IND vs BAN : భారత్-బంగ్లాదేశ్ తొలి టెస్టులో స్టార్ బ్యాట‌ర్లు విఫ‌ల‌మైన దారుణ ప‌రిస్థితుల మధ్య భారత స్పిన్నర్లు రవిచంద్రన్ అశ్విన్, రవీంద్ర జడేజాలు అద్భుతమైన ఇన్నింగ్స్ లతో బంగ్లాదేశ్ కు బిగ్ షాకిచ్చారు.
Ravichandran Ashwin Super century : భారత్-బంగ్లాదేశ్ మధ్య రెండు మ్యాచ్‌ల టెస్ట్ సిరీస్ గురువారం ప్రారంభం అయింది. చెన్నైలోని ఎంఏ చిదంబరం స్టేడియంలో జరిగిన ఈ మ్యాచ్ తొలి రోజు బంగ్లాదేశ్ జట్టు టాస్ గెలిచి బౌలింగ్ ఎంచుకుంది. దీంతో బ్యాటింగ్ కు దిగిన భారత్ కు ఆరంభంలోనే బిగ్ షాక్ త‌గిలింది.
బిగ్ స్టార్లు చేతులెత్తేశారు
భారత తొలి ఇన్నింగ్స్ లో స్టార్ బ్యాట‌ర్లు వ‌రుస‌గా పెవిలియ‌న్ బాట‌ప‌ట్టారు. భారత్ 150 పరుగులైనా పూర్తి చేస్తుందా అనే టెన్షన్ భారత అభిమానుల్లో ఉన్న స‌మ‌యంలో బ్యాటింగ్ కు వచ్చిన రవిచంద్రన్ అశ్విన్, రవీంద్ర జడేజాలు దుమ్మురేపే ఇన్నింగ్స్ తో అద‌ర‌గొట్టారు. బంగ్లాదేశ్ కు దిమ్మతిరిగే షాకిచ్చారు.
బంగ్లాదేశ్ తో జ‌రుగుతున్న ఫ‌స్ట్ టెస్టు మొదటి రోజు బ్యాటింగ్ కు దిగగా, స్టార్ బ్యాట్స్‌మెన్ ఫ్లాప్ షో చూపించారు. విరాట్, రోహిత్, గిల్ లు సింగిల్ డిజిట్ కే పరిమితం అయ్యారు. దీంతో భారత అభిమానుల్లో టెన్షన్ పెరిగింది. అయితే 7 స్థానంలో బ్యాటింగ్‌కు వచ్చిన ఆర్‌ అశ్విన్ అద్భుతమైన సెంచరీ సాధించి విజిటింగ్‌ జట్టును బిగ్ షాకిచ్చాడు. రికార్డుల మోత మోగించాడు.
బంగ్లాదేశ్ కు సూపర్ ఆరంభం-కాసేపు అడ్డుపడ్డ జైస్వాల్-పంత్
తొలిరోజు మొదటి సెషన్‌లో ఆతిథ్య జట్టు అద్భుతమైన ఆరంభంతో అద‌ర‌గొట్టింది. స్టార్ ప్లేయ‌ర్లు విరాట్ కోహ్లీ, రోహిత్ శ‌ర్మ, శుభ్ మ‌న్ గిల్, రిష‌బ్ పంత్ ల‌ను పెద్ద పరుగులు చేయ‌కుండా అడ్డుకుంది. గిల్ 0, రోహిత్ శ‌ర్మ 6, విరాట్ కోహ్లీ 6 పరుగులు మాత్ర‌మే చేసి పెవిలియ‌న్ కు చేరారు. ఆ త‌ర్వాత యంగ్ ప్లేయర్ య‌శ‌స్వి జైస్వాల్-రిష‌బ్ పంత్ లు భారత ఇన్నింగ్స్ ను చక్క‌దిద్దే ప్ర‌యత్నం చేశారు.
ఈ క్ర‌మంలోనే జైస్వాల్ 56 పరుగులు చేసి ఔట్ అయ్యాడు. రిష‌బ్ పంత్ 39 ప‌రుగుల‌కు ఔట్ అయ్యాడు. ఆ త‌ర్వాత బ్యాటింగ్ కు వచ్చిన కేఎల్ రాహుల్ 16 ప‌రుగుల‌కే పెవిలియ‌న్ చేరాడు. దీంతో భారత్ క‌ష్టాలు మ‌రింత పెరిగాయి. ఈ స‌మ‌యంలో భారత స్పిన్నర్లు రవిచంద్రన్ అశ్విన్-రవీంద్ర జడేజాలు అద్భుత బ్యాటింగ్ తో భారత్ స్కోర్ బోర్డును పరుగులు పెట్టించారు.
రవిచంద్రన్ అశ్విన్ సూపర్ సెంచరీ-జడేజా అద్భుత బ్యాటింగ్
అశ్విన్ సెంచరీతో మ‌రోసారి తన బ్యాటింగ్ విశ్వ‌రూపం చూపించ‌గా, జడేజా హాఫ్ సెంచరీ పూర్తి చేసుకుని సెంచరీ దిశ‌గా ముందుకు సాగుతున్నాడు. అశ్విన్ టెస్టు కెరీర్‌లో అత్యంత వేగవంతమైన సెంచరీని ఇక్క‌డ న‌మోదు చేశాడు. తన కెరీర్ లో ఇది ఆరో సెంచరీ కావ‌డం విశేషం. ఇంతకు ముందు భారత గడ్డపై మూడు సెంచరీలు చేశాడు.
బంగ్లాదేశ్‌పై 108 బంతుల్లో సెంచరీ పూర్తి చేసిన అశ్విన్ తన కెరీర్‌లో ఫాస్టెస్ట్ సెంచరీని పూర్తి చేసి పెద్ద మైలురాయిని సాధించాడు. మూడో సెషన్‌లో జడేజా, అశ్విన్‌ల సెంచరీ భాగస్వామ్యం బంగ్లాదేశ్‌ను మోకరిల్లేలా చేసింది. తొలి రోజు ఆట ముగిసే వరకు అశ్విన్ 10 ఫోర్లు, 2 సిక్సర్లతో 102 పరుగులతో నాటౌట్ గా నిలిచాడు.
అశ్విన్ తో పాటు మరో ఎండ్ లో జడేజా కూడా తన బ్యాట్ ప‌దును చూపించాడు. తొలి రోజు ఆట ముగిసే సమయానికి భారత జట్టు స్కోరు బోర్డుపై 339 పరుగులు చేసింది. అశ్విన్, జడేజా మధ్య 195 పరుగుల భాగస్వామ్యం కనిపించింది. జడేజా 86 పరుగులతో నాటౌట్ గా నిలిచాడు. తన ఇన్నింగ్స్ లో 10 ఫోర్లు, 2 సిక్సర్లు బాదాడు.
అశ్విన్ భారత్ తరఫున 100 టెస్టులు ఆడాడు. బంగ్లాదేశ్‌తో జరిగిన 101వ టెస్టును అశ్విన్ తనకు గుర్తుండిపోయేలా చేశాడు. 100వ టెస్టులో తన బంతితో అద్భుతాలు చేశాడు. బంగ్లాదేశ్ తో టెస్టులో తొలి రోజే సెంచరీ కొట్టిన అశ్విన్ రెండో రోజు ఇంకా ఎన్ని పరుగులు చేస్తాడన్నది ఇప్పుడు ఆసక్తికరంగా మారింది. మ‌స్తు జోష్ లో ఉన్న అశ్విన్-జడేజా జోడీని విడ‌గొట్టాలంటే బంగ్లాదేశ్ చాలా క‌ష్ట‌ప‌డాల్సిందేన‌నే హెచ్చ‌రిక‌లు వీరిద్ద‌రూ ఇప్పటికే పంపారు.