అండర్-19 ఆసియా కప్ ఫైనల్: భారత బౌలర్ల విజృంభణ... వర్షం కారణంగా నిలిచిన మ్యాచ్...

India vs Sri Lanka: వర్షం కారణంగా మ్యాచ్ నిలిచే సమయానికి 33 ఓవర్లలో 7 వికెట్లు కోల్పోయి 74 పరుగులు చేసిన శ్రీలంక...

అండర్-19 ఆసియా కప్ ఫైనల్ మ్యాచ్‌కి వరుణుడు అంతరాయం కలిగించాడు. టాస్ గెలిచి బ్యాటింగ్ ఎంచుకున్న శ్రీలంక జట్టు, వర్షం కారణంగా మ్యాచ్ నిలిచే సమయానికి 33 ఓవర్లలో 7 వికెట్ల నష్టానికి 74 పరుగులు చేసింది...

మొదటి ఓవర్ నుంచి నెమ్మదిగా ఇన్నింగ్స్ ఆరంభించింది శ్రీలంక. నాలుగో ఓవర్‌లో చమీందు విక్రమసింగే 2 పరుగులు చేసి అవుట్ కాగా, ఆ తర్వాత 10 ఓవర్లు పూర్తయ్యే సమయానికి 15 పరుగులు మాత్రమే చేయగలిగింది లంక జట్టు...

28 బంతుల్లో 6 పరుగులు చేసిన శివాన్ డానియల్‌ను రాజ్ భవ అవుట్ చేయగా, 33 బంతుల్లో ఓ ఫోర్‌తో 9 పరుగులు చేసిన అంజల బండారాని కుశాల్ తంబే ఎల్బీడబ్ల్యూగా పెవిలియన్ చేర్చాడు...

17 బంతుల్లో 4 పరుగులు చేసిన పవన్ పతిరాజాను కుశాల్ తంబే క్లీన్ బౌల్డ్ చేయగా, 36 బంతుల్లో ఓ ఫోర్‌తో 14 పరుగులు చేసిన సదీశ రాజపక్ష, విక్కీ వత్సల్ బౌలింగ్‌లో షేక్ రషీద్‌కి క్యాచ్ ఇచ్చి అవుట్ అయ్యాడు..

కెప్టెన్ దునిత్ వెల్లలాగే 15 బంతుల్లో ఓ ఫోర్‌తో 9 పరుగులు చేసి విక్కీ వత్సల్ బౌలింగ్‌లో రాజ్ భవకు క్యాచ్ ఇచ్చి పెవిలియన్ చేరాడు. ఆ తర్వాత 18 బంతుల్లో ఓ ఫోర్‌తో 7 పరుగులు చేసిన రనుడా సోమరత్నే కూడా అవుట్ కావడంతో 57 పరుగుల వద్ద 7 వికెట్లు కోల్పోయింది శ్రీలంక...

26.3 ఓవర్లు ముగిసే సమయానికి 57 పరుగులకి 7 వికెట్లను కోల్పోయింది శ్రీలంక. ఆ తర్వాత 39 బంతుల్లో 17 పరుగులు జోడించి లంకను ఆదుకునే ప్రయత్నం చేస్తున్నారు రవీన్ డీ సిల్వ, యషు రొడ్రిగో... 

భారత బౌలర్లలో విక్కీ వత్సల్ 8 ఓవర్లలో 3 మెయిడిన్లలో 11 పరుగులిచ్చి 3 వికెట్లు తీయగా, కుశాల్ తంబే 6 ఓవర్లలో 23 పరుగులిచ్చి 2 వికెట్లు తీశాడు. రవి కుమార్, రాజ్ భవ తలా ఓ వికెట్ తీశారు. 

పాకిస్తాన్‌తో జరిగిన మొదటి సెమీ ఫైనల్ మ్యాచ్‌లో 147 పరుగులకే ఆలౌట్ అయిన శ్రీలంక జట్టు, అద్భుత బౌలింగ్‌తో పాకిస్తాన్ జట్టును 125 పరుగులకు ఆలౌట్ చేసి 22 పరుగుల తేడాతో అద్బుత విజయాన్ని అందుకుంది. దీంతో మ్యాచ్ తిరిగి ప్రారంభమైన తర్వాత లంక జట్టును ఎంత తక్కువ స్కోరుకి ఆలౌట్ చేస్తే, భారత జట్టుకి విజయావకాశాలు అంత ఎక్కువగా ఉంటాయి...

లేదంటే శ్రీలంక జట్టు బౌలింగ్ అటాక్‌ను ఎదుర్కొంటూ మనవాళ్లు లక్ష్యాన్ని విజయవంతంగా ఛేదించగలరా? అనేది ఆసక్తికరంగా మారనుంది.