Petrol Pump Business: పెట్రోల్, డీజిల్కు ఎప్పటికీ డిమాండ్ ఉండటంతో పెట్రోల్ బంక్ వ్యాపారం బెస్ట్ ఆప్షన్ గా భావిస్తారు. ఈ నేపథ్యంలో పెట్రోల్ బంక్ వ్యాపారాన్ని ఎలా ప్రారంభించాలి.? ఎంత పెట్టుబడి కావాలి.? లాభాలు ఎలా ఉంటాయి.? ఇప్పుడు తెలుసుకుందాం.
పెట్రోల్, డీజిల్ను ప్రజలకు విక్రయించడానికి ప్రభుత్వం, ఆయిల్ కంపెనీలు ఇచ్చే అధికారిక అనుమతినే పెట్రోల్ బంక్ లైసెన్స్ అంటారు. ఎవరైనా స్వయంగా పెట్రోల్ బంక్ ప్రారంభించలేరు. ఇందుకు ఆయిల్ మార్కెటింగ్ కంపెనీల నుంచి డీలర్షిప్ పొందాలి. ప్రధానంగా ఇండియన్ ఆయిల్ (IOC), భారత్ పెట్రోలియం (BPCL), హిందుస్తాన్ పెట్రోలియం (HPCL) వంటి సంస్థలు డీలర్షిప్లు మంజూరు చేస్తాయి. వీటితో పాటు పెట్రోలియం అండ్ ఎక్స్ప్లోసివ్స్ సేఫ్టీ ఆర్గనైజేషన్ (PESO), ఫైర్ డిపార్ట్మెంట్, స్థానిక సంస్థల నుంచి కూడా అనుమతులు అవసరం.
25
పెట్రోల్ బంక్ కోసం ఎవరు దరఖాస్తు చేసుకోవచ్చు?
భారతీయ పౌరులెవరైనా కొన్ని అర్హతలు పూర్తి చేస్తే పెట్రోల్ బంక్ డీలర్షిప్కు దరఖాస్తు చేసుకోవచ్చు. సాధారణంగా దరఖాస్తుదారుడి వయస్సు 21 నుంచి 60 సంవత్సరాల మధ్య ఉండాలి. కనీస విద్యార్హత ఉండాలి. ఆర్థికంగా స్థిరంగా ఉండటంతో పాటు చట్టపరమైన వివాదాలు లేకపోవడం కూడా ముఖ్యం. కొన్ని సందర్భాల్లో వ్యాపార నిర్వహణ అనుభవం, ఆర్థిక సామర్థ్యం వంటి అంశాలను కూడా ఆయిల్ కంపెనీలు పరిశీలిస్తాయి. డీలర్షిప్ ఎంపికలో రిజర్వేషన్ కేటగిరీలు, ప్రత్యేక వర్గాలకు కూడా అవకాశాలు ఉంటాయి.
35
భూమి, పెట్టుబడి అవసరాలు..
పెట్రోల్ బంక్ వ్యాపారంలో అత్యంత కీలకమైన అంశం భూమి. దరఖాస్తుదారుడి సొంత భూమి కావచ్చు లేదా దీర్ఘకాలిక లీజులో తీసుకున్న భూమి కావచ్చు. రహదారిపై మంచి ట్రాఫిక్ ఉండే ప్రాంతాల్లో భూమి ఉండటం అవసరం. జాతీయ రహదారులు, రాష్ట్ర రహదారులు లేదా ప్రధాన రోడ్లపై ఉన్న స్థలాలకు ఎక్కువ ప్రాధాన్యం ఇస్తారు. భూమి పరిమాణం పట్టణం, గ్రామీణ ప్రాంతం, రోడ్ రకం ఆధారంగా మారుతుంది.
పెట్టుబడి విషయానికి వస్తే గ్రామీణ ప్రాంతాల్లో సుమారు రూ.50 లక్షల నుంచి రూ.1 కోటి వరకు అవసరం కావచ్చు. పట్టణ ప్రాంతాల్లో అయితే రూ.1.5 కోట్ల నుంచి రూ.2 కోట్ల వరకు పెట్టుబడి అవసరమవుతుంది. ఇందులో భూమి అభివృద్ధి, నిర్మాణ పనులు, ఇంధన నిల్వ ట్యాంకులు, డిస్పెన్సింగ్ యూనిట్లు, భద్రతా పరికరాలు, ప్రారంభ నిర్వహణ ఖర్చులు ఉంటాయి.
మొదట ఆయిల్ కంపెనీలు తమ అధికారిక వెబ్సైట్లు, పత్రికల ద్వారా డీలర్షిప్ ప్రకటనలు విడుదల చేస్తాయి. ఆసక్తి ఉన్న వారు ఆన్లైన్లో దరఖాస్తు చేసుకోవాలి. ఇందులో వ్యక్తిగత వివరాలు, భూమి వివరాలు, కేటగిరీ సమాచారం ఇవ్వాలి. అనంతరం డ్రా లేదా ఎంపిక ప్రక్రియ ద్వారా అభ్యర్థులను ఎంపిక చేస్తారు.
ఎంపికైన తర్వాత ఆయిల్ కంపెనీ భూమిని పరిశీలించి అది నిబంధనలకు అనుగుణంగా ఉందో లేదో ధృవీకరిస్తుంది. ఆ తర్వాత PESO, ఫైర్ డిపార్ట్మెంట్, స్థానిక మున్సిపల్ సంస్థలు, అవసరమైతే కాలుష్య నియంత్రణ శాఖ నుంచి అనుమతులు తీసుకోవాలి. అన్ని అనుమతులు పూర్తైన తర్వాత పెట్రోల్ బంక్ నిర్మాణం జరుగుతుంది. చివరగా అధికారులు తనిఖీ చేసి లైసెన్స్ జారీ చేస్తారు. అనంతరం ఇంధన సరఫరా ప్రారంభమవుతుంది.
55
లాభాలు ఎలా ఉంటాయి.?
పెట్రోల్ బంక్ ఆదాయం ప్రధానంగా రోజువారీ ఇంధన విక్రయాలపై ఆధారపడి ఉంటుంది. ఆయిల్ కంపెనీలు లీటరుకు నిర్దిష్ట మార్జిన్ ఇస్తాయి. ఎక్కువ విక్రయాలు జరిగే ప్రాంతాల్లో ఆదాయం కూడా ఎక్కువగా ఉంటుంది. అదనంగా ఎయిర్ ఫిల్లింగ్, కన్వీనియన్స్ స్టోర్, వాహన సేవలు వంటి సదుపాయాల ద్వారా కూడా అదనపు ఆదాయం పొందవచ్చు. అయితే సరైన భూమి పత్రాలు లేకుండా దరఖాస్తు చేయడం, తక్కువ ట్రాఫిక్ ఉన్న ప్రాంతాన్ని ఎంపిక చేసుకోవడం, భద్రతా నిబంధనలను పట్టించుకోకపోవడం, పెట్టుబడి అంచనాలను తక్కువగా వేయడం వంటి పొరపాట్లు చేయకూడదు. సరైన ప్రణాళికతో ముందుకు వెళితే పెట్రోల్ బంక్ వ్యాపారం దీర్ఘకాలంలో మంచి ఆదాయం అందించే వ్యాపార అవకాశంగా మారుతుంది.
