Team India: వరల్డ్ కప్ పోయింది.. ఏషియన్ గేమ్స్‌లో గోల్డ్ కొట్టాల్సిందే.. ఐదుగురు కొత్త ప్లేయర్లకు బంపర్ ఛాన్స్ !

Team India: వరల్డ్ కప్ ఫ్లాప్ షో తర్వాత ఏషియన్ గేమ్స్ 2026 కోసం భారత మహిళల క్రికెట్ జట్టును బీసీసీఐ ప్రకటించింది. హర్మన్‌ప్రీత్ కౌర్ కెప్టెన్సీలో టీమిండియా గోల్డ్ మెడల్ కాపాడుకునేందుకు బరిలోకి దిగుతోంది.

ఏషియన్ గేమ్స్ 2026: సరికొత్త మిషన్‌కు టీమిండియా రెడీ

టీ20 ప్రపంచకప్ 2026లో సెమీఫైనల్‌కు చేరకుండానే నిష్క్రమించిన భారత మహిళల క్రికెట్ జట్టు ముందర ఇప్పుడు ఒక సరికొత్త మిషన్ ఉంది. జపాన్‌లోని ఐచి-నాగోయా లలో జరగబోయే ఏషియన్ గేమ్స్ 2026 కోసం భారత మహిళల క్రికెట్ జట్టును అధికారికంగా ప్రకటించారు. ఈ మెగా టోర్నీ కోసం సెలెక్టర్లు మొత్తం 15 మంది సభ్యులతో కూడిన బలమైన జట్టును ఎంపిక చేశారు. స్టార్ బ్యాటర్ స్మృతి మంధాన ఈ జట్టుకు వైస్ కెప్టెన్‌గా వ్యవహరించనుంది.

గత ఏషియన్ గేమ్స్ (2023) చైనాలోని హాంగ్‌జౌలో జరిగాయి. ఆ టోర్నీ ఫైనల్లో శ్రీలంకను ఓడించి భారత్ గోల్డ్ మెడల్ సాధించింది. ఈసారి ఏషియన్ గేమ్స్‌లో భారత మహిళల జట్టు డిఫెండింగ్ ఛాంపియన్‌గా బరిలోకి దిగుతోంది. ఇప్పుడు కెప్టెన్ హర్మన్‌ప్రీత్ కౌర్, ఆమె సేనపై తమ బంగారు పతకాన్ని కాపాడుకోవాల్సిన బాధ్యత ఉంది.

యువత, అనుభవాల పర్ఫెక్ట్ కాంబినేషన్ తో టీమిండియా

మొత్తం 8 జట్ల మధ్య జరిగే ఈ ఉత్కంఠభరిత పోరు టీ20 ఫార్మాట్‌లో సాగనుంది. ఈ టోర్నీ కోసం సెలెక్టర్లు సీనియర్ ఆటగాళ్లతో పాటు, డొమెస్టిక్ క్రికెట్‌లో రాణించిన పలువురు యువ ముఖాలకు కూడా జట్టులో చోటు కల్పించారు. జట్టు మెయిన్ బ్యాటింగ్ లైనప్‌లో స్మృతి మంధాన, షెఫాలీ వర్మ, జెమిమా రోడ్రిగ్స్, కెప్టెన్ హర్మన్‌ప్రీత్ కౌర్, వికెట్ కీపర్ బ్యాటర్ రిచా ఘోష్ ఉన్నారు.

స్పిన్, ఆల్‌రౌండ్ బాధ్యతలను దీప్తి శర్మ, రాధా యాదవ్ చూసుకోనున్నారు. పేస్ బౌలింగ్ విభాగాన్ని రేణుకా ఠాకూర్ లీడ్ చేయనుంది. వీటితో పాటు డొమెస్టిక్ సర్క్యూట్‌లో అదరగొట్టిన జి. కమలిని, భారతి ఫుల్మాలి, శ్రీ చరణి, క్రాంతి గౌడ్, నందిని శర్మలకు ఈ మెగా టోర్నీలో తమను తాము నిరూపించుకోవడానికి గోల్డెన్ ఛాన్స్ దక్కింది.

శ్రేయాంక పాటిల్ ఎంపికపై సస్పెన్స్

స్పిన్ ఆల్‌రౌండర్ శ్రేయాంక పాటిల్‌ను 15 మంది సభ్యుల ప్రధాన జట్టులోకి తీసుకున్నప్పటికీ, ఆమె ఎంపిక పూర్తిగా ఫిట్‌నెస్ క్లియరెన్స్‌ పై ఆధారపడి ఉంటుంది. ప్రస్తుతం మెడికల్ టీమ్ పర్యవేక్షణలో ఉన్న శ్రేయాంకకు, అక్కడి నుంచి గ్రీన్ సిగ్నల్ లభిస్తేనే ఆమె జపాన్‌కు విమానం ఎక్కనుంది.

మ్యాచ్‌లు ఎప్పుడు? ఎక్కడ జరుగుతాయి?

జపాన్‌లోని ఐచి-నాగోయాలో జరిగే ఈ ఏషియన్ గేమ్స్ మహిళల క్రికెట్ టోర్నమెంట్ యాక్షన్ 2026 సెప్టెంబర్ 17 నుండి సెప్టెంబర్ 22 వరకు సాగనుంది. ఈ షార్ట్ అండ్ హై-వోల్టేజ్ టోర్నమెంట్‌లోని అన్ని మ్యాచ్‌లు నాగోయాలోని అందమైన కొరోజి స్పోర్ట్స్ పార్క్‌లో జరగనున్నాయి. వరల్డ్ కప్ ఫ్లాప్ షోను మర్చిపోయి, అభిమానులకు మళ్లీ జోష్ ఇవ్వడానికి ఈ టోర్నీ టీమిండియాకు చాలా ముఖ్యం.

ఏషియన్ గేమ్స్ 2026 కోసం పూర్తి భారత మహిళల జట్టు:

హర్మన్‌ప్రీత్ కౌర్ (కెప్టెన్), స్మృతి మంధాన (వైస్ కెప్టెన్), షెఫాలీ వర్మ, జెమిమా రోడ్రిగ్స్, దీప్తి శర్మ, రిచా ఘోష్ (వికెట్ కీపర్), జి. కమలిని (వికెట్ కీపర్), భారతి ఫుల్మాలి, శ్రీ చరణి, రేణుకా ఠాకూర్, క్రాంతి గౌడ్, అరుంధతి రెడ్డి, శ్రేయాంక పాటిల్, రాధా యాదవ్, నందిని శర్మ.