India vs Bangladesh: రాణించిన భారత బౌలర్లు... టీమిండియా ముందు ఊరించే టార్గెట్..

టీమిండియాపై 256 పరుగుల మంచి స్కోరు చేసిన బంగ్లాదేశ్... హాఫ్ సెంచరీలు చేసిన తన్జీద్ హసన్, లిటన్ దాస్... 

పూణే వేదికగా బంగ్లాదేశ్‌తో జరుగుతున్న వరల్డ్ కప్ మ్యాచ్‌లో భారత బౌలర్లు మంచి ప్రదర్శన ఇచ్చారు. టాస్ గెలిచి బ్యాటింగ్ ఎంచుకున్న బంగ్లాదేశ్, నిర్ణీత 50 ఓవర్లలో 8 వికెట్లు కోల్పోయి 256 పరుగుల ఓ మాదిరి స్కోరు చేయగలిగింది. 

తన్జీద్ హసన్, లిటన్ దాస్ కలిసి తొలి వికెట్‌కి 93 పరుగుల భారీ భాగస్వామ్యం నెలకొల్పారు. 43 బంతుల్లో 5 ఫోర్లు, 3 సిక్సర్లతో 51 పరుగులు చేసిన తన్జీద్ హసన్‌ని కుల్దీప్ యాదవ్ ఎల్బీడబ్ల్యూగా అవుట్ చేశాడు..

17 బంతుల్లో 8 పరుగులు చేసిన నజ్ముల్ హసన్ షాంటోని రవీంద్ర జడేజా ఎల్బీడబ్ల్యూ చేయగా, 13 బంతులు ఆడిన మెహిదీ హసన్ మిరాజ్ 3 పరుగులు చేసి సిరాజ్ బౌలింగ్‌లో అవుట్ అయ్యాడు. 82 బంతుల్లో 7 ఫోర్లతో 66 పరుగులు చేసిన లిటన్ దాస్, రవీంద్ర జడేజా బౌలింగ్‌లో పెవిలియన్ చేరాడు...

తోహిద్ హృదయ్ 16 పరుగులు చేసి అవుట్ కాగా ముస్తాఫికర్ రహీం 46 బంతుల్లో ఓ ఫోర్, ఓ సిక్సర్‌తో 38 పరుగులు చేశాడు. షకీబ్ అల్ హసన్ తర్వాత వన్డే వరల్డ్ కప్‌లో 1000+ పరుగులు చేసిన రెండో బంగ్లా బ్యాటర్‌గా నిలిచాడు ముస్తాఫికర్ రహీం. 

18 బంతుల్లో 2 ఫోర్లతో 14 పరుగులు చేసిన నసుమ్ అహ్మద్‌, మహ్మద్ సిరాజ్ బౌలింగ్‌లో పెవిలియన్ చేరాడు. జస్ప్రిత్ బుమ్రా వేసిన ఆఖరి ఓవర్‌లో తొలి బంతికి మహ్మదుల్లా వికెట్ కోసం రివ్యూ కోరుకుంది టీమిండియా. అయితే రిప్లైలో నాటౌట్‌గా తేలింది. అయితే ఆ తర్వాతి బంతికి మహ్మదుల్లాని క్లీన్ బౌల్డ్ చేశాడు జస్ప్రిత్ బుమ్రా... ఇన్నింగ్స్ ఆఖరి బంతికి షోరిఫుల్ ఇస్లాం ఓ భారీ సిక్సర్ బాదాడు. 

భారత బౌలర్లలో జస్ప్రిత్ బుమ్రా, మహ్మద్ సిరాజ్, రవీంద్ర జడేజా రెండేసి వికెట్లు తీయగా 3 బంతులు వేసిన హార్ధిక్ పాండ్యా గాయపడి ఫీల్డింగ్‌కి కూడా రాలేదు. శార్దూల్ ఠాకూర్, కుల్దీప్ యాదవ్‌కి చెరో వికెట్ దక్కింది.