Tirumala Laddu : తిరుమల లడ్డూ రికార్డు సేల్... ఈ జూన్ లో ఎన్ని అమ్ముడయ్యాయో తెలుసా?

ఆదాయం, భక్తుల సంఖ్యలోనే కాదు ఇప్పుడు పవిత్రమైన లడ్డూల అమ్మకాల్లోనూ తిరుమల తిరుపతి దేవస్థానం రికార్డులు నెలకొల్పుతోంది. ఈ జూన్ 2026 లో ఎన్ని లడ్డూలు అమ్మారో తెలుసా?

తిరుమల లడ్డూ విక్రయాల్లో రికార్డు

Tirumala Laddu : హిందువులు కలియుగ వైకుంఠంగా భావించే తిరుమలకు వెళితే ఓ నాలుగు పనులు తప్పకుండా చేస్తారు. ఒకటి ఎంత రద్దీ ఉన్నా వెంకటేశ్వరస్వామి దర్శించుకోవడం, రెండోది భక్తితో తలనీలాలు సమర్పించుకోవడం, మూడోది తోచినంత డబ్బు హుండీలో వేయడం, నాలుగోది లడ్డూ ప్రసాదం తీసుకోవడం. అయితే మొదటిమూడు తాను, తన కుంటుంబం కోసం చేస్తే నాలుగోది మాత్రం స్నేహితులు, బందువుల కోసం చేస్తారు. లడ్డూ ప్రసాదాన్ని తాము స్వీకరించడమే కాదు ఇతరులకు పంచడానికి కొంటుంటారు. కాబట్టి తిరుమలలో లడ్డూ విక్రయాలు గణనీయంగా జరుగుతుంటాయి.

అయితే ఆ వేంకటేశ్వర స్వామి పరమ పవిత్ర ప్రసాదమైన తిరుమల లడ్డూ అమ్మకాల్లో సరికొత్త రికార్డు నమోదయ్యింది. ఈ లడ్డూల విక్రయాలు జూన్ (2026) నెలలో మునుపెన్నడూ లేని స్థాయికి చేరాయి. భక్తుల రద్దీని దృష్టిలో ఉంచుకుని తిరుమల తిరుపతి దేవస్థానం (TTD) లడ్డూల ఉత్పత్తిని భారీగా పెంచడమే కాకుండా, ఎక్కడా ఎలాంటి కొరత లేకుండా నిరంతరాయంగా పంపిణీ చేసింది. దీంతో భారీగా లడ్డూలు అమ్ముడయ్యాయి.

జూన్ లో ఎన్ని లడ్డూలు అమ్మారో తెలుసా?

సాధారణంగానే తిరుమల లడ్డూ విక్రయాలు ఎక్కువగా ఉంటాయి... కానీ గత కొన్ని నెలలుగా ఇది పెరుగుతూ వస్తోంది. ఈ ఏడాది ఏప్రిల్, మే నెలలో భారీగా లడ్డూ విక్రయాలు జరిగాయి... ఇదే రికార్డు అనుకుంటే జూన్ దీన్ని మించిపోయే అమ్మకాలు జరిగాయి. జూన్ నెలలో లడ్డూల విక్రయాలు గణనీయమైన వృద్ధిని సాధించాయి... ఆల్ టైమ్ రికార్డు నమోదయ్యింది.

ఏప్రిల్ 2026 : 1,11,96,170 లడ్డూల విక్రయం

మే 2026 : 1,21,35,528 లడ్డూల విక్రయం

జూన్ 2026 : 1,26,81,805 లడ్డూల విక్రయం

తిరుమల లడ్డూ అమ్మకాల్లో భారీ వృద్ధి

గత రెండు సంవత్సరాల జూన్ నెలల గణాంకాలతో పోల్చి చూస్తే.. ఈ ఏడాది జూన్‌లో లడ్డూల విక్రయం ఒక మైలురాయిగా నిలిచింది. ప్రతి ఏటా లడ్డూల విక్రయాలు పెరుగుతున్నాయే తప్ప తగ్గడంలేదు... దీన్ని బట్టి తిరుమలకు వచ్చే భక్తుల సంఖ్య కూడా పెరుగుతోందని స్పష్టంగా అర్థమవుతోంది.

జూన్ 2024 అమ్మకాలు : 1,02,64,364

జూన్ 2025 అమ్మకాలు : 1,19,21,353

జూన్ 2026 అమ్మకాలు : 1,26,81,805 

గత ఏడాదితో జూన్ అమ్మకాలతో పోలిస్తే ఈసారి అదనంగా 7,59,452 లడ్డూలు అమ్ముడయ్యాయి. ఇది 6.37% వృద్ధిని సూచిస్తుంది. రెండేళ్ల క్రితం (2024 జూన్) తో పోలిస్తే ఏకంగా 24,17,441 లడ్డూలు అదనంగా విక్రయించారు. అంటే 23.55% భారీ వృద్ధి నమోదైంది.

తిరుమల లడ్డూ విక్రయాల పెరుగుదలకు కారణమేంటి?

శ్రీవారి దర్శనానికి వచ్చే భక్తుల సంఖ్య రోజురోజుకూ పెరుగుతున్న నేపథ్యంలో.. లడ్డూ ప్రసాదం తయారీ, పంపిణీలో భక్తులకు ఎలాంటి అసౌకర్యం కలగకుండా టీటీడీ అధికారులు పక్కా ప్రణాళికలతో వ్యవహరిస్తున్నారు. భక్తులందరికీ స్వామివారి ప్రసాదం తృప్తిగా అందేలా చర్యలు తీసుకుంటున్నారు… లడ్డూల ఉత్పత్తి పెంచారు. అందుకే విక్రయాలు కూడా గణనీయంగా పెరుగుతున్నాయి.