IPL2022: అతడు మాకు బేబీ ఏబీడీ.. మిస్టర్ 360 లా ఎదుగుతాడు.. లక్నో యువ బ్యాటర్ పై కెఎల్ రాహుల్ ప్రశంసలు

TATA IPL 2022 Updates: లక్నో సూపర్ జెయింట్స్ యువ బ్యాటర్ ఆయుష్ బదోని తొలి మ్యాచులోనే దుమ్ము రేపాడు.  29 పరుగులకే 4 వికెట్లు కోల్పోయి  పీకల్లోతు కష్టాల్లో ఉన్న ఆ జట్టుకు తన క్లాస్ ఇన్నింగ్స్ తో ఊపిరి పోశాడు. 

ఆడుతున్న తొలి మ్యాచులోనే  తీవ్ర ఒత్తిడి మధ్య బ్యాటింగ్ కే రావడమే గాక ప్రపంచ స్థాయి బౌలర్లను ధీటుగా ఎదుర్కున్న లక్నో సూపర్ జెయింట్స్ యువ బ్యాటర్ ఆయుష్ బదోని పై ఆ జట్టు కెప్టెన్ కెఎల్ రాహుల్ ప్రశంసలు కురిపించాడు. 

అతడు తమ జట్టుకు బేబి ఏబీడీ (ఏబీ డివిలియర్స్) వంటి వాడని కొనియాడాడు. మైదానం నలుమూలలా షాట్లు ఆడే సత్తా ఉన్న ఆటగాడు  బదోని అని అన్నాడు. 

గుజరాత్ తో మ్యాచ్ ముగిసిన అనంతరం రాహుల్ మాట్లాడుతూ... ‘బదోని తన తొలి మ్యాచులోనే అద్భుతంగా రాణించాడు. అతడు మాకు బేబీ ఏబీడీ వంటి వాడు. గ్రౌండ్ నలువైపులా షాట్లు ఆడగల సామర్థ్యమున్న ఆటగాడు బదోని. 

తొలి మ్యాచులో అతడికి ఇచ్చిన అవకాశాన్ని చాలా చక్కగా వినియోగించుకున్నాడు.  నాలుగో  స్థానంలో  బ్యాటింగ్ కు వచ్చి కీలక ఇన్నింగ్స్ ఆడాడు. 

అప్పటికే మా జట్టు పీకల్లోతు కష్టాల్లో ఉన్నా అద్భుత ఇన్నింగ్స్ ఆడాడు. షమీ, లాకీ ఫెర్గూసన్, రషీద్ ఖాన్ వంటి ప్రపంచ స్థాయి బౌలర్లను ధీటుగా ఎదుర్కున్నాడు..’ అని తెలిపాడు. 

కాగా.. గుజరాత్ తో సోమవారం ముగిసిన మ్యాచులో ఆయుష్ బదోని బ్యాటింగ్ కు వచ్చేసరికి లక్నో తీవ్ర ఇబ్బందుల్లో ఉంది. మహ్మద్ షమీ విజృంభణతో  లక్నో.. 29 పరుగులకే నాలుగు వికెట్లు కోల్పోయింది. ఈ నేపథ్యంలో దీపక్ హుడా (41 బంతుల్లో 55) తో కలిసి ఇన్నింగ్స్ ను చక్కదిద్దాడు. 

నిన్నటి మ్యాచులో 41 బంతుల్లోనే 54 పరుగులు చేసి  తొలి హాఫ్ సెంచరీ నమోదు చేసుకున్నాడు. అతడి ఇన్నింగ్స్ లో 4 ఫోర్లు, 3 సిక్సర్లు కూడా ఉన్నాయి. ఈ ఇద్దరి అద్భుత బ్యాటింగ్ తో లక్నో ఆ మాత్రం స్కోరైనా సాధించింది. అయితే  హార్థిక్ పాండ్యా, డేవిడ్ మిల్లర్, మాథ్యూ వేడ్ ల నిలకడైన ఆటకు తోడు రాహుల్ తెవాటియా సంచలన ఇన్నింగ్స్ తో  గుజరాత్  విజయం సొంతం చేసుకుంది.