మలయాళీ స్టార్ హీరో దుల్కర్ సల్మాన్ నటించిన పాన్ ఇండియా చిత్రం Kurup కోసం అభిమానులు ఎప్పటి నుంచో ఎదురుచూస్తున్నారు. ఎట్టకేలకు ఈ చిత్రం నేడు థియేటర్స్ లో గ్రాండ్ గా విడుదలయింది.
మలయాళీ స్టార్ హీరో దుల్కర్ సల్మాన్ నటించిన పాన్ ఇండియా చిత్రం Kurup కోసం అభిమానులు ఎప్పటి నుంచో ఎదురుచూస్తున్నారు. ఎట్టకేలకు ఈ చిత్రం నేడు థియేటర్స్ లో గ్రాండ్ గా విడుదలయింది. శ్రీనాధ్ రాజేంద్రన్ ఈ చిత్రానికి దర్శకుడు. దుల్కర్ సల్మాన్ కి జోడిగా శోభిత దూళిపాళ నటించింది. తెలుగులో కూడా ఈ చిత్రాన్ని పెద్ద ఎత్తున విడుదల చేశారు. వాస్తవిక సంఘటనలతో క్రైమ్ థ్రిల్లర్ గా తెరకెక్కిన ఈ చిత్రం ప్రేక్షకులని మెప్పించే విధంగా ఉందా లేదా అనేది మన సమీక్షలో చూద్దాం.
కథ: కురుప్ చిత్రం పోలీసులకు మోస్ట్ వాంటెడ్ గా, పరారీలో ఉన్న సుకుమారన్ కురుప్ జీవిత చరిత్ర ఆధారంగా తెరకెక్కింది. ఇండియన్ ఎయిర్ ఫోర్స్ లో పనిచేసే యువకుడు గోపికృష్ణన్ (Dulquer Salmaan) తన ఐడెంటిటీ మార్చుకుని నకిలీ ఐడెంటిటీ పొందేందుకు ఓ ఎన్నారైని హత్య చేస్తాడు. ఇన్సూరెన్స్ డబ్బు కోసం ఇదే స్టంట్ ని మరికొందరిపై కూడా ప్రయోగిస్తాడు. కానీ ఈసారి అతడి ప్రయత్నం పూర్తిగా ఫలించదు. దీనితో అతడిని పట్టుకునేందుకు పోలీస్ అధికారి కృష్ణదాస్ రంగంలోకి దిగుతారు. ఆ తర్వాత జరిగిన ఉత్కంఠ పరిమాణాలు సినిమా చూసి తెలుసుకోవాల్సిందే.
విశ్లేషణ : పరారీలో ఉన్న సుకుమారన్ కురుప్ జీవిత చరిత్ర ఆధారంగా ఈ చిత్రం తెరకెక్కిస్తున్నప్పుడు దర్శకుడు శ్రీనాధ్ రాజేంద్రన్ పై విమర్శలు వినిపించాయి. ఒక క్రిమినల్ ని ఉత్తముడిగా చూపించేందుకు ఈ చిత్రం చేస్తున్నారు అంటూ అంతా విమర్శించారు. కానీ సినిమా చూస్తే ఆ విమర్శలకు విలువ లేదు అనిపిస్తుంది. ఎందుకంటే దుల్కర్ సల్మాన్ పాత్రని రాజేంద్రన్ ఎక్కడా హీరోలాగా చూపించలేదు. భయంకరమైన క్రిమినల్ ఎలా బిహేవ్ చేస్తాడో.. అలాగే కురుప్ పాత్రని ప్రజెంట్ చేశారు. క్రైమ్ సన్నివేశాల్లో దుల్కర్ సల్మాన్ తన నటనలో క్రూరత్వాన్ని పండించాడు. అతడు నటించాడు అనడం కంటే జీవించాడు అంటే బావుంటుంది. అంతలా దుల్కర్ ఆ పాత్రలో ఒదిగిపోయాడు. కథని గమనిస్తే దర్శకుడు కొంత వాస్తవం, కొంత కల్పితం అన్నట్లుగా ఈ చిత్రాన్ని తెరకెక్కించారు. ఇక 80వ దశకంలో విజువల్స్ ని స్రీన్ పై అద్భుతంగా చూపించారు. కానీ ఒక థ్రిల్లర్, క్రైమ్ డ్రామాకు కావలసిన రేసీ స్క్రీన్ ప్లే, వేగం ఈ చిత్రంలో లోపించింది. సినిమా చాలా నెమ్మదిగా సాగుతున్న ఫీలింగ్ ప్రేక్షకులకు కలుగుతుంది. ఇక ఈ చిత్రానికి ఉన్న హైప్, దుల్కర్ సల్మాన్ స్టార్ డంకి అంచనాలు అందుకోవడంలో ఈ మూవీ కాస్త వెనుకబడిందనే చెప్పాలి. పైకి మాస్ మూవీలాగా కనిపించినా ఈ చిత్రంలో మాస్ టచ్ పూర్తిగా లోపించింది.
నటీనటులు : ఈ చిత్రానికి బిగ్గెస్ట్ ప్లస్ దుల్కర్ సల్మాన్ అద్భుతమైన నటన. చివరి 30 నిమిషాల్లో నటీనటుల నుంచి దర్శకుడు అద్భుతమైన అవుట్ పుట్ రాబట్టారు. ఆ సన్నివేశాలు థ్రిల్లింగ్ గా ఉంటాయి. దుల్కర్ కి జోడిగా నటించిన శోభిత దూళిపాళ కూడా నటనతో ఆకట్టుకుంది. ఇతర నటీనటులు కూడా తమ పాత్రల మేరకు బాగానే నటించారు.
సాంకేతికంగా: ఈ చిత్రంలో ప్రొడక్షన్ వాల్యూస్ గురించి తప్పకుండా మాట్లాడుకోవాలి. 80 వ దశకం ఫీల్ తీసుకువచ్చేలా జాగ్రత్తలు తీసుకున్నారు. ఈ చిత్రానికి దుల్కర్ సల్మాన్ నిర్మాత కావడంతో ప్రత్యేక శ్రద్ద వహించాడు. ఇక సుషిన్ శ్యామ్ సంగీతం ఈ చిత్రంలో మరో మేజర్ హైలైట్. బ్యాగ్రౌండ్ సంగీతం అయితే వెంటాడే విధంగా ఉంటుంది. ఎడిటింగ్ పై ఇంకాస్త దృష్టి పెట్టి ఉంటే బావుండేది.
చివరగా: క్రిమినల్ గా అద్భుతమైన నటనతో దుల్కర్ సల్మాన్ ఈ చిత్రాన్ని ముందుకు నడిపించాడు. చివరి ముప్పై నిముషాలు ఈ ఎంగేజింగ్ గా ఉంటుంది. స్లోగా సాగే కథనం, మాస్ కి చేరువయ్యే అంశాలు లేకపోవడం ఈ చిత్ర స్థాయిని కాస్త తగ్గించాయి.
రేటింగ్ : 2.75/5