రామమందిరం వేడుకకు వెళ్తున్నా.. చిరంజీవి ప్రకటన.. ఆలయ నిర్మాణం కోసం `హనుమాన్‌` విరాళం..

రామ మందిరం ప్రారంభోత్సవానికి సంబంధించి తమకు ఆహ్వానం అందిందని చిరంజీవి తెలిపారు. అంతేకాదు `హనుమాన్` చిత్ర బృందం విరాళాన్ని ప్రకటించారు.

రామమందిర నిర్మాణం చరిత్రలో నిలిచిపోయే ఘట్టం అని చిరంజీవి అన్నారు. రామమందిరం ప్రారంభోత్సవానికి తమకు ఆహ్వానం అందిందని, తాము జనవరి 22న జరిగే రాముడి మందిరం ఓపెనింగ్‌ కి వెళ్తున్నామని తెలిపారు. ఆయన తాజాగా `హనుమాన్‌` చిత్ర ప్రీ రిలీజ్‌ ఈవెంట్‌కి గెస్ట్ గా వెళ్లారు. ఈ సందర్భంగా ఈ ప్రకటన చేశారు చిరంజీవి. అంతేకాదు `హనుమాన్‌` చిత్ర యూనిట్‌కి సంబంధించిన ఓ ఆసక్తికర ప్రకటన చేశారు. 

రాముడి మందిరం కోసం విరాళం ప్రకటించారు. `హనుమాన్‌` సినిమాకోసం తెగిన ప్రతి టికెట్‌ పై రూ.5 అయోధ్య రామమందిరం నిర్మాణం కోసం విరాళంగా అందిస్తున్నట్టు తెలిపారు. ఈ చిత్ర బృందం ఇలాంటి గొప్ప ఆలోచన చేయడం, రాముడి కోసం ఇంత కార్యం చేయడం పట్ల చిరంజీవి ఆనందించారు. ఆయన చిత్ర బృందానికి అభినందనలు తెలిపారు. ఆ రాముడి ఆశీస్సులు సినిమాకి ఉంటాయన్నారు. 

ఈ సందర్భంగా `హనుమాన్‌` చిత్రం గురించి మాట్లాడారు. ఈ మూవీకి ఈ టైటిల్‌ పెట్టడానికి తనే పరోక్షంగా కారణమని తెలిపారు. తాను సమంతతో చేసిన చాటింగ్‌లో పాల్గొన్నప్పుడు సూపర్‌ హీరోల గురించి ప్రశ్న ఎదురయ్యిందని, ఆ సమయంలో తమకు నచ్చిన సూపర్‌ హీరో `హనుమాన్‌` అని తాను చెప్పినట్టు వెల్లడించారు చిరు. అలా ఆ టైటిల్‌నే ఇప్పుడు ఈ సినిమాకి పెట్టారని తెలిసి చాలా ఆనందించినట్టు తెలిపారు. టీజర్‌, ట్రైలర్‌ నుంచి తనకు సినిమాపై ఆసక్తి ఏర్పడిందని, ఈమూవీ గురించి అడిగి తెలుసుకున్నట్టు తెలిపారు. తాను హనుమంతుడి భక్తుడిగా ఇక్కడికి రావడం తన అదృష్టమని తెలిపారు.