ఏఎన్నార్ నుంచి నాగ చైతన్య వరకు.. తమన్ ఫ్యామిలీకి రుణపడి ఉండాలి, పేరు వెనుక పెద్ద సీక్రెట్..

తెలుగు సినిమా చరిత్ర గురించి మాట్లాడుకోవాలంటే లెజెండ్రీ నటుడు ఏఎన్నార్ ని గుర్తు చేసుకోవాల్సిందే. తెలుగు సినిమాకు మొట్టమొదట గుర్తింపు తెచ్చిన నటుడు ఆయన. అదే విధంగా తెలుగు సినిమా చెన్నై నుంచి హైదరాబాద్ తరలి రావడంలో కీలక పాత్ర పోషించింది కూడా ఏఎన్నార్ అని చెప్పొచ్చు. వందలాది వైవిధ్యమైన చిత్రాలు, విలక్షణమైన పాత్రలతో ఏఎన్నార్ తెలుగు ప్రేక్షకుల హృదయాల్లో చిరస్థాయిగా నిలిచిపోయారు. 

ప్రతి ఒక్కరి కెరీర్ లో సహకరించిన, సాయం చేసిన వ్యక్తులు కొందరు ఉంటారు. ఏఎన్నార్ జీవితంలో కూడా అలాంటి వాళ్ళు ఉన్నారు. ఏఎన్నార్ కి ప్రస్తుతం టాలీవుడ్ లో రాణిస్తున్న సెన్సేషనల్ మ్యూజిక్ డైరెక్టర్ తమన్ ఫ్యామిలీతో విడదీయరాని అనుబంధం ఉంది. అక్కినే నాగేశ్వరరావు నుంచి ప్రస్తుతం నాగచైతన్య , అఖిల్ వరకు అక్కినేని ఫ్యామిలీ మొత్తం తమన్ కుటుంబానికి రుణపడి ఉంటారు అని చెప్పడంలో సందేహం లేదు. 

అక్కినేని నాగేశ్వరరావుని హీరోగా పరిచయం చేసిన దర్శక నిర్మాత ఘంటసాల బలరామయ్య. ఏఎన్నార్ లో ప్రతిభని గుర్తించిన ఘంటసాల బలరామయ్య 1942లో తాను తెరకెక్కించి శ్రీసీతారామ జననం చిత్రంలో అవకాశం ఇచ్చారు. ఏఎన్నార్ హీరోగా కెరీర్ ప్రారంభించింది ఈ చిత్రంతోనే. ఆ తర్వాత ఏఎన్నార్ అనేక చిత్రాల్లో ఘంటసాల బలరామయ్య దర్శక నిర్మాణంలో నటించారు. 

అలాంటి ఘంటసాల బలరామయ్య మనవాడే ఇప్పటి సంగీత దర్శకుడు తమన్. ఈ విషయాన్ని ఏఎన్నార్ ఓ ఇంటర్వ్యూలో స్వయంగా రివీల్ చేశారు. బలరామయ్య కూడా తమన్ లాగే బాగా బొద్దుగా ఉండేవారు. ఆయన పోలికలే తమన్ కి వచ్చాయి అని సరదాగా నాగేశ్వర రావు తెలిపారు. తమన్ అసలు పేరు ఘంటసాల సాయి శ్రీనివాస్ శివకుమార్. బలరామయ్య కొడుకు శివకుమార్.. ఆయన కొడుకే తమన్. సినిమాల్లోకి వచ్చాక తన పేరుని ఎస్ తమన్ గా మార్చుకున్నారు. ఎస్ అంటే తన తండ్రి పేరు శివకుమార్ అని అర్థం. తమన్ పేరు వెనుక అంత హిస్టరీ ఉంది. 

Thaman

తమన్ తన కెరీర్ లో అక్కినేని హీరోలు నాగార్జున, నాగ చైతన్య, అఖిల్ చిత్రాలకు సంగీతం అందించారు. రగడ, గ్రీకువీరుడు, తడాఖా, అఖిల్ లాంటి చిత్రాలకు తమన్ సంగీతం అందించారు. అదన్నమాట తమన్ ఫ్యామిలీకి ఏఎన్నార్ ఫ్యామిలీకి ఉన్న రిలేషన్.