Evil eye Stone: మీకు నరదిష్టి తగలకూడదనుకుంటే ఈ రత్నం ధరించండి

Evil eye Stone: నర దిష్టికి నాపరాయి కూడా పగులుతుందని అంటారు. అలాంటి నరదిష్టి నుంచి మిమ్మల్ని మీరు కాపాడుకోవాలంటే ఫిరోజా రత్నం అద్భుతంగా పనిచేస్తుంది. దీన్ని ఎలా ధరించాలో తెలుసుకోండి. 

నరదిష్టితో నష్టాలు

నరదిష్టి అంటే చెడు చూపు. ఎవరికైనా మంచి జరుగుతున్నప్పుడు, వారు ఉన్నత స్థాయికి ఎదుగుతున్నప్పుడు వారిని చెడు చూపుతో చూస్తూ దిష్టి పెడుతూ ఉంటారు. దీనివల్ల ఉద్యోగంలో ఆటంకాలు, జీవితంలో కష్టాలు, వ్యాపారంలో నష్టాలు, ఆరోగ్య సమస్యలు, జీవితంలో అశాంతి వంటివి పెరిగిపోతూ ఉంటాయి. వీటికి నరదిష్టే కారణమని చెబుతూ ఉంటారు. అలాంటి నరదిష్టి నుంచి రక్షణ కోసం జ్యోతిష శాస్త్రంలో కొన్ని రత్నాలను సూచించారు. అందులో ముఖ్యంగా చెప్పుకునేది ఫిరోజా రత్నం. ఫిరోజా రత్నం ధరించడంవల్ల చెడు శక్తులు దగ్గరకు రావు. నెగటివ్ ఎనర్జీ నుంచి కూడా రక్షణ లభిస్తుంది.

ఫిరోజా రత్నం అంటే ఏమిటి?

ఫిరోజా రత్నం చూడడానికి ఆకుపచ్చ, నీలం రంగు కలిపి కనిపిస్తుంది. ఈ రత్నాన్ని రక్షణకు వేసుకుంటారు. పూర్వకాలంలో రాజులు, యోధులు కూడా దీన్ని ధరించే వారని జ్యోతిష్య గ్రంథంలో చెబుతారు. నరదిష్టి, చెడు శక్తులు, అనుకోని ప్రమాదాల నుంచి కాపాడే శక్తి దీనికి ఉందని అంటారు. ఫిరోజా రత్నం మన చుట్టూ ఒక రక్షణ వలయాన్ని ఏర్పరుస్తుంది. ప్రతికూల శక్తులు మనపై పడకుండా అడ్డుకుంటుంది. అందుకే తరచూ సమస్యల బారిన పడుతున్న వారు, కారణం తెలియకుండా ఇబ్బందులు పడుతున్న వారు ఈ రత్నాన్ని ధరిస్తే ఉత్తమమని అంటారు.

పిల్లలకు తాయెత్తు రూపంలో

జ్యోతిష శాస్త్రం చెబుతున్న ప్రకారం నరదిష్టి తగిలినప్పుడు మనసులో ఆందోళన ఎక్కువైపోతుంది. అనవసర భయాలు కలుగుతాయి. ఫిరోజా రత్నం ధరిస్తే మనసుకు ప్రశాంతత లభిస్తుంది. ఆత్మవిశ్వాసం పెరుగుతుంది. ముఖ్యంగా ఎదుగుతున్న వ్యాపారులు, ఉద్యోగంలో మంచి స్థాయికి చేరుకుంటున్న వారు, జనాల్లో అధికంగా తిరిగేవారికి నరదిష్టి తగిలే అవకాశం ఉంటుంది. అలాంటివారు ఈ రత్నాన్ని ధరించడం వల్ల చెడు చూపు చాలా వరకు తగ్గుతుంది. వీరి జీవితంలో సానుకూల శక్తి పెరుగుతుంది. అలాగే పిల్లలకు కూడా నరదిష్టి తగలకుండా ఫిరోజాను తాయెత్తు రూపంలో ధరింప చేస్తే మంచిది.

ఎలా ధరించాలి?

ఫిరోజా రత్నాన్ని బ్రాస్లెట్ గా లేదా ఉంగరం రూపంలో, మెడలో పెండెంట్ రూపంలో వేసుకోవచ్చు. దీన్ని ధరించేటప్పుడు కొన్ని నియమాలు మాత్రం పాటించాలి. శుభసమయంలో, శుభదినంలో మాత్రమే వీటిని ధరించాలి. ధరించే ముందు ఈ రత్నాన్ని శుద్ధి చేయాలి. రత్నాన్ని పూర్తి నమ్మకంతో ధరిస్తే మంచి ఫలితాలు వస్తాయి. నరదిష్టి నుంచి రక్షణ కావాలనుకునే వారు.. ఒకసారి జ్యోతిష నిపుణులను కలిసి ఈ ఫిరోజా రత్నాన్ని ధరిస్తే అన్ని విధాలా మంచిది.