Shubman Gill: గిల్ సెంచరీ.. భారీ స్కోరు దిశగా గుజరాత్ టైటాన్స్

IPL 2023: సన్ రైజర్స్   హైదరాబాద్ తో  అహ్మదాబాద్ వేదికగా జరుగుతున్న మ్యాచ్ లో గుజరాత్ టైటాన్స్ ఓపెనర్ శుభ్‌మన్ గిల్ సెంచరీతో కదం తొక్కాడు. 

టీమిండియా ఓపెనర్, ఐపీఎల్ లో గుజరాత్ టైటాన్స్ కు ఆడుతున్న  శుభ్‌మన్ గిల్  ఈ లీగ్ లో తొలి సెంచరీ  నమోదుచేశాడు.  సన్ రైజర్స్ హైదరాబాద్ తో  అహ్మదాబాద్ లోని నరేంద్ర మోడీ స్టేడియం వేదికగా జరుగుతున్న మ్యాచ్ లో  గిల్..  56 బంతుల్లోనే  13 బౌండరీలు, 1  సిక్సర్ సాయంతో  100 పరుగులు  చేసి తన కెరీర్ లో బెస్ట్ స్కోరును నమోదు చేశాడు. గిల్ సెంచరీతో  గుజరాత్ భారీ స్కోరు దిశగా  దూసుకుపోతున్నది. 18 ఓవర్లు ముగిసేసరికి  5 వికెట్ల నష్టానికి 180 పరుగులు చేసింది. 

ఐపీఎల్ లోకి  2018లో ఎంట్రీ ఇచ్చిన గిల్..  నాలుగు సీజన్ల పాటు   కోల్కతా నైట్ రైడర్స్ కు ఆడాడు.   2022 కు ముందు గుజరాత్ కు మారిన  గిల్ ఆ సీజన్ లో  16 మ్యాచ్ లలో  483 పరుగులు చేశాడు.  

ఈ క్రమంలో అతడికి సెంచరీ చేసే అవకాశం ఒకసారి వచ్చింది.  కానీ  96 పరుగుల వద్దే ఆగిపోయిన  గిల్.. ఈ సీజన్ లో కూడా  లక్నోతో మ్యాచ్ లో  94 పరుగులు చేసి నాటౌట్ గా నిలిచాడు.   కానీ ఇప్పుడు సన్ రైజర్స్ హైదరాబాద్ తో మ్యాచ్ లో దూకుడుగా ఆడి   సెంచరీ   కొరతను తీర్చుకున్నాడు.   

ఈ సెంచరీ ద్వారా అతడు గుజరాత్ టైటాన్స్ తరఫున ఫస్ట్ సెంచరీ చేసిన బ్యాటర్ గా రికార్డులకెక్కాడు. కాగా ఈ ఏడాది గిల్.. వన్డేలలో డబుల్ సెంచరీ, టెస్టులలో సెంచరీ, టీ20లలోనూ  సెంచరీ చేసిన విషయం తెలిసిందే.  ఇప్పుడు ఐపీఎల్ లో కూడా  గిల్  సెంచరీతో కదం తొక్కడం విశేషం.