`భీమ్లా నాయక్` బ్రేక్ టైమ్.. పవన్ తుపాకి పడితే బాక్సాఫీసు దద్దరిల్లిపోదా?
సారాంశం
తాజాగా ఈ సినిమా నుంచి `బ్రేక్ టైమ్ ఇన్ భీమ్లా నాయక్ స్టైల్` పేరుతో చిన్న వీడియోని విడుదల చేశారు. ఇందులో పవన్ తెల్ల దుస్తులు ధరించి కారు పక్కన తుపాకి పట్టి శత్రువుల గుండెల్లో బుల్లెట్ల వర్షం కురిపించాడు.
భీమ్లా నాయక్ ఈ సారి తుపాకి పట్టాడు. బుల్లెట్ల వర్షం కురిపించాడు. శత్రువు టార్గెట్గా తుపాకి ఎక్కుపెట్టి దద్దరిల్లేలా చేశాడు. ఇప్పుడిది దుమ్ములేపుతుంది. ఇదంతా పవన్ కళ్యాణ్, రానా కలిసి నటిస్తున్న `భీమ్లా నాయక్` చిత్రంలోని చిన్న బ్రేక్ టైమ్ వీడియో క్లిప్. ఈ సినిమాకి సంబంధించి ఇటీవల టైటిల్ ఫస్ట్ లుక్, వీడియో గ్లింప్స్ ని విడుదల చేయగా, అది రికార్డులు సృష్టించింది. 24గంటల్లోనే 10 మిలియన్స్ ని దాటేసింది.
ఇదిలా ఉంటే తాజాగా ఈ సినిమా నుంచి `బ్రేక్ టైమ్ ఇన్ భీమ్లా నాయక్ స్టైల్` పేరుతో చిన్న వీడియోని విడుదల చేశారు. ఇందులో పవన్ తెల్ల దుస్తులు ధరించి కారు పక్కన తుపాకి పట్టి శత్రువుల గుండెల్లో బుల్లెట్ల వర్షం కురిపించాడు. ఆ తర్వాత ఆయన అడవిలోకి తుపాకీ పట్టుకుని ఒంటరిగా వెళ్తున్న వీడియో క్లిప్ ఆద్యంతం ఆకట్టుకుంటుంది. చిత్ర షూటింగ్ బ్రేక్ టైమ్లో పవన్ ఇలా అడవిలోకి వెళ్లి రిలాక్స్ అయినట్టుగా తెలుస్తుంది.
ఈ సందర్భంగా పంచుకున్న ఓ ఫోటో మరింత ఆసక్తిని రేకెత్తిస్తుంది. ఇందులో `యోగి కమండలం కొమ్ములోంచి చెట్లకి ప్రాణ ధారలు వదుల్తాడు. యోధుడు తుపాకి గొట్టం అంచునుంచి ప్రకృతికి వత్తాసు పలుకుతాడు. నాయకుడు ఈరెండింటినీ తన భుజాన మోసుకుంటూ ముందుకు కదుల్తాడు` అని పంచుకున్న కొటేషన్ ఆకట్టుకుంటుంది. సినిమాపై అంచనాలను మరింతగా పెంచుతుంది.
పవన్ కళ్యాణ్, రానా హీరోలుగా, నిత్యా మీనన్, ఐశ్వర్యా రాజేష్ కథానాయికలుగా, సాగర్ కె చంద్ర దర్శకత్వంలో `భీమ్లా నాయక్` సినిమా రూపొందుతుంది. త్రివిక్రమ్ మాటలు, కథనం అందిస్తున్నారు. సితార ఎంటర్టైన్మెంట్స్ పతాకంపై సూర్యదేవర నాగవంశీ నిర్మిస్తున్నారు. ఈ చిత్రాన్ని వచ్చే సంక్రాంతికి జనవరి 12న విడుదల చేయబోతున్నారు.