ఐపీఎల్ 2022 సీజన్‌లో చెన్నై సూపర్ కింగ్స్ అట్టర్ ఫ్లాప్ అయ్యింది. లీగ్ చరిత్రలో తొలిసారి సీజన్‌లో 10 పరాజయాలు అందుకున్న సీఎస్‌కే, నెట్ రన్ రేట్ కాస్త మెరుగ్గా ఉండడం వల్లే 9 స్థానానికి పరిమితమైంది. కెప్టెన్సీ మార్పులు, గాయాలు, వివాదాలు, రాజకీయాలు... చెన్నైని ఈ సీజన్‌లో అతలాకుతలం చేశాయి...
ఐపీఎల్ 2022 సీజన్ ఆరంభంలో సీఎస్‌కే కెప్టెన్సీ నుంచి తప్పుకుంటున్నట్టు ప్రకటించిన ఎమ్మెస్ ధోనీ, ఆ తర్వాత జడేజా ఆ పొజిషన్ నుంచి తప్పుకోవడంతో తిరిగి కెప్టెన్‌‌గా బాధ్యతలు తీసుకున్నాడు...
సీఎస్‌కే కెప్టెన్ మహేంద్ర సింగ్ ధోనీపై కొన్ని ఆసక్తికర వ్యాఖ్యలు చేశాడు ఆ జట్టు మాజీ ఆటగాడు ఎస్ బద్రీనాథ్. ‘ధోనీలో ఓ లక్షణం నాకు బాగా ఇష్టం, కొన్ని సార్లు అదే అస్సలు నచ్చదు.. ఓ థ్రిల్లింగ్ ఫైనల్ మ్యాచ్‌లో మేం అద్భుతంగా ఆడి టైటిల్ గెలిచాం.. అతను ఏమీ మాట్లాడలేదు...
ఎమోషన్ లేకుండా నిలబడ్డాడు. మ్యాచ్ అయ్యాక ట్రోఫీ తీసుకుని, వేరే వాళ్లకి ఇచ్చేసి ఓ మూలకెళ్లి నిలబడ్డాడు. మరో మ్యాచ్‌లో మేం చిత్తుగా ఓడాం...
ఆర్‌సీబీతో జరిగిన మ్యాచ్‌లో 120 పరుగులు కూడా చేయలేక, చెన్నైలోనే ఓడిపోయాం. అప్పుడు కూడా అతను ఏమీ మాట్లాడలేదు. ఎమోషన్ లేకుండా నిలబడ్డాడు. నాకు అదే ఆశ్చర్యమేసింది...
ధోనీ అసలు మనిషేనా. విజయాలు వచ్చనప్పుడు ఉప్పొంగిపోకపోయినా, చిత్తుగా ఓడినప్పుడైనా కాస్త కూస్తో ఫీల్ అవ్వాలిగా... కానీ ఎలాంటి సందర్భాల్లో అయినా అతను కూల్ అండ్ కామ్‌గా ఉంటాడు...
ఎమ్మెస్ ధోనీ సక్సెస్‌కి ఇదే కారణం. మాహీ నుంచి నేను ఎన్నో విషయాలు నేర్చుకున్నా. ముఖ్యంగా ఎమోషన్స్‌ని కంట్రోల్ చేసుకుంటే, చాలా విషయాల్లో క్లారిటీ వస్తుంది...
ఓ మూమెంట్‌ని ఎంజాయ్ చేసేటప్పుడు ఎమోషన్స్‌ చూపిస్తే దొరికిపోతాం. అది ధోనీ దగ్గరే నేర్చుకున్నా. ఇది చాలా పెద్ద విషయం. నేను, ఈ విషయన్ని అలవర్చుకోవడానికి చాలా కష్టపడ్డా. ధోనీ పుట్టుకతో దాన్ని ఒంటబట్టించుకున్నాడు...’ అంటూ కామెంట్ చేశాడు బద్రీనాథ్...
టీమిండియా తరుపున 2 టెస్టులు, 7 వన్డేలు ఆడిన బద్రీనాథ్, ఐపీఎల్‌లో సీఎస్‌కే తరుపున 2008 నుంచి 2013 సీజన్ వరకూ ఆడాడు. ఐపీఎల్‌లో 95 మ్యాచులు ఆడి 67 ఇన్నింగ్స్‌ల్లో 1441 పరుగులు చేశాడు. ఇందులో 11 హాఫ్ సెంచరీలు ఉన్నాయి.