సూపర్ స్టార్ కృష్ణ మృతిపై సంతాపం.. రేపు షూటింగ్‌లకు సెలవు ప్రకటించిన నిర్మాతల మండలి..

సూపర్ స్టార్ కృష్ణ మృతిపై పలువురు ప్రముఖులు సంతాపం వ్యక్తం చేస్తున్నారు. ఆయన మృతిపై సంతాపం తెలిపిన తెలుగు నిర్మాతల మండలి.. షూటింగ్‌లకు సెలవు ప్రకటించింది.

సూపర్ స్టార్ కృష్ణ మృతిపై పలువురు ప్రముఖులు సంతాపం వ్యక్తం చేస్తున్నారు. ఆయన మృతిపై తెలుగు  రాష్ట్రాల ముఖ్యమంత్రులతో పాటు, పలు రాజకీయ పార్టీల నాయకులు, సినీ ప్రముఖులు సంతాపం తెలుపుతున్నారు. కృష్ణ కుటుంబ సభ్యులకు ప్రగాఢ సానుభూతి తెలియజేస్తున్నారు. సూపర్ స్టార్ కృష్ణ మృతిపై తెలుగు నిర్మాతల మండలి సంతాపం తెలిపింది. కృష్ణ మృతికి సంతాపంగా రేపు సినిమా షూటింగ్‌లకు సెలవు ప్రకటించింది. తొలుత ఎల్లుండి కృష్ణ అంత్యక్రియలు జరుగనున్నాయని భావించిన నేపథ్యంలో.. ఆ రోజు షూటింగ్‌లకు సెలవు ప్రకటించినట్టుగా నిర్మాత మండలి నుంచి సమమాచారం అందింది. అయితే రేపు కృష్ణ అంత్యక్రియలను నిర్వహించనున్నట్టుగా కుటుంబ సభ్యులు నిర్ణయం తీసుకోవడంతో.. రేపు షూటింగ్‌లకు సెలవు ప్రకటిస్తున్నట్టుగా నిర్మాతల మండలి అధికారిక ప్రకటన విడుదల చేసింది. 

ఇక, అభిమానుల సందర్శన కోసం గచ్చిబౌలి స్టేడియానికి కృష్ణ భౌతికకాయం తరలించనున్నారు. బుధవారం ప్రభుత్వ అధికారిక లాంఛనాలతో కృష్ణ అంత్యక్రియలు జరగనున్నాయి. 

సూపర్ స్టార్ కృష్ణ మరణంపై మీడియాతో మాట్లాడిన కాంటినెంటల్ ఆస్పత్రి వైద్యులు.. పలు వివరాలను వెల్లడించారు. కృష్ణ గుండెపోటుతో ఆస్పత్రిలో చేరడం జరిగిందన్నారు. ఆస్పత్రికి తీసుకురాకముందే ఆయన స్పృహ కోల్పోయారని చెప్పారు. 

‘‘ఆస్పత్రికి తీసుకొచ్చాక వెంటనే చికిత్స ప్రారంభించాం. ఆస్పత్రికితీసుకొచ్చినప్పటీ నుంచి ఆయన పరిస్థితి విషమంగానే ఉంది. 20 నిమిషాలు సీపీఆర్‌ చేశాం. అనంతరం ఐసీయూకు తరలించాం. రెండు మూడు గంటల్లో పలు అవయవాలు పనిచేయడం మానేశాయి. 4  గంటల తర్వాత డయాలసిస్ చేశాం. గంట గంటకు కుటుం సభ్యులతో మాట్లాడాం. సాయంత్రం కృష్ణ ఆరోగ్యం మరింతగా విషమించింది. సాయంత్రం 8 గంటల సమయంలో  ఏ ట్రీట్‌మెంట్ చేసిన ఫలితం ఉండదనే నిర్దారణకు వచ్చాం. 

ఆయనను ఎలాంటి ఇబ్బంది పెట్టకుండా.. మన:శాంతిగా వెళ్లిపోవాలని నిర్ణయం తీసుకున్నాం. మంగళవారం తెల్లవారుజామున 4.09 గంటలకు తుదిశ్వాస విడిచారు. కృష్ణ విషయంలో వైద్యనీతిని పాటించాం. ఆయనకు చికిత్స అందించడం మేము గౌరవంగా భావిస్తున్నాం. గుండెపోతు, మల్టీ ఆర్గాన్ ఫెయిల్యూర్‌తో పాటు.. హైపాక్సిక్ బ్రెయిన్ ఇంజ్యూరీ కూడా అయింది. ఆయన ఎలాంటి చికిత్సకు సహకరించే పరిస్థితి లేకపోవడంతోనే చికిత్సను ఆపేశాం. చివరి క్షణాల్లో ఆయనకు ఎలాంటి ఇబ్బంది లేకుండా చూసుకున్నాం’’ అని వైద్యులు చెప్పారు.