా నటించా.. భీమ్లా నాయక్ లో నటించడానికి కారణం ఇదే: రానా

రానా దగ్గుబాటి, పవర్ స్టార్ పవన్ కళ్యాణ్ నటించిన భీమ్లా నాయక్ చిత్రం థియేటర్స్ లో సందడి చేస్తోంది. మలయాళీ చిత్రం అయ్యప్పనుమ్ కోషియం చిత్రానికి ఇది రీమేక్. మతాల మాంత్రికుడు త్రివిక్రమ్ శ్రీనివాస్ ఈ కథని తెలుగు నేటివిటీకి అనుగుణంగా, పవన్ కళ్యాణ్ ఇమేజ్ కి తగ్గట్లుగా మార్చారు. సాగర్ చంద్ర ఈ చిత్రానికి దర్శకత్వం వహించారు. సితార ఎంటెర్టైనెంట్స్ సంస్థ నిర్మించిన ఈ చిత్రం ప్రస్తుతం థియేటర్స్ లో విజయవంతంగా దూసుకుపోతోంది. 

తాజాగా రానా దగ్గుబాటి ఈ చిత్ర ప్రచార కార్యక్రమాల్లో పాల్గొన్నారు. భీమ్లా నాయక్ గురించి అనేక విశేషాలు తెలిపాడు రానా. అయ్యప్పనుమ్ కోషియం చూసినప్పుడు.. కోషి పాత్రలో నేనే నటిస్తానని నాగవంశీకి చెప్పా. ఇది రెగ్యులర్ చిత్రాలకు భిన్నమైనది. చిన్న ఇగో క్లాష్ బేస్ చేసుకుని తెరకెక్కించిన చిత్రం. అందుకే ఈ మూవీలో నటించడానికి ఒప్పుకున్నా అని రానా తెలిపాడు. 

ఈ చిత్రంలోకి పవన్ కళ్యాణ్ వచ్చిన తర్వాత సినిమా స్వరూపమే మారిపోయింది. ఈ కథకి కూడా త్రివిక్రమ్ శ్రీనివాస్, సాగర్ చంద్ర అద్భుతంగా హీరోయిజాన్ని చొప్పించారు. తెలుగు నేటివిటీకి తగ్గట్లుగా ఉండేలా చూసుకున్నాం. కొన్ని సన్నివేశాలు మలయాళంలో లాగే అనిపించినప్పుడు రీషూట్ కూడా చేశాం అని రానా తెలిపాడు. 

ఈ చిత్రానికి ముందు తాను రెండేళ్ల పాటు ఆరోగ్య సమస్యలు ఎదుర్కొన్నట్లు రానా తెలిపాడు. ఆరోగ్యం కుదుట పడ్డాక నటించిన తొలి చిత్రం ఇదే అని రానా తెలిపాడు. ముంబైలో తెలుగు ప్రేక్షకుల మధ్యలో ఈ సినిమా చూశా. వారి స్పందన చూసి చాలా సంతోషించినట్లు రానా పేర్కొన్నాడు. 

ఇక నన్ను, పవన్ కళ్యాణ్ గారిని ఒకేసారి డైరెక్ట్ చేసే ఛాన్స్ దక్కించుకున్నాడు సాగర్ చంద్ర. సాగర్ చంద్ర స్వతహాగా విభిన్నమైన చిత్రాలని ఇష్టపడే వ్యక్తి. అందుకే భీమ్లా నాయక్ అవుట్ పుట్ అంత బాగా వచ్చిందని తెలిపాడు. 

నాకు, సంయుక్త మీనన్ కి మధ్య వచ్చే సన్నివేశాలు అద్భుతంగా ఉన్నాయని అంటున్నారు. బహుశా నేను ఓ ఇంటివాడిని కావడం వల్లే సంయుక్త మీనన్ తో అంత బాగా నటించగలిగానేమో అంటూ రానా సరదాగా వ్యాఖ్యానించారు. పెళ్ళైన అనుభవం ఈ చిత్రంలో బాగా ఉపయోగపడిందని రానా పేర్కొన్నాడు. ప్రస్తుతం తాను బాబాయ్ వెంకటేష్ తో కలసి 'రానా నాయుడు' అనే వెబ్ సిరీస్ చేస్తున్నాం అని.. ఇది పూర్తయ్యాక కొత్త ప్రాజెక్ట్ గురించి ఆలోచిస్తానని రానా పేర్కొన్నాడు.