ఫిల్మ్ ఫెడరేషన్కి ఫిల్మ్ ఛాంబర్ పెద్ద ఝలక్, నిర్మాతలు కీలక నిర్ణయం.. అసలుకే మోసం
సారాంశం
తెలుగు ఫిల్మ్ ఇండస్ట్రీ ఎంప్లాయిస్ ఫెడరేషన్ షూటింగ్లకు బంద్ నిర్ణయాన్ని ప్రకటించిన నేపథ్యంలో ఇప్పుడు ఫిల్మ్ ఛాంబర్ కీలక నిర్ణయం తీసుకుంది. ఇది ఫెడరేషన్కి పెద్ద షాకిస్తోంది.
తెలుగు ఫిల్మ్ ఇండస్ట్రీ ఎంప్లాయిస్ ఫెడరేషన్ సినీ వర్కర్ల వేతనాల విషయంలో కీలక నిర్ణయం తీసుకున్న విషయం తెలిసిందే. కార్మికులకు 30శాతం వేతనాలు పెంచాలని ఫెడరేషన్ డిమాండ్ చేస్తూ వస్తోంది. గత కొన్ని రోజులుగా దీనిపై ఇండస్ట్రీలో చర్చలు జరుగుతున్నాయి. ఫిల్మ్ ఛాంబర్ పెద్దలతో ఫెడరేషన్ నాయకులు చర్చలు జరిపారు. ఆదివారం జరిగిన చర్చలు విఫలమయ్యాయి. 30శాతం వేతనాలు పెంచేందుకు ఫిల్మ్ ఛాంబర్ నో చెప్పింది. దీంతో సోమవారం(ఆగస్ట్ 4) నుంచి పెంచిన వేతనాలు ఇస్తామని నిర్మాతలు ఫెడరేషన్కి లెటర్ ఇస్తేనే కార్మికులు వారి సినిమాల షూటింగ్లో పాల్గొనాలని, అలాంటి హామీ పత్రం ఇవ్వని నిర్మాతల సినిమాల షూటింగ్లకు వెళ్ల కూడదని నిర్ణయిస్తూ అధికారికంగా ఒక మీడియా ప్రకటన విడుదల చేసింది.
తెలుగు ఫిల్మ్ ఫెడరేషన్కి వ్యతిరేకంగా ఫిల్మ్ ఛాంబర్ కీలక నిర్ణయం
ఫిల్మ్ ఫెడరేషన్ నిర్ణయంతో సోమవారం నుంచి చాలా సినిమాల షూటింగ్లు ఆగిపోబోతున్నాయి. అయితే దీన్ని నిర్మాతలు, ఫిల్మ్ ఛాంబర్ తీవ్రంగా వ్యతిరేకిస్తోంది. అంతేకాదు సోమవారం కీలక నిర్ణయం తీసుకుంది. చిన్న నిర్మాతల అభిప్రాయాన్ని, వారి ఇబ్బందులను దృష్టిలో పెట్టుకుని ఫిల్మ్ ఫెడరేషన్కి పెద్ద షాకిచ్చే నిర్ణయం తీసుకుంది. దీని ప్రకారం తమకు అనుకూలమైన కార్మికులను తెచ్చుకునే హక్కు నిర్మాతలకు ఉందని తెలిపింది. తన బడ్జెట్లో ఉన్న వారిని సినిమాల షూటింగ్లకు ఉపయోగించుకుంటామని స్పష్టం చేసింది. ఈ మేరకు ఫిల్మ్ ఛాంబర్ ప్రధాన కార్యదర్శి దామోదర ప్రసాద్ పేరుతో అధికారికంగా మీడియాకి లెటర్ని రిలీజ్ చేసింది. ఇందులో ఏం చెప్పారనేది చూస్తే.
ఫిల్మ్ ఛాంబర్ తీసుకున్న కీలక నిర్ణయాలివే
1) తెలుగు చలన చిత్ర పరిశ్రమ తెలంగాణ / ఆంధ్రప్రదేశ్ రాష్ట్రాలలో ఇప్పటికే చాలా ఇబ్బందికర పరిస్థితులలో ఉంది. ఇలాంటి సమయంలో వేతనాలు పెంచడం, అందులోనూ గౌరవనీయులైన కార్మిక శాఖ కమిషనర్ మార్గదర్శకత్వంలో, సామరస్యపూర్వక పరిష్కారం కోసం చర్చలు జరుగుతున్న సందర్భంలో ఫెడరేషన్ వారు లేబర్ కమిషనర్ మాటను ధిక్కరిస్తూ 03-08-2025వ తేదిన 04-08-2025 తేది నుండి 30% వేతనాలు, ప్రొడ్యూసర్ నుండి సంబంధిత కన్ఫర్మేషన్ లెటర్ ఇచ్చిన వారికి మాత్రమే, సంబంధిత లెటర్ ఫెడరేషన్ ద్వారా యూనియన్లకు తెలియచేసిన తరువాత మాత్రమే విధులకు వెళ్ళాలని నిర్ణయించడం చాలా బాధాకరం, ఇది నిజాయితీతో కూడిన చర్చల స్ఫూర్తిని దెబ్బ తీస్తోంది.
2) తెలంగాణ, ఆంధ్రప్రదేశ్ రాష్ట్రాల చిన్న నిర్మాతలు భరించలేని స్థాయిలో వేతనాల పెంపును యూనియన్స్ డిమాండ్ చేయటం చిన్న నిర్మాతలకు ఆమోదయోగ్యం కాదు. ఆ పెంపు వారు భరించే స్థాయిలో లేదు. ప్రతి చిన్న నిర్మాత ఈ పెంపుదలకు వ్యతిరేకంగా ఉండడం గమనార్హం. అందువలన ప్రస్తుత పరిస్థితులలో భరించలేని ఈ పెంపును నిర్మాతలందరూ ఏకగ్రీవంగా వ్యతిరేకించడమైనది. కనీస వేతనాల చట్టం ప్రకారం, కనీస వేతనాలు చెల్లించి ఏ కార్మికుడినైనా నియమించుకునే హక్కు నిర్మాతలకు ఉందని కార్మిక శాఖ కమిషనర్ స్పష్టం చేశారు. అదనంగా, కాంపిటీషన్ కమిషన్ ఆఫ్ ఇండియా (సీసీఐ) కూడా నిర్మాతల స్వయంప్రతిపత్తిని సమర్థిస్తూ ఒక ఉత్తర్వును జారీ చేసింది. ఫెడరేషన్ల ఒత్తిడి, పోటీని నిరోధించే పద్ధతులను ఖండిస్తూ, అలాంటి నిబంధనలను అమలు చేయకుండా నిరోధించింది.
3) కాస్ట్ ఆఫ్ లివింగ్ విషయంలో మిగతా మెట్రోపాలిటన్ పట్టణాలతో పోలిస్తే మన హైదరాబాద్లో తక్కువ. అయినప్పటికీ మనం అన్ని యూనియన్ల వారికి ఎక్కువ వేతనాలు చెల్లిస్తున్నాం. ఇతర రాష్ట్రాల చలన చిత్ర పరిశ్రమలో ఇచ్చే వేతనాల కంటే మన తెలంగాణ, ఆంధ్రప్రదేశ్ రాష్ట్రాలలో పని చేసే కార్మికులకు అధిక వేతనాలు చెల్లిస్తున్నాం.
4) ఈ పరిస్థితుల నేపథ్యంలో, తెలుగు ఫిలిం చాంబర్ ఏకగ్రీవంగా ఒక తీర్మానం చేసింది. దీని ప్రకారం నిర్మాతలు ఎవరైతే వైపుణ్యం కలిగిన వర్కర్స్ తామివ్వగలిగినా వేతనానికి పనిచేస్తారో వారెవరైనప్పటికి వారి యూనియన్లో ఉన్నా లేకున్నా వాళ్ళతో షూటింగ్స్ చేసుకోవడానికి సిద్ధంగా ఉన్నారు. ఎంతోమంది ఔత్సాహిక నిపుణులు/కార్మికులు ఇండస్ట్రీలో పనిచేయడానికి సిద్ధంగా ఉన్నప్పటికీ యూనియన్లలో సభ్యత్వం కొరకు లక్షలాది రూపాయలు డిమాండ్ చేస్తూ వారి ప్రవేశానికి సదరు యూనియన్ల వారు అవరోధం కలిగిస్తున్నారు. ఇది ఎంతో మంది నైపుణ్యవంతులైన కార్మికుల పొట్ట కొట్టడమే. ప్రతి ప్రాజెక్టు అవసరాలు, వ్యక్తుల సామర్థ్యాల ఆధారంగా కార్మికులతో కలిసి పనిచేసే పూర్తి స్వేచ్చ నిర్మాతలకు ఉంటుంది.
5) ఎవరైనా ఔత్సాహిక నిపుణులు / కార్మికులు సినీ రంగంలో పనిచేయాలంటే వారితో పని చేయించుకోవడానికి నిర్మాతలందరూ ఏకగ్రీవంగా ఆమోదించడం జరిగింది. లక్షలాది రూపాయలు సభ్యత్వం కొరకు కట్టవలసిన పని లేదు. నైపుణ్యం ఉన్న కార్మికునికి పని కల్పించడమే మా ధ్యేయం.
6) తెలుగు చలన చిత్ర వాణిజ్య మండలి పరిశ్రమలోని అనేక రంగాలలో పని చేసి కళాకారులు, సాంకేతిక నిపుణులు, ఇతర స్టేక్ హోల్డర్స్ ఉంటారు. వీరందరితో పని చేస్తూ ఒక సానుకూల నిర్ణయం వైపు మండలి పని చేస్తుంది.
7) నిర్మాత లేనిదే సినిమా పరిశ్రమ లేదు. మన ఫిలిం ఇండస్ట్రీ మనుగడ కోసం నిర్మాత శ్రేయస్సు అతి ముఖ్యమైన విషయం అని కార్మిక సంఘాలు మరొక్కసారి గుర్తించాలి` అని తెలియజేస్తూ కె ఎల దామోదర్ ప్రసాద్ ఈ లెటర్ని విడుదల చేశారు. ఇదిప్పుడు తెలుగు ఫిల్మ్ ఇండస్ట్రీ ఎంప్లాయిస్ ఫెడరేషన్కి పెద్ద షాకిస్తుందని చెప్పొచ్చు. మరి ఇది ఎలాంటి పరిణామాలకు దారితీస్తుందో చూడాలి. మొత్తానికి పరిస్థితి చాలా సీరియస్గానే ఉందని తెలుస్తోంది.
