Bcci removes impact player rule : సయ్యద్ ముస్తాక్ అలీ ట్రోఫీ నుంచి 'ఇంపాక్ట్ ప్లేయర్ రూల్'ను భారత క్రికెట్ కంట్రోల్ బోర్డు (బీసీసీఐ) రద్దు చేసింది. దీంతో ఈ నిబంధన ఐపీఎల్‌లో వర్తిస్తుందా లేదా అక్కడ నుంచి కూడా తొల‌గిస్తారా? అనేది ఇప్పుడు పెద్ద ప్ర‌శ్న. ఇదే సమయంలో ఎంఎస్ ధోని విష‌యం కూడా హాట్ టాపిక్ అవుతోంది.
Bcci removes impact player rule - MS Dhoni: ఇండియన్ ప్రీమియర్ లీగ్ కొత్త సీజన్ (ఐపీఎల్ 2025) కు ముందు భారత క్రికెట్ నియంత్రన మండ‌లి (బీసీసీఐ) పెద్ద బాంబు పెల్చింది. 'ఇంపాక్ట్ ప్లేయర్ రూల్' ను తొల‌గిస్తూ నిర్ణయం తీసుకుంది. సయ్యద్ ముస్తాక్ అలీ టీ20 (SMT T20) టోర్న‌మెంట్ లో ఇంపాక్ట్ ప్లేయర్ నిబంధనను రద్దు చేయాలని బీసీసీఐ నిర్ణయం తీసుకుంది.
అయితే, ఈ ఇంపాక్ట్ ప్లేయర్ రూల్ ఐపీఎల్ తదుపరి మూడు సీజన్లకు అమల్లో ఉంటుంద‌ని ఇది వరకు తెలిపింది. కానీ, తాజా నిర్ణ‌యంతో రాబోయే ఐపీఎల్ సీజన్ లో ఈ రూల్ ఉంటుందా? ఉండ‌దా? అనేది ఆస‌క్తిని పెంచుతోంది. బీసీసీఐ కొన్ని సంవత్సరాల క్రితం సయ్యద్ ముస్త‌క్ అలీ టీ20 ట్రోఫీలో ఇంపాక్ట్ ప్లేయర్ రూల్ ను తీసుకువ‌చ్చింది. ఆ తరువాత ఇండియన్ ప్రీమియర్ లీగ్ (ఐపీఎల్) లో కూడా దీనిని అమలు చేసింది.
ఇంపాక్ట్ ప్లేయర్ రూల్ పై విమ‌ర్శ‌లు-ప్ర‌శంస‌లు
ప్రస్తుత సయ్యద్ ముస్త‌క్ అలీ ట్రోర్న‌మెంట్ సీజన్‌లో 'ఇంపాక్ట్ ప్లేయర్' నిబంధనను రద్దు చేయాలని నిర్ణయించినట్లు బీసీసీఐ సోమవారం రాష్ట్ర క్రికెట్ సంఘాల‌కు తెలియజేసింది. ఇంపాక్ట్ ప్లేయర్ రూల్ ను ఐపీఎల్‌లో తదుపరి మూడు సీజన్లకు అంటే 2027 వరకు కొనసాగించాలని నిర్ణయం తీసుకున్న తర్వాత ఇప్పుడు దేశ‌వాళీ టోర్నీ నుంచి తొలగించాలని బీసీసీఐ నిర్ణయం తీసుకోవడం గమనార్హం.
2023 సీజన్‌లో ఇది అమలులోకి వచ్చినప్పటి నుండి, ఈ నియమం అసలు ఉద్దేశం అయిన భారత క్రికెట్‌కు వాస్తవానికి ప్రయోజనకరంగా ఉందా లేదా ఆల్ రౌండర్ల అభివృద్ధికి హాని కలిగిస్తుందా అనే దానిపై కొత్త చర్చకు దారితీసింది. రోహిత్ శర్మ, విరాట్ కోహ్లీ వంటి చాలా మంది ఉన్నత స్థాయి ఆటగాళ్లు ఈ నిబంధనపై ఆందోళన వ్యక్తం చేశారు. ఇది ఆల్ రౌండర్ల అభివృద్ధికి హానికరమ‌ని పేర్కొన్నారు. ఇదే సమయంలో రవిచంద్రన్ అశ్విన్ సహా ప‌లువురు ఇంపాక్ట్ ప్లేయర్ రూల్ ను బహిరంగంగానే ప్రశంసించారు.
అసలు ఈ "ఇంపాక్ట్ ప్లేయర్ రూల్" ఏమిటి?
"ఇంపాక్ట్ ప్లేయర్ రూల్" ఐపీఎల్ 2023లో బీసీసీఐ అమల్లోకి తీసుకువ‌చ్చింది. అయితే, అంతకు ముందే ఈ రూల్ ను సయ్యద్ ముస్తాక్ అలీ ట్రోఫీ 2022-23 (SMAT 2022-23)లో అమలు చేశారు. ఆ తర్వాత ఐపీఎల్‌లో ఈ నిబంధన అమల్లోకి వచ్చింది. 'ఇంపాక్ట్ ప్లేయర్ రూల్' ప్రకారం ప్లేయింగ్ ఎలెవన్ కాకుండా ఇరు జట్లూ 5-5 మంది సబ్‌స్టిట్యూట్ ప్లేయర్‌లను పేర్కొనాలి. ఈ ఐదుగురిలో ఒకరు ఇంపాక్ట్ ప్లేయర్‌గా ఫీల్డ్ చేయబడతారు. ఇంపాక్ట్ ప్లేయర్ బ్యాటింగ్, బౌలింగ్ రెండింటినీ చేస్తాడు. ఇంపాక్ట్ ప్లేయర్ తర్వాత బయటకు వెళ్ళే ఆటగాడు గేమ్‌లోకి వస్తాడు. మొత్తం మ్యాచ్‌లో అతన్ని ఉపయోగించ‌లేరు. అంటే మొత్తంగా బ్యాటింగ్ సమయంలో అవసరమైతే ఒక స్టార్ బ్యాటర్ ను, బౌలింగ్ సమయంలో అవసరమైతే ఒక స్టార్ బౌలర్ ను మ్యాచ్ పరిస్థితులను బట్టి ప్లేయింగ్ 11 తో సంబంధం లేకుండా ఉపయోగించుకోవచ్చు.
ఐపీఎల్ టీమ్ చెన్నై స్టార్ ప్లేయర్ ఎంఎస్ ధోనిపై ఇంపాక్ట్ ప్లేయర్ రూల్ ప్ర‌భావం ఏమిటి?
'ఇంపాక్ట్ ప్లేయర్' నియమం టీమిండియా, చెన్నై సూపర్ కింగ్స్ (CSK) మాజీ కెప్టెన్ ఎంఎస్ ధోని సహా ప‌లువురు స్టార్లు ఈ లీగ్ లో త‌మ కెరీర్‌ను పొడిగించడానికి సహాయపడింది. ఐపీఎల్ 2023, 2024 సీజన్లలో గత సంవత్సరం శస్త్రచికిత్స చేయాల్సిన మోకాలి గాయం కారణంగా ధోని కొన్ని సార్లు 'ఇంపాక్ట్ ప్లేయర్' పాత్ర నుండి ప్రయోజనం పొందాడు.
ఇది ప్రతి మ్యాచ్‌లో కొన్ని డెలివరీల పాటు బ్యాటింగ్‌లో నెం. 7, 8 లేదా 9 వద్ద బ్యాటింగ్ చేయడానికి ధోనీకి వెసులుబాటును కల్పించింది. బంతిని తనకు నచ్చిన విధంగా స్లాగ్ చేయడానికి అవ‌కాశం క‌ల్పిస్తుంది. దీంతో సీఎస్కే త‌న వికెట్ కీపింగ్, నాయకత్వ సామర్థ్యాలను ఒక బ్యాటర్‌గా ఎక్కువ ఒత్తిడి లేకుండా ఉపయోగించుకోగలిగింది. ఐపీఎల్ 2025 వచ్చే సమయానికి ధోనీ వయస్సు 43 సంవత్సరాలు. అంటే ధోని ఐపీఎల్ కెరీర్ కోసం 'ఇంపాక్ట్ ప్లేయర్' నియమం చాలా కీలకం.
ఐపీఎల్‌లో 'ఇంపాక్ట్ ప్లేయర్' నిబంధనను కూడా ముగించాలని బీసీసీఐ నిర్ణయించుకుంటే, అది ధోనీ కెరీర్ ముగింపు రహదారి కావ‌చ్చు. అలాగే, రాబోయే సీజన్‌లో రూ. 4 కోట్లకు సీఎస్కే తో 'అన్‌క్యాప్డ్' ఆటగాడిగా సంతకం చేయడానికి ధోనీ అంగీకరిస్తాడో లేదో చూడాలి. అన్ క్యాప్డ్ ప్లేయర్ రూల్ కారణంగా ధోని ఐపీఎల్ లో అందుకునే రూ.12 కోట్లు కాకుండా 4 కోట్ల రూపాయ‌లు మాత్ర‌మే అందుకుంటాడు. ఇలాంటి త‌రుణంలో ఇంపాక్ట్ ప్లేయర్ రూల్, అన్ క్యాప్డ్ ప్లేయర్ రూల్ ప్ర‌భావం మ‌ధ్య ధోని ఎలాంటి నిర్ణయం తీసుకుంటార‌నేది ఆస‌క్తిని పెంచుతోంది.
ఇదిలావుండ‌గా, రోహిత్ శర్మ, విరాట్ కోహ్లీ సహా ప‌లువురు క్రీడాకారులు ఇంపాక్ట్ ప్లేయర్ రూల్ పై త‌మ స్పంద‌న‌లు తెలియ‌జేసిన క్ర‌మంలో.. ఈ ఏడాది మేలో బీసీసీఐ మాజీ సెక్రటరీ, ప్రస్తుత ఐసీసీ చీఫ్ జై షా ఐపీఎల్‌లో ఈ నిబంధనను 'టెస్ట్ కేసు'గా అభివర్ణించారు. ఇంపాక్ట్ ప్లేయర్ రూల్ శాశ్వతం కాదనీ, దానిని రద్దు చేస్తామని చెప్పారు. బీసీసీఐ తాజా నిర్ణయాన్ని సౌరాష్ట్ర ప్రధాన కోచ్ నీరజ్ ఒడెద్రా స్వాగతించారు. ఇది మంచి మార్పు అని అన్నారు. ఐసీసీ ప్రధాన టోర్నమెంట్లలో ఇంపాక్ట్ ప్లేయర్ రూల్ ఉండ‌దు కాబట్టి దేశీయ సీజన్ తర్వాత భారతదేశం కోసం ఆడాలనుకునే క్రికెటర్లకు ఇది నిర్ణ‌యమ‌ని ఆయ‌న పేర్కొన్నారు.