బంగ్లాదేశ్‌కి షాకిచ్చిన కెప్టెన్ తమీమ్ ఇక్బాల్... వన్డే వరల్డ్ కప్‌ 2023 టోర్నీకి 3 నెలల ముందు రిటైర్మెంట్...

రిటైర్మెంట్ ప్రకటించిన తమీమ్ ఇక్బాల్..  వన్డే వరల్డ్ కప్ 2023 టోర్నీకి 3 నెలల ముందు అంతర్జాతీయ క్రికెట్ నుంచి తప్పుకుంటూ సంచలన నిర్ణయం... 

బంగ్లాదేశ్ వన్డే కెప్టెన్ తమీమ్ ఇక్బాల్ షాకింగ్ నిర్ణయం తీసుకున్నాడు. వన్డే వరల్డ్ కప్ 2023 టోర్నీకి 3 నెలల ముందు అంతర్జాతీయ క్రికెట్ నుంచి తప్పుకుంటూ సంచలన నిర్ణయం తీసుకున్నాడు. 2007లో అంతర్జాతీయ ఆరంగ్రేటం చేసిన తమీమ్ ఇక్బాల్, 16 ఏళ్ల అంతర్జాతీయ క్రికెట్‌ కెరీర్‌లో 69 టెస్టులు, 238 వన్డేలు, 78 టీ20 మ్యాచులు ఆడాడు..

టెస్టుల్లో 10 సెంచరీలతో 5082 పరుగులు చేసిన తమీమ్ ఇక్బాల్, వన్డేల్లో 14 సెంచరీలతో 8224 పరుగులు చేశాడు. టీ20ల్లో ఓ సెంచరీ, 3 హాఫ్ సెంచరీలతో 1758 పరుగులు చేశాడు.  2020లో బంగ్లాదేశ్ కెప్టెన్‌గా బాధ్యతలు తీసుకున్న తమీమ్ ఇక్బాల్, 37  మ్యాచులకు కెప్టెన్సీ చేసి 21 విజయాలు అందుకున్నాడు. 

జనవరి 2022లో టీ20ల నుంచి ఆరు నెలల బ్రేక్ తీసుకున్న తమీమ్ ఇక్బాల్, 2022 జూన్‌లో టీ20ల నుంచి రిటైర్మెంట్ తీసుకుంటున్నట్టు ప్రకటించాడు. 

బంగ్లాదేశ్ టీమ్ తరుపున 10 వేలకు పైగా అంతర్జాతీయ పరుగులు చేసిన మొట్టమొదటి క్రికెటర్‌గా రికార్డు క్రియేట్ చేసిన తమీమ్ ఇక్బాల్, 14 వేలకు పైగా అంతర్జాతీయ పరుగులు చేసిన ఏకైక బంగ్లా బ్యాటర్‌గా ఉన్నాడు. 

బంగ్లాదేశ్ తరుపున 6 వేలకు పైగా వన్డే పరుగులు చేసిన బ్యాటర్ కూడా తమీమ్ ఇక్బాలే. మూడు ఫార్మాట్లలోనూ సెంచరీ చేసిన ఏకైక బంగ్లా బ్యాటర్‌గా ఉన్న తమీమ్ ఇక్బాల్, మూడు ఫార్మాట్లలో కలిసి 25 సెంచరీలు చేసి అత్యధిక సెంచరీలు చేసిన బంగ్లా బ్యాటర్‌గా ఉన్నాడు..

2007 వన్డే వరల్డ్ కప్‌ టోర్నీలో టీమిండియా, బంగ్లాదేశ్ చేతుల్లో దారుణ పరాజయాన్ని అందుకుని, గ్రూప్ స్టేజీ నుంచే తప్పుకుంది. భారత్‌తో జరిగిన మ్యాచ్‌లో అంతర్జాతీయ ఆరంగ్రేటం చేసిన తమీమ్ ఇక్బాల్, మొదటి మ్యాచ్‌లో హాఫ్ సెంచరీ చేసి ఆకట్టుకున్నాడు..

ప్రస్తుతం బంగ్లాదేశ్, ఆఫ్ఘనిస్తాన్‌తో వన్డే సిరీస్ ఆడుతోంది. తొలి వన్డేలో ఆఫ్ఘాన్ చేతుల్లో 17 పరుగుల తేడాతో ఓడింది బంగ్లాదేశ్. తమీమ్ ఇక్బాల్ 13 పరుగులు చేసి అవుట్ అయ్యాడు. ఈ మ్యాచ్‌లో ఓడిన తర్వాతి రోజే ప్రెస్ కాన్ఫిరెన్స్‌ పెట్టిన తమీమ్ ఇక్బాల్, కన్నీళ్లతో అంతర్జాతీయ క్రికెట్ నుంచి తప్పుకుంటున్నట్టు ప్రకటించాడు..

టీ20 ఫార్మాట్‌లో బంగ్లాదేశ్‌కి షకీబ్ అల్ హసన్ కెప్టెన్‌గా వ్యవహరిస్తుంటే, టెస్టుల్లో లిట్టన్ దాస్ కెప్టెన్‌గా ఉన్నాడు. వన్డే వరల్డ్ కప్ 2023 టోర్నీకి మూడు నెలల ముందు వన్డే జట్టు సారథ్య బాధ్యతలు ఈ ఇద్దరిలో ఎవరికి దక్కుతాయనేది ఆసక్తికరంగా మారింది.. టీ20 వరల్డ్ కప్ 2022 టోర్నీలో బంగ్లాకి కెప్టెన్సీ చేసిన ఆల్‌రౌండర్ షకీబ్ అల్ హసన్‌కే, వన్డే కెప్టెన్సీ దక్కే అవకాశాలు ఎక్కువగా ఉన్నాయి. 

వన్డేల్లో 8313 పరుగులు చేసిన తమీమ్ ఇక్బాల్, ప్రస్తుత తరంలో విరాట్ కోహ్లీ, రోహిత్ శర్మ తర్వాత అత్యధిక వన్డే పరుగులు చేసిన బ్యాటర్‌గా మూడో స్థానంలో ఉన్నాడు. తమీమ్ ఇక్బాల్ కెప్టెన్సీలో వన్డే వరల్డ్ కప్ 2023 సూపర్ లీగ్‌ పాయింట్ల పట్టికలో మూడో స్థానంలో నిలిచిన బంగ్లాదేశ్, ఇండియాలో జరిగే ప్రపంచ కప్‌కి నేరుగా అర్హత సాధించింది.