కాజల్‌ తన పెళ్లిలో జీలకర్ర బెల్లం ఎందుకు పెట్టుకుందో తెలుసా? తెలుగు ఫ్యాన్స్ సంబరాలు చేసుకునే రహస్యం వెల్లడి

కాజల్‌ అగర్వాల్‌ నేడు పుట్టిన రోజుని జరుపుకుంటుంది. ఈ సందర్భంగా ఆమె పెళ్లికి సంబంధించిన ఓ బిగ్గెస్ట్ రహస్యం బయటపెట్టింది. తెలుగు ఫ్యాన్స్ పండగ చేసుకునే విషయం వెల్లడించింది.   

కాజల్‌ అగర్వాల్‌ ఇటీవల తెలుగులోకి `సత్యభామ` చిత్రంతో అలరించింది. పెళ్లి తర్వాత ఆమె సినిమాలను ఎంచుకునే విషయంలో కొంత మార్పు కనిపిస్తుంది. అందులో భాగంగా ఆమె లేడీ ఓరియెంటెడ్‌ మూవీతో వచ్చింది. ఈ చిత్రం కమర్షియల్‌గా ఆడలేదు. కానీ కాజల్‌కి మంచి పేరొచ్చింది. బాగా చేసిందనే కామెంట్స్ వచ్చాయి. సెకండ్‌ ఇన్నింగ్స్ లో మరింత బిజీ అవుతుంది కాజల్‌. 

ఈ క్రమంలో కాజల్‌కి సంబంధించిన ఓ ఆరుదైన విషయం బయటకు వచ్చింది. ఆమె నాలుగేళ్ల క్రితం ముంబాయికి చెందిన వ్యాపారవేత్త గౌతమ్‌ కిచ్లుని వివాహం చేసుకుంది. వీరికి కొడుకు నీల్‌ కిచ్లు కూడా జన్మించారు. అయితే కాజల్‌ తన పెళ్లిలో ఓ తెలుగు సాంప్రదాయాన్ని పాటించింది. తనది పంజాబీ ఫ్యామిలీ అయినప్పటికీ తెలుగు సాంప్రదాయానికి పెద్ద పీట వేస్తూ పెళ్లిలో జిలకర్ర బెల్లం వాడింది. మన తెలుగు సంప్రదాయం ప్రకారం జీలకర్ర బెల్లంని ఉపయోగిస్తామనే విషయం తెలిసిందే. అబ్బాయి, అమ్మాయికి, అమ్మాయి అబ్బాయికి పెడతారు. వాళ్లిద్దరి బంధం బలంగా ఉండాలనే అర్థంలో దాన్ని ఉపయోగిస్తుంటాం. 

అయితే గౌతమ్‌ కిచ్లుతో పెళ్లి సమయంలో కాజల్‌ కూడా ఈ జీలకర్ర బెల్లం పెట్టుకున్నారు. నిజానికి ఇది తమ పంజాబీ ట్రెడిషన్‌లో లేదు. కానీ కావాలని పెట్టించుకుందట కాజల్‌. అలా పెట్టుకోవడానికి కారణమేంటనేది వెల్లడించింది. ఈ సందర్భంగా ఆమెని ఆరాధించే తెలుగు అభిమానులు ఫిదా అయ్యే విషయాన్ని, పండగ చేసుకునే విషయాన్ని చెప్పింది కాజల్‌. ఇంతకి ఏం చెప్పిందంటే..

తనది పంజాబీ ఫ్యామిలీ అయినా, తెలుగులోనే తాను నటిగా ఎదిగాను అని, తెలుగు ఆడియెన్స్ ఆదరణ వల్లే ఈ స్థాయికి వచ్చానని చెప్పింది. తనది పంజాబీ ఫ్యామిలీ అయినా, తెలుగు కూడా తన ఫ్యామిలీలాగే, తాను తెలుగు అమ్మాయిగానే ఫీలవుతానని, తెలుగు ఆడియెన్స్ అంతటి ప్రేమాభిమానులను ఇచ్చారని, ఇంతటి పేరు, స్థాయిని ఇచ్చారని, తమ అమ్మాయిలా ఆదరించారని చెప్పింది. అందుకే ఎప్పుడూ వాళ్ల కోసం ఏదైనా చేయాలనిపిస్తుందని, తెలుగు ఫ్యాన్స్ కి, తెలుగు వారికి తన ట్రిబ్యూట్‌గా పెళ్లిలో ఇలా జీలకర్ర బెల్లం పెట్టుకున్నట్టు తెలిపింది కాజల్‌. 

Kajal Aggarwal

కొన్నాళ్ల క్రితం సాక్షి ఇంటర్వ్యూలో ఈ విషయాన్ని చెప్పింది కాజల్‌. ఇది ఇప్పుడు వైరల్ అవుతుంది. నేడు కాజల్‌ పుట్టిన రోజు. ఈ సందర్భంగా ఈ వీడియో నెట్టింట వైరల్‌ అవుతుండటం విశేషం. ఇటీవల ఓ ఇంటర్వ్యూలో కాజల్‌ మాట్లాడుతూ, కోపం వస్తే తన భర్తపై అరుస్తానని తెలిపింది. అలాగే ఆయన్ని జీకే అని ముద్దుగా పిలుస్తుందట. దీంతోపాటు మరో ముద్దు పేరు ఉందని, దాన్ని బయటకు చెప్పను అని తెలిపింది కాజల్. మరోవైపు తన భర్త కాజల్ రొమాంటిక్‌ కాదని చెప్పి షాకిచ్చింది. ప్రాక్టికల్‌గా ఉంటాడని తెలిపింది. 

కాజల్‌ అగర్వాల్‌.. 2007లో `లక్ష్మీ కళ్యాణం` చిత్రంతో తెలుగులోకి హీరోయిన్‌గా ఎంట్రీ ఇచ్చింది. `చందమామ` చిత్రంతో టాలీవుడ్‌ చందమామ అయిపోయింది. `మగధీర`తో బిగ్‌ బ్రేక్‌ అందుకుని స్టార్‌ హీరోయిన్‌ అయిపోయింది. తెలుగులో దాదాపు అందరు స్టార్‌ హీరోలతో కలిసి నటించింది. హిందీ, తమిళంలోనూ సినిమాలు చేసినా, తెలుగులోనే ఎక్కువగా మూవీస్‌ చేసి తెలుగు ఆడియెన్స్ కి దగ్గరయ్యింది. తెలుగు ఆడియెన్స్ హృదయాలను కొల్లగొట్టింది. ఆమె మ్యారేజ్‌ని ప్రకటించినప్పుడు ఎంతో మంది కుర్రాళ్ల హార్ట్ బ్రేక్‌ అయిన విషయం తెలిసిందే. 

సెకండ్‌ ఇన్నింగ్స్ లో `భగవంత్‌ కేసరి`, `సత్యభామ` చిత్రాలతో అలరించింది. ప్రస్తుతం ఆమె తెలుగులో `కన్పప్ప`లో పార్వతి పాత్రలో కనిపించబోతుంది. మరోవైపు `ఇండియన్‌ 3`లో నటించింది. అలాగే హిందీలో ఓ సినిమా చేస్తుంది కాజల్‌. నేడు ఆమె 39వ పుట్టిన రోజును జరుపుకుంటుంది.