IND vs SA: భారత్ - దక్షిణాఫ్రికా మధ్య జరిగిన రెండో మ్యాచ్ లో భారత బ్యాట‌ర్లు రాణించ‌లేక‌పోయారు. కానీ, భారత బౌలర్లు అద్భుత‌మైన బౌలింగ్ తో సౌతాఫ్రికాకు చుక్క‌లు చూపించారు. మిస్ట‌రీ స్పిన్న‌ర్ వ‌రుణ్ చ‌క్ర‌వ‌ర్తి 5 వికెట్లతో అద‌రగొట్టేశాడు.
IND vs SA: భారత్ వర్సెస్ సౌతాఫ్రికా రెండో టీ20 మ్యాచ్ సెయింట్ జార్జ్ పార్క్, గ్కేబర్హాలో జరిగింది. ఈ మ్యాచ్ లో టాస్ గెలిచిన దక్షిణాఫ్రికా జట్టు బౌలింగ్ ఎంచుకుంది. దీంతో భారత జట్టు తొలుత బ్యాటింగ్ కు దిగింది. గత మ్యాచ్‌లో కూడా తొలుత బ్యాటింగ్ చేసిన భారత జట్టు డ‌బుల్ సెంచ‌రీ స్కోర్ చేసింది. ఈ మ్యాచ్ లో కూడా టీమిండియాపై భారీ అంచ‌నాలు ఉన్నాయి.
అయితే, బౌన్సీ పిచ్‌పై దక్షిణాఫ్రికా బౌలర్లు అద్భుత‌మైన బౌలింగ్ తో భారత టాప్-ఆర్డర్ కుప్ప‌కూలింది. 20 ఓవర్లలో 6 వికెట్ల నష్టానికి 124 ప‌రుగులు మాత్ర‌మే చేసింది. హార్దిక్ పాండ్యా 39, అక్ష‌ర్ ప‌టేల్ 27, తిల‌క్ వ‌ర్మ 20 ప‌రుగులు చేశారు.
ప్రోటీస్ బౌలర్లు బ్యాక్ ఆఫ్ లెంగ్త్ లైన్ తో భారత్ ను దెబ్బ‌కొట్టారు. పిచ్‌పై సహజ బౌన్స్ మిగిలిన పనిని పూర్తి చేసింది. అభిషేక్ శర్మ ఔట్ కావడమే ఇందుకు ఉదాహరణ. టీ20 ల్లో ఈ ఎడమచేతి వాటం ఆటగాడు అండర్ హెల్మింగ్ అవుట్‌లు కొనసాగుతున్నాయి. అత‌ను గెరాల్డ్ కోట్జీ నుండి క్లైంబింగ్ డెలివరీని తప్పుగా తీసి మార్కో జాన్సెన్ చేతిలో ఔట్ అయ్యాడు.
బ్యాక్-టు-బ్యాక్ T20I సెంచరీలు చేసిన మొదటి భారతీయ బ్యాట్స్‌మన్‌గా నిలిచిన శాంసన్.. మిడ్-ఆఫ్‌లో భారీ షాట్ ఆడే ప్ర‌య‌త్నంలో బౌల్డ్ అయ్యాడు. కెప్టెన్ సూర్యకుమార్ యాదవ్ కూడా ఎక్కువ సేపు క్రీజులో ఉండ‌లేదు. అయితే, అక్ష‌ర్ ప‌టేల్ మంచి ఇన్నింగ్స్ ఆడుతుండ‌గా దుర‌దృష్ట‌వ‌శాత్తు 27 ప‌రుగుల ర‌నౌట్ అయ్యాడు. ఆ తర్వాత హార్దిక్ పాండ్యా చివరి వ‌ర‌కు క్రీజులో ఉండి ( 45 బంతుల్లో 39* ప‌రుగులు) భారత్ స్కోర్ ను సెంచ‌రీ దాటించాడు.
మిస్ట‌రీ స్పిన్న‌ర్.. సౌతాఫ్రికాను వ‌ణికించిన వ‌రుణ్ చ‌క్ర‌వ‌ర్తి
సౌతాఫ్రికా-భారత్ తొలి టీ20 మ్యాచ్ లో అద్భుత‌మైన బౌలింగ్ తో ఆక‌ట్టుకున్న భారత మిస్ట‌రీ స్పిన్న‌ర్ వ‌రుణ్ చ‌క్ర‌వ‌ర్తి మూడు వికెట్లు తీసుకున్నాడు. రెండో మ్యాచ్ లో కూడా అద్భుత‌మైన బౌలింగ్ తో సౌతాఫ్రికా ఆట‌గాళ్ల‌ను వ‌ణికించాడు. వ‌రుణ్ తో పాటు ర‌వి బిష్ణోయ్, అక్ష‌ర్ ప‌టేట్ కూడా అద్భుత‌మైన స్పిన్ బౌలింగ్ తో సౌతాఫ్రికాను ఇబ్బంది పెట్టారు. అయితే, చివ‌ర‌లో భారత పేస‌ర్లు భారీ ప‌రుగులు స‌మ‌ర్పించుకోవ‌డంతో మ్యాచ్ ను కోల్పోయింది.
అయితే, వ‌రుణ్ చ‌క్ర‌వ‌ర్తి ప్రోటీస్ జ‌ట్టును ఓట‌మి అంచుకు తీసుకెళ్లి ఒత్తిడిలోకి చేర్చాడు. మ్యాచ్ ను భారత్ చేతిలోకి తీసుకువ‌చ్చాడు. వ‌రుణ్ చ‌క్ర‌వ‌ర్తి తన నాలుగు ఓవర్ల బౌలింగ్ తో ఏకంగా 5 వికెట్లు తీసుకున్నాడు. అత‌ని చివరి ఓవర్‌లో మొదటి రెండు బంతుల్లో భ‌యంక‌ర‌మైన ఇద్ద‌రు సౌతాఫ్రికా స్టార్ల‌ను పెవిలియ‌న్ కు పంపాడు.
మొదట ప్రోటీస్ జట్టు వికెట్ కీప‌ర్ బ్యాట్స్ మెన్ హెన్రిచ్ క్లాసెన్ ఔట్ చేశాడు. త‌ర్వాతి బంతికి మిల్నేని అవుట్ చేయడంతో హ్యాట్రిక్‌కు చేరువయ్యాడు. అయితే హ్యాట్రిక్ పూర్తి చేయ‌లేక‌పోయాడు. మొత్తంగా ఈ మ్యాచ్ లో తన నాలుగు ఓవర్లలో కేవలం 17 పరుగులిచ్చి 5 వికెట్లు తీశాడు. వ‌రుణ్ చక్ర‌వ‌ర్తికి T20 ఇంటర్నేషనల్‌లో అత్యుత్తమ బౌలింగ్ ప్రదర్శన ఇది.
భారత్ కొంప ముంచిన కోయేట్జీ, స్టబ్స్
భారత్‌తో జరుగుతున్న టీ20 సిరీస్‌లో దక్షిణాఫ్రికా అద్భుతంగా పునరాగమనం చేసి రెండో మ్యాచ్‌లో విజయం సాధించింది. గకేబర్హాలో జరిగిన ఈ మ్యాచ్‌లో ఆతిథ్య జట్టు 7 వికెట్ల తేడాతో విజయం సాధించింది. భారత బౌలర్లు అద్భుత‌మైన బౌలింగ్ తో వ‌రుస‌గా వికెట్లు తీసుకున్నారు. ముఖ్యంగా మ‌న స్నిన్న‌ర్లు అద‌ర‌గొట్టేశారు. వ‌రుణ్ చ‌క్ర‌వ‌ర్తి తన 4 ఓవర్లలో 17 పరుగులిచ్చి 5 వికెట్లు తీసుకున్నాడు.
అయితే, ట్రిస్టన్ స్టబ్స్, గెరాల్డ్ కోయెట్జీ సూప‌ర్ బ్యాటింగ్ తో సౌతాఫ్రికాకు విజ‌యాన్ని అందించారు. వీరిద్ద‌రు చివరి వ‌ర‌కు క్రీజులో ఉండి వికెట్లు ప‌డ‌కుండా కాపాడుకుంటూ చివ‌ర‌లో వ‌రుస‌గా బౌండ‌రీలు బాది ఒక ఓవ‌ర్ మిగిలి ఉండ‌గానే సౌతాఫ్రికాకు విజ‌యాన్ని అందించారు. ట్రిస్టన్ స్టబ్స్ 47* ప‌రుగులు, గెరాల్డ్ కోయెట్జీ 19* ప‌రుగుల సౌతాఫ్రికా గెలుపుతో కీల‌కంగా మారాయి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి