నరేష్ కన్నీరు మున్నీరు అవుతున్న వీడియో వైరల్ అవుతుంది. తనను సడన్ గా వదిలేసి వెళ్లిపోయిందని ఆయన వాపోయారు. అది లేకపోతే ముద్ద కూడా దిగదంటూ ఆవేదన చెందాడు..
పరిశ్రమలో పుట్టి పెరిగాడు నటుడు నరేష్. విజయనిర్మల మొదటి భర్త సంతానమైన నరేష్... తల్లి కృష్ణను వివాహం చేసుకున్నాక ఆయన వద్దే పెరిగాడు. చైల్డ్ ఆర్టిస్ట్ గా ఆయన కెరీర్ మొదలైంది. అనంతరం హీరో అయ్యాడు.
కామెడీ, రొమాంటిక్ హీరోగా నరేష్ అనేక సూపర్ హిట్ చిత్రాల్లో నటించాడు. శ్రీవారికి ప్రేమలేఖ, రెండు జెళ్ళసీత, జంబలకడి పంబ, ఆమె వంటి చిత్రాలు నరేష్ కి పేరు తెచ్చాయి. హీరోగా ఫేడ్ అవుట్ అయ్యాక క్యారెక్టర్ ఆర్టిస్ట్ గా మారి సక్సెస్ అయ్యాడు.
టాలీవుడ్ లో అత్యంత డిమాండ్ ఉన్న నటుడు నరేష్. పాత్ర ఏదైనా పరకాయ ప్రవేశం చేస్తాడు. ఏడాదికి పదుల సంఖ్యలో నరేష్ చిత్రాలు చేస్తున్నారు. నటుడిగా సక్సెస్ అయిన నరేష్ వ్యక్తిగత జీవితంలో అనేక ఒడిదుడుకులు ఉన్నాయి. వైవాహిక జీవితంలో ఆయన పలుమార్లు విఫలం చెందాడు.
నరేష్ కి మూడు పెళ్లిళ్లు అయ్యాయి. ముగ్గురు భార్యలకు ముగ్గురు కుమారులు ఉన్నారు. మూడో భార్య రమ్య రఘుపతితో వివాదం నడుస్తోంది. అధికారికంగా వీరికి విడాకులు రాలేదు. రమ్య తనకు విడాకులు వద్దంటుంది. నరేష్ కావాలని అంటాడు. ఈ క్రమంలో పరస్పర ఆరోపణలు చేసుకున్నారు.
రమ్యతో విడిపోయిన నరేష్ నటి పవిత్ర లోకేష్ తో సహజీవనం చేస్తున్నాడు. ఐదేళ్లకు పైగా వీరు కలిసి జీవిస్తున్నారు. పవిత్రతో నరేష్ బంధాన్ని రమ్య వ్యతిరేకించింది. ఆ మధ్య నరేష్-పవిత్ర ఉన్న హోటల్ గది ముందు బైఠాయించి హంగామా చేసింది.
ఇదిలా ఉంటే నరేష్ లేటెస్ట్ వీడియో వైరల్ గా మారింది. నరేష్ ఏడుస్తూ ఆ వీడియోలో కనిపించాడు. నా బేబీ వెళ్ళిపోయింది. సడన్ గా దూరమైంది. బేబీ కోసం చాలా తిరిగాను. అయినా కానీ బేబీ కనిపించలేదు. ఎవరికైనా కనిపిస్తే నా బేబీ ఆచూకీ చెప్పండని... వేడుకున్నాడు.
ఈ వీడియో చూసి ఒక్క క్షణం నిజం అనుకున్నారు. నిజంగా నరేష్ ఎవరి గురించో బాధపడుతున్నారని జనాలు షాక్ అయ్యారు. తీరా చూస్తే ఇది ప్రమోషనల్ వీడియో. నరేష్ లేటెస్ట్ మూవీ వీరాంజనేయులు విహారయాత్ర. ఈ మూవీ ప్రమోషన్స్ లో భాగంగా నరేష్ ఈ వీడియో బైట్ చేశాడు.