తమన్నాపై ప్రత్యేకంగా ప్రశంసలు కురిపించిన రాజమౌళి.. పదేళ్లు పూర్తి చేసుకున్న బాహుబలి

దర్శక ధీరుడు రాజమౌళి సృష్టించిన అపురూప దృశ్య కావ్యం బాహుబలి చిత్రం. రెండు భాగాలుగా తెరకెక్కిన బాహుబలి మూవీ ఇండియన్ సినిమా చరిత్రలోనే గొప్ప చిత్రాలలో ఒకటిగా నిలిచింది. బాహుబలి మొదటి భాగం బాహుబలి ద బిగినింగ్ విడుదలై నేటితో సరిగ్గా పదేళ్లు పూర్తవుతుంది. ఈ సందర్భంగా బాహుబలి చిత్ర విశేషాలు మరోసారి సోషల్ మీడియాలో వైరల్ అవుతున్నాయి.

ఈ చిత్రంలో ప్రభాస్ మహేంద్ర బాహుబలి, అమరేంద్ర బాహుబలిగా డ్యూయెల్ రోల్ లో నటించారు. భల్లాలదేవుడుగా రానా అందించిన విలక్షణ నటన ఈ చిత్రంలో మరో హైలెట్. అదేవిధంగా రమ్యకృష్ణ పోషించిన శివగామి పాత్రకి కూడా దేశవ్యాప్తంగా ప్రశంసలు దక్కాయి. సత్యరాజ్ పోషించిన కట్టప్ప పాత్ర, నాజర్ పోషించిన బిజ్జల దేవుడు పాత్ర ఇలా ఈ చిత్రంలో అన్ని పాత్రలు దేనికి అదే ప్రత్యేకంగా ఉంటాయి.

దేవసేన పాత్రలో అనుష్క బాహుబలి 1 లో డీ గ్లామర్ రోల్ లో పవర్ ఫుల్ గా నటించింది. ఇక అవంతిక పాత్రలో నటించిన తమన్నా కూడా రాజమౌళి నుంచి ప్రత్యేకంగా ప్రశంసలు అందుకుంది. ఈ చిత్ర షూటింగ్ జరిగే సమయంలోనే రాజమౌళి తమన్నా గురించి ప్రత్యేకంగా ట్విట్ చేస్తూ ప్రశంసలు కురిపించారు.

తమన్నాతో కలిసి పనిచేయడం ఇదే తొలిసారి. ఆమె కథని అర్థం చేసుకున్న విధానం, పర్ఫార్మెన్స్ అందించిన విధానం నన్ను ఎంతగానో ఇంప్రెస్ చేసింది. బాహుబలి చిత్రంలో ఆమె పాత్ర ఎంతో విలువైనది అని రాజమౌళి ప్రశంసలు కురిపించారు.

బాహుబలి 1 లో తమన్నా గ్లామరస్ గా కనిపిస్తూనే యాక్షన్ సన్నివేశాల్లో కూడా అదరగొట్టింది. ప్రభాస్, తమన్నా మధ్య కెమిస్ట్రీ ఈ చిత్రంలో చూడముచ్చటగా ఉంటుంది. ముఖ్యంగా పచ్చబొట్టేసిన సాంగ్ లో తమన్నా, ప్రభాస్ ఇద్దరూ చాలా రొమాంటిక్ గా నటించారు.