IPL 2022: మా టీమ్ లోకి వచ్చేదాకా అసలు అతడు ఆడగలడా అనుకున్నా.. సీఎస్కే ఆల్ రౌండర్ పై హస్సీ షాకింగ్ కామెంట్స్

TATA IPL2022: చెన్నై సూపర్ కింగ్స్ జట్టులో కీలక ఆల్ రౌండర్ మొయిన్ అలీ.   బ్యాటింగ్ తో పాటు బౌలింగ్ లో కూడా మెరుపులు మెరిపించగల ఈ వెటరన్ ఆటగాడు  ఇటీవలే చెన్నైతో చేరాడు. అయితే  అతడిపై..  

చెన్నై సూపర్ కింగ్స్  వెటరన్ ఆటగాడు మోయిన్ అలీ పై  ఆ  జట్టు బ్యాటింగ్ కోచ్ డేవిడ్ హస్సీ  సంచలన వ్యాఖ్యలు చేశాడు. అలీ.. తమ జట్టులోకి వచ్చేవరకు అతడు ఎలా ఆడతాడో కూడా తనకు  తెలియదని చెప్పుకొచ్చాడు.

ఐపీఎల్ లో  వరుసగా రెండు మ్యాచులు ఓడిన చెన్నై.. ఆదివారం పంజాబ్ తో  మూడో మ్యాచులో తలపడనుంది.  అయితే ఈ మ్యాచ్ కు ముందు  డేవిడ్ హస్సీ ఓ స్పోర్ట్స్ ఛానెల్ తో కీలక వ్యాఖ్యలు చేశాడు. 

హస్సీ మాట్లాడుతూ... ‘నిజంగా చెబుతున్నా..  మోయిన్ అలీ గొప్ప ఆటగాడు.  అతడు సీఎస్కేతో ఆడేదాకా అలీ ఎలా ఆడతాడో నాకు తెలియదు.  గతంలో కూడా నేను అతడి ఆటను చూడలేదు. 

అయితే అలీ చెన్నై జట్టులో చేరిన తర్వాత అతడిని దగ్గర్నుంచి గమనించాను. అప్పుడే తెలిసింది అతడు ఎంత గొప్ప ఆటగాడో..  బౌలింగ్, బ్యాటింగ్ లో అద్భుతంగా రాణించడంలో అలీ దిట్ట.   ముఖ్యంగా బంతిని బలంగా బాదడంలో అలీకి అతడికి అతనే సరిసాటి...’ అని హస్సీ చెప్పుకొచ్చాడు. 

గతేడాది చెన్నై తరఫున ఆడుతూ... 15 మ్యాచులలో 357 పరుగులు చేశాడు. బౌలింగ్ లో 6 వికెట్లు పడగొట్టాడు.  దీంతో ఈ సీజన్ లో సీఎస్కే  అతడిని రూ. 7 కోట్లు వెచ్చించి రిటైన్ చేసుకుంది. 

ఇక ఈ సీజన్ లో చెన్నై వరుసగా రెండు మ్యాచులు ఓడిపోవడానికి గల కారణాలు, ఆ ఓటములు జట్టుపై పడే ప్రభావం గురించి  హస్సీ స్పందించాడు.  ‘అది మాకు అలవాటే. గతంలో కూడా మేము  సీజన్  ప్రారంభ మ్యాచులలో ఓడాం. మేం వాటి గురించి పెద్దగా పట్టించుకోం.   తొలుత జరిగే మ్యాచులు మా ప్రణాళిక ప్రకారం జరుగవు. దాని గురించి పెద్దగా చింతించాల్సిన పన్లేదు.  త్వరలోనే మా అసలైన ఆటను బయటపెడతాం...’అని తెలిపాడు. 

కాగా ఈ సీజన్ లో  భాగంగా వాంఖెడే లో  కేకేఆర్ తో జరిగిన ఓపెనింగ్ మ్యాచ్ లో ఓడిన చెన్నై.. తర్వాత లక్నోతో ముగిసిన మ్యాచ్ లో కూడా దారుణ ఓటమిని మూటగట్టుకుంది.  ఆ జట్టు  ఆదివారం (ఏప్రిల్ 3న)  పంజాబ్ కింగ్స్ తో పోటీకి దిగనుంది.