ఎన్టీఆర్ భార్యగా అనుపమ?

ఎన్టీఆర్ జీవిత కథ ఆధారంగా తెరకెక్కుతున్న తాజా చిత్రం ఎన్టీఆర్ పాత్రలో కనిపించనున్న బాలకృష్ణ ఎన్టీఆర్ భార్య పాత్ర కోసం అనుపమని సంప్రదించిన తేజ  

లెజెండరీ నటుడు, టీడీపీ వ్యవస్థాపకుడు ఎన్టీఆర్ జీవిత కథ ఆధారంగా  ఆయన కుమారుడు బాలకృష్ణ ఓ సినిమా తెరకెక్కిస్తున్న సంగతి తెలిసిందే. ఈ సినిమాకి తేజ దర్శకత్వం వహిస్తున్నారు. ఈ సినిమా రెగ్యుల‌ర్ షూటింగ్ అక్టోబ‌ర్20 నుంచి ప్రారంభంకానుంది. దీంతో సినిమా సెట్స్‌ మీద‌కు వెళ్లే ముందే కాస్ట్ అండ్ క్రూను నియ‌మించుకునే ప‌నిలో తేజ బిజీగా ఉన్నాడు.

ఇప్ప‌టి వ‌ర‌కు ఎన్టీఆర్ రోల్‌కు బాల‌కృష్ణ మాత్ర‌మే ఎంపిక‌య్యాడు. ద‌ర్శ‌కుడు తేజ ఓ వైపు స్క్రిఫ్ట్ వ‌ర్క్ కంప్లీట్ చేసుకుంటూనే మ‌రో వైపు న‌టీన‌టుల అన్వేష‌ణ చేస్తున్నారు. తాజాగా నేనే రాజు నేనే మంత్రి అనే పొలిటిక‌ల్ డ్రామాతో హిట్ కొట్టిన తేజ ఈ సినిమాను డైరెక్ట్ చేస్తుండడంతో మంచి అంచ‌నాలు ఉన్నాయి. ఇక సాంకేతిక నిపుణుల్లో ఒక్క కీర‌వాణి పేరు మాత్ర‌మే మ్యూజిక్ డైరెక్ట‌ర్‌గా వినిపిస్తోంది.

ఇక లేటెస్ట్ టాక్ ఏంటంటే ఈ బ‌యోపిక్‌లో కీల‌క‌మైన ఎన్టీఆర్ భార్య బ‌స‌వ‌తారకం రోల్ కోసం ఓ యంగ్ హీరోయిన్‌ను తేజ సంప్ర‌దించిన‌ట్టు తెలుస్తోంది. ఆ యంగ్ హీరోయిన్ ఎవ‌రో కాదు అనుప‌మ ప‌ర‌మేశ్వ‌ర‌న్‌. ప్రేమ‌మ్, అఆ,  శ‌త‌మానం భ‌వ‌తి సినిమాల‌తో  అనుపమ తెలుగు ప్రేక్షకులకు బాగా దగ్గరైంది.  ప్రస్తుతం అనుపమ రామ్‌తో ‘ఉన్న‌ది ఒక్క‌టే జింద‌గీ’, నానితో ‘కృష్ణార్జున యుద్ధం’ సినిమాలు చేస్తోంది. 

 అనుపమ అయితే.. ఈ సినిమాకి బాగా సరిపోతుందని తేజ భావిస్తున్నారట. ఇప్పటికే ఆమెను సంప్రదించారట కూడా. దీనిపై ఆమె సమాధానం మరో రెండు మూడు రోజుల్లో తెలుస్తుంది. ఇక ఈ సినిమాను ఎన్టీఆర్ జయంతి రోజైన మే 28న సినిమా విడుదలకు ప్లాన్ చేస్తున్నట్లు దర్శకుడు తేజ చెప్పాడు.